3 Kul lutna ding kotkhar bula chun phar pali an um a. Anni chun, “Ieng leiin am hi taka hin thi nghâkin ei inthrung zing ding a na? 4 Khaw sungah lut inla hlak khawpui an tràm leiin ei va thi tho awm si a. Hi taka hin inthrung zing inla hlak ei thi tho bok ding a na. Thaw ro, Aram sipaihai tieng tlu lut rok el ei tiu. An mi hlà leh dam ei ta, an mi that leh ei thi a ni el ding annawm” tiin an inbiek a.

5 Aram sipaihai inkulna hmuna fe ding chun thimbutin an inthok suok a. Aram sipaihai riebuk tontir an va tlung chun tu khom an lo um ta naw a. 6 Aram sipaihai chu LALPAN tawlailir ri dam, sakor ke pên ri dam, sipai tam tak ri dam a’n hriettir leiin, “Ngai ta u, Israel lal hin Hit lalhai le Aigupta lalhai ruoiin a mi hung bei an ta hi” an ta. 7 Chuongchun, an tho a, thimbutin an tlàn se ta a, an puon in hai, sakor hai, sabengtung hai le an riebuk chu a um pangngai charin an maksan a, an hringna humhim dingin an tlanse ta vong a.

8 Pharhaiin riebuk tontir an va tlung chun puon in pakhatah an lùt a, fain an dawn a, chu taka tangkaruo dam, rangkachak dam le silfen dam chu an làk a, an va thup hmang a. An hung kir nawk a, puon in dangah an lut a, chu taka thil umhai khom chu an làk a, an va thup hmang nawk a.

9 Nakie deu chun, “Eini thilthaw dan hi a’n dik naw top a nih. Voisun hin chanchin lawmum a tlung a, eini chauh a hretu ei ni a, hril loa khawvar chen ei nghak chun hrem tuok ei tih. Chuleiin, thaw ro, fe’ng ei ta, lal sungkuohai va hril ei tiu” tiin an inbiek a. 10 Chuongchun, khaw kul kotkhar vengtu chu an va ko khèk a, “Aramhai riebukah kan va fe a, tu khom an um ta dêr naw a, mihriem ri hrim hrim khom a um naw a, an sakorhai le sabengtunghai chu an inthlung a, an puon inhai khom a ngâi ngàiin a la um zing a nih” tiin an hril a. 11 Chu thu chu kotkhar vengtuhai chun an khèkpui a, lal in sunga mihai chu an va hril a.

12 Lal chu zana chun a tho a, a khawnbawlhai kuomah, “Aramhai mi thaw dàn hi hril ka ti cheu. Ei tràmzie hi an hriet a, chuleiin, ‘Khawpuia inthoka an hung suok pha a hringin lo man ei ta, khaw sungah ei lut ding a nih’ tiin rama inbiruk dingin an riebuk an suoksan a ni chu” a ta. 13 A khawnbawl laia pakhat chun, “Ieng le khaw leh, hi khawpuia chênghai hi a thi tahai chan ang bok chang hmabâk vong ei ni hi. Chuleiin, khawpuia sakor um sun panga hi thruoiin tuhai amanih tir inla, ieng thil am a tlunga ti enfie hrim hrim ei tiu khai” a ta.

14 Sakor tawlailir pahni le a hnuktu ding sakorhai chu an buotsai a, Aram sipaihai hnot dingin an tir a. Lal chun tawlailir khaltuhai kuomah, “Fe unla, ieng thil am a tlung va en fie ro” tiin thu a pêk a. 15 Anni chun Jordan vadung chen an va hnot a, an inhmaw taluo leia Aram sipaihaiin an silfen le thuomhnaw an peihai chu lampui intluonin a um zel zul a. An mi tirhai chu an hung kir a, thil umzie chu lal an hril a. 16 Chuongchun, mipui chu an inthok suok a, Aramhai riebuk chu an va rok ta mur mur a. LALPA thu ang ngeiin, beiphit dip kilogram thum chu sekel khat pei le barli beiphit kilogram ruk chu sekel khat peiin an zor a.

17 Chun ofisar, a kut innghaisana lalin a hmang kha kotkhar vengtuin lal chun a ruot a. Pathien mi ina lal a hung thlàk laia a lo hril tah ang khan, mipui inzi nuoi nuoi chun ama chu an chìl hlum ta dèr el a. 18 Lal kuoma Pathien miin “Zingah hieng ang hun vela hin Samaria khaw kul kotkhar bula hin beiphit indip thra tak chu kilogram thumah sekel khat pei le barli beiphit indip thra tak chu kilogram rukah sekel khat peiin zor an tih’ tia a hril ang charin a hung tlung a nih. 19 Chu ofisar chun Pathien mi kuomah, “LALPAN a van tukver a hong ding ni ta hrim sien khom, chuong ang chu thil thei a ni hliek ding am a ni?” a ti a nih. Pathien mi chun, “I mit ngeiin hmung i ta, fa ruok chu fa ve naw ti nih” a ti a. 20 Chu char chu a chungah a hung tlung a, kotkhàra chun mipuiin an chìl nuoi nuoi a, an chìl hlum tah a nih.