5 Lal in enkoltu, khawpui optu, upahai le naupanghai enkol tleituhai chun, “I siehlawhai kan na, thaw dinga i mi hril taphot chu thaw pei kan tih. Tu khom lalah siem nawng kan tih. Nangin thra i ti ang angin thaw lem rawh” ti thu chu Jehu kuoma hril dingin mi an tir a.

6 Chu phing leh Jehu chun lekha a thon nawk a, “Keima tienga thrang in ni a, ka thu in zawm takzet ding a ni chun, in pu naupa in kolhai seng lu hung la un la, zingah hieng tik huna hin ka kuomah Jezreel-ah hung ro” tiin. Lal naupa sawmsarihai chu khawpuia mi lien ruol, anni enkol tleituhai kuoma um an nih.

7 Lekha an hmu chun lal nauhai chu an man a, sawmsari chu an that a, an luhai chu bawmrangah an sie a, Jezreel-ah Jehu kuomah an thon a. 8 Zuolko a hung tlung chun Jehu kuomah, “Lal naupahai lu chu an hung lak tah” tiin a hril a. Ama chun, “Kul kotkhar bulah hmun hniah intieng khawm unla, a tûk zingkar chen um raw se” a ta.

9 A tûk zîngkâr chun Jehu chu a va suok a, mipui hmaah a ngir a, an kuomah, “Poi intawk nawh. Kei ruok chun ka pu ka phierruk a, ka that a. An leh, hienghai po po hi tuhai that am ni tang an ta? 10 Ahab sungkuo chungthua LALPA thu hrim hrim mal khat khom inkhêl a um nawh ti tu hin hre ta ro. A siehlaw Elisa hmanga LALPAN thu a hril kha a hung intlungtir tah a ni hi” a ta. 11 Jehu chun Jezreel-a Ahab sungkuo la um po po, ama hnuoia sipai lu tak hai, a ruol bul hai le a thiempuhai po po chu tu khom hlà hrim nei loin a that ram vong a.

12 Jehu chun Jezreel a suoksan a, Samaria tieng a fe a. 13 Lampuia berampuhai beram hmul vawna Beth Eked a va tlung chun Juda lal Ahazia unauhai laia a thren a hmu a. Ama chun, “Tuhai am in na?” a ta, anni chun, “Ahazia unauhai kan na, lal nauhai le lalnu Jezebel kan zu chibai ding a nih” an ta. 14 Jehu chun, “A hringin man tawl ro” a ta, a hringin an man a, beram hmul vawna kawla tuikhur bula khura chun pakhat khom hla loin an that vong a, an rengin sawmli le pahni an nih.

15 Chu taka inthoka a suok chun ama hmuok dinga hung Rekab naupa Jehonadab chu a’n tuokpui a. Jehu chun chibai a buk a, a kuomah, “I chunga lungril indik ka put ang hin ka chungah i put ve am?” a ta, Jehonadab chun, “Put ve e” a ta. Jehu chun, “Chuong an leh i kut kha mi hang pe ta” a ta, a hang pek a, tawlailira chun a kei kai a. 16 Jehu chun, “Ka kuomah hung la, LALPA ta dinga thrahnem ka ngaizie hung hmu ve hrim hrim rawh” a ta. Chuongchun, a tawlailira chun an chuongtir a. 17 Samaria a tlung chun Ahab sungkuo Samariaa la um sunhai chu a that vong a; Elija hmanga LALPA thu ang ngeiin a sukchimit tawl tah a nih.

18 Jehu chun mipui po po chu a ko khawm a, an kuomah, “Ahab khan Baal rong hi a bawl met chauh a na, Jehu hin chu a bawl tak tak ding a nih. 19 Chuleiin, Baal zawlneihai po po, a betuhai po po le an thiempuhai po po ka kuoma hin hung ko khawm ro. Baal ta dingin inthawina ropui ka’n hlan ding a ni leiin tu khom a kim naw um naw raw hai se. A hung naw an um chun damin suok naw ni hai” a ta. Jehu chun Baal betuhai chu sukhlum tuma dawhaa a thaw tawl a nih.

20 Jehu chun, “Baal hmingin kûtpui siem ro” a ta, chu chu nasa takin an hril thang a. 21 Israel ram po poah a hril dar a, chuongchun Baal betuhai po po chu an hung a, a thrang naw hrim hrim an um nawh. Baal ina chun an lut a, kotkhara inthokin a chawr tieng chen an sip hmur a. 22 Jehu chun thiempu silfen enkoltu kuomah, “Baal betu po po hi an puon bat ding hung lapek rawh” a ta, chuongchun a hung lak a.

23 Jehu chu Rekab naupa Jehonadab leh Baal ina chun a lut a. Jehu chun Baal betuhai kuomah, “Hi taka hin Baal betu ni lo, LALPA betu lo um ve pal rawi an tih, zong unla, en fel ro” a ta. 24 Chuongchun, pumraw thilhlân le thilhlàn dang dang inhlàn dingin an lut a. Jehu chun puo tieng mi sawmriet a lo sie rùk ta hrim a. An kuomah, “Hieng in kuta ka pek hai cheu hi tu khom in insuo vai chun, a’n suotu chun a’n suo aiin a hringna chân a tih” a ta.

25 Pumraw thilhlân an inhlàn zoin Jehu chun vengtu sipaihai le an hotuhai kuomah, “Va lût unla, va that ro; tu khom insuo dêr naw ro” a ta. Chuongchun, kawlhnâmin an sàt hlum ta vong a. Vengtu sipaihai le an hotuhai chun an ruong chu an dèng suok a, chu zoah Baal tempul sungrila chun an lut a. 26 A sungrila Baal lim thingtum an phun chu an hung lak suok a, an raw a. 27 Baal lim lung an phunhai chu an vuok nawi vong a, Baal tempul chu an sukchim a, tu chen hin mihaiin inhnawmna hmunah an la hmang zing a nih. 28 Chuong ang chun Jehu chun Israel rama inthokin Baal biekna chu a sukbo a nih. 29 Sienkhom, Jehu chun Nebat naupa Jeroboam suolna, Bethel le Dan khuoa rangkachak bawngte lem biek chu a bàn chuong naw a, chu thil lei chun Israelhai chu thilsuol an thawtir zing tho.

30 LALPAN Jehu kuomah, “Ka mit tlung taka thil i thaw lei le ka dit dan anga Ahab sungkuohai chunga i thaw leiin i naupahai chu suon lina chenin Israel lalthrungphaah inthrung an tih” a ta. 31 Amiruokchu, Jehu chun LALPA, Israelhai Pathien dan chu a lungril po poin a zawm naw a, Jeroboamin Israelhai thil suol a’n thawtir anga inthawtir chu a bànsan chuong nawh.

32 Chuong lai chun LALPAN Israel ram chu a sukchìn tran ta a. 33 Aram lal Hazael chun Israel ram Jordan vadung sak tieng po po, sim tieng Arnon vadunga Aroer khuo chenin a hnê vong a, chu chun Gilead le Basan biel, Gad hnam, Reuben hnam le Manase hnamhai chengna a huom vong a nih.

34 Jehu inlal laia thil tlung danghai le a thilthaw le a hlen suokhai chu Israel lalhai inlal lai chanchin inziekna lekhabuah a chuong. 35 Jehu chu a thlatuhai kuomah a chawl a, Samaria-ah an phŭm a, a naupa Jehoahaz chun a lalna chu a hung hluo a. 36 Samaria khawpuia inthoka Israelhai chunga Jehu inlal sung chu kum sawmhni le kum riet a nih.