16
1 Baasa chungthua LALPA thu chu Hanani naupa Jehu kuomah a hung tlung a: 2 “Pilvuta inthokin ka lak suok che a, ka mi Israelhai thruoituah ka sie che a, sienkhom Jeroboam lam hraw bok chu i hraw ve a, ka mi Israelhai chu thil suol i’n thawtir a, an suolnahai chun ka lungsenna i cho phawk a. 3 Tu hin Baasa le a insung hi ka lem hmang trèp a, Nebat naupa Jeroboam le a sunghai ang khan ka siem ve tawl ding a nih. 4 Baasa sungkuo laia mi khaw sunga thi ta phot chu an ruong uiin fang an ta, ram hnuoia thi taphot chu chungleng vatehaiin tlàn an tih’ a ta.
5 Baasa inlal sunga thil tlung danghai, a thilthawhai le thil hlen suokhai chu Israel lalhai chanchin inziekna lekhabuah a chuong. 6 Baasa chu a thlatuhai kuomah a chawl a, Tirza khuoah an phùm a. A naupa Ela chun a lalna chu a hung hluo a.
7 Jeroboam ang boka LALPA mithmuah suol tinreng thaw a, a thil suol thawhaiin LALPA lung suksen a, Jeroboam sungkuohai a that fai vong bok leiin Baasa le a sunghai chungthuah LALPA thu chu zawlnei Hanani naupa Jehu hmangin a hung tlung a nih.
Israel lal Ela
8 Juda lal Asa inlala inthoka kum sawmhni le kum ruknaa chun Baasa naupa Ela chu Tirza khuoah Israelhai lalin a hung um a, kum hni sung a’n lal a. 9 A thoktu laia pakhat, a tawlailir zatve chunga hotua a siem Zimri chun a phierrùk a. Chuong lai chun Ela chu Tirza khuoah a um a. 10 Tirzaa a lal in enkoltu Arza inah zu a’n rui laiin, Juda lal Asa inlal kum sawmhni le kum saria chun Zimri chu a va lut a, a bei a, a that a, a lalna chu a hluo ta a.
11 A hang inlal tran a, lalthrungphaa a thrung phing leh Baasa sunghai po po chu a that vong a, a laichinhai le ruol thrahai laia pasal taphot chu hlà hrim a nei nawh. 12 Baasa sungkuo chungthua LALPA thu zawlnei Jehu hmanga a hril tah angin Zimri chun a that vong a. 13 Baasa le a naupa Ela thil suol thaw lei chun Israelhai chu thil suol inthawtirin, milim hmang lo an inbiektir a, chu chun LALPA Israelhai Pathien lungsenna an cho dok a nih.
14 Ela inlal sunga thil tlunghai le a thilthaw iengkim chu Israel lalhai inlal dan chanchin inziekna lekhabuah a chuong a ni naw am a ni?
Israel lal Zimri
15 Juda lal Asa inlala inthoka kum sawmhni le kum saria chun Zimri chu Tirza khuoah ni sari sung a’n lal a. Chuong lai chun sipaihai chu Filistinhai khuo, Gibethon bula chun an inkul a. 16 Zimriin phier ruka lal a that thu an inkulna hmuna inthoka Israelhaiin an hriet chun chu ni lá là chun an kawmandar Omri chu an riebuka chun Israel lal dingin an puong a. 17 Chuongchun, Omri le a kuoma um Israel mi po po chun Gibethon an suoksan a, Tirza an pan tung a, an inhuol a. 18 Khuo chu an lak ngei ding a nih ti Zimriin a hriet chun lal in kulbingah a tlan lut a, in chu a raw a, a kang hlum ta a. 19 LALPA mithmuah thil suol thaw a, a suol thaw lei le Jeroboam lampui a hraw ve leia Israelhai thil suol a’n thawtir leiin chuong ang chun a thi a nih.
20 Zimri inlal sunga thil tlung danghai le a thil phier ruk thuhai chu Israel lalhai inlal lai chanchin inziekna lekhabuah a chuong.
Israel lal Omri
21 Chuongchun, Israel mipuihai chu pawl hniin an inthre a, a zatve chun Ginat naupa Tibni chu lala siem tumin an zui a, a zatvein Omri chu an zui a. 22 Sienkhom, Omri zuituhai chun Ginat naupa Tibni zuituhai chu an hne a, Tibni chu an that a, Omri chu a hung inlal a.
23 Juda lal Asa inlala inthoka kum sawmthum le kum khatnaa chun Omri chu Israelhai chunga chun a’n lal tran a, kum sawm le kum hnih a’n lal a, Tirza khuoa an lal sung chu kum ruk a nih. 24 Chun, Semer kuoma inthokin Samaria tlang chu tangkaruo kilogram sawmsariin a’n chawk a, chu chu kulin a’n huon a, khawpui a siem a, a hmingah a tlang neitu hmasa Semer hming chawiin Samaria a’n puttir a.
25 Omri chun LALPA mithmuin thil thra lo tak a thaw hlak a, a hmaa mihai po po nêkin thil suol a thaw nasa bik a. 26 Nebat naupa Jeroboam thaw dan po po a lak a, Israelhai chu hmangna bo milim inbiektirin, LALPA Israelhai Pathien lungsenna chu an suol thaw chun an cho phawk a.
27 Omri inlal sunga thil tlung danghai le a thilthaw le hlen suok hai chu Israel lalhai inlal lai chanchin inziekna lekhabuah a chuong an naw am a ni? 28 Omri chu a thlatuhai kuomah a chawl a, Samariaah an phûm a. A naupa Ahab chun a lalna chu a hung hluo a.
Israel lal Ahab
29 Juda lal Asa inlala inthoka kum sawmthum le kum rietnaah Omri naupa Ahab chu Israelhai chungah a’n lal tran a, Samaria khuoa inthokin kum sawmhni le kum hni Israelhai lalah a um a. 30 Omri naupa Ahab chu a hmaa mihai po po nêkin LALPA mihmuin thil fel lo tak a thaw hlak a. 31 Nebat naupa Jeroboam suolna ang thaw vetuhai chu iengma loa ngai ni awm takin Sidon lal Ethbaal naunu Jezebel chu nuhmeiah a nei a, Baal rong bawlsanin a biek ve el ta a. 32 Samari khuoah Baal in a bawl a, chu taka chun maichàm a siem a. 33 Chun, pathiennu Asera limhai chu a siem a, a hmaa Israelhai lal po po nêk khomin LALPA, Israelhai Pathien lungsenna chu a cho phawk nasa lem a nih.
34 Ahab inlal laiin Bethel mi Hiel chun Jeriko a bawl thra a. LALPAN Nuna naupa Josua hmanga a lo hril tah angin, a lungphum chu a nau lutir Abiram chânin a phùm a, a kul kotkharhai chu a nau tlum tak Segub chânin a’n din bok a nih.