Judai rama inthoka Pathien mi
13
1 Maichama Jeroboamin thilhlan inhlàn dinga a ngir lai chun LALPA thuin Judai rama inthokin Bethela chun Pathien mi a hung a. 2 LALPA thuin maicham chu a’n riem khum a, “Aw maicham, maicham, LALPA chun, ‘Ngai ta, Davida sungkuoa inthokin a hming Josia hung pieng a ta, i chunga milim pathien kuoma rimtui raw hlaktu thiempuhai chu la hung sàm a ta, i chunga hin an ruhai leh a la hung raw ding a nih’ a tih” tiin. 3 Chun, chu ni vek chun inchikna a pêk a: “Hi hi inchikna dinga LALPA thu puong chu a nih: maichàm hi koi phok a ta, a chunga meivap hi inbaw vong a tih” a ta.4 Pathien miin Bethela maicham a’n riem khum lai ri lal Jeroboamin a hriet chun “Man ro” a ta, maichàma inthok chun kutin a hang ban a. Man tuma a banna bân chu a’n kon nghal a, a lak kìr thei ta naw a. 5 Maichàm chu a’n phel phok a, LALPA thua Pathien miin inchikna a pèk ang khan, meivap chu a’n baw ta vong a. 6 Lal chun Pathien mi kuomah, “Ka bân hi a hung thrat nawk theina dingin LALPA i Pathien kuomah trongtraiin mi hnipêk rawh” a ta. Chuongchun, Pathien mi chun a hnipek a, lal kut chu a hmaa ang bokin a hung pangngai nawk ta a.
7 Lal chun Pathien mi kuomah, “Ka in tieng ka kuomah hung la, bu dam fa la, thilpêk khom peng ka ti che” a ta. 8 Pathien mi chun lal kuomah, “I thil nei po po zatve mi pe ding ni la khom i inah hung naw ning. Hi hmuna hin bu fain tui dawn bok naw ning. 9 LALPA chun, ‘Ieng khom fain i dawn ding a ni naw a, i hungna lampui hrawin i hung kir nawk ding a ni bok nawh’ tiin thu a mi pèk a nih” a ta. 10 Chuongchun, Bethela a hungna lampui chu hraw ta loin lam dangah a kîr a.
Bethel zawlnei putar
11 Bethela chun zawlnei putar pakhat hi a um a, a nauhai chun chu nia Bethela Pathien mi thilthaw po po le lal kuoma a hril chu a kuomah an hril sawng a. 12 An pa chun, “Khaw tieng lam am a hraw a?” a ta, a nauhai chun Judai rama inthoka hung Pathien mi kìrna tieng lam chu an kawkhmu a. 13 A nauhai kuoma chun, “Sabengtung mi buotsaipek ro” a ta, an buotsai a, sabengtung chunga chun a chuong a. 14 Pathien mi chu a hnot zui a, saisaw thing hnuoia a lo chawl lai chu a hnot phak a, a kuomah, “Judai rama inthoka hung Pathien mi chu i ni maw?” a ta, ama chun “Ni e” a ta.
15 Zawlnei chun, “Ka inah hung la, bu dam hung fa raw khai” a ta. 16 Pathien mi chun, “Kîrin nang ka zui thei naw che a, hi hmuna hin fain ka dawn thei bok nawh. 17 LALPA thu chun, ‘Chu taka chun bu fain tui i dawn ding a ni naw a, i va fena lam pangngaia chun i hung kir nawk ding a ni bok nawh’ tia hril ka ni si a” a ta.
18 Zawlnei putar chun, “Nangma ang boka zawlnei ka ni ve hi. Vantirkoin ka kuomah “Faa a dawn theina dingin i in tieng hung thruoi kir nawk rawh’ tiin LALPA thu chu a mi hril a nih” tiin thukhêl a hril a. 19 Chuongchun, Pathien mi chu a in tieng a kirpui a, a ina chun fain a dawn a.
20 Chuonga dawkan kîla an thrung lai chun a thruoi kirtu zawlnei putar kuoma chun LALPA thu a hung tlung a. 21 Judai rama inthoka hung Pathien mi kuoma chun, “LALPA thu chu hieng ang hin a hung tlung a, ‘LALPA thu kalin, LALPA i Pathien thupêk chè chu i zawm naw a, 22 i hung kir nawk a, faa dawn dêr lo dinga a tìna che hmuna ngei chun bu faa tui i dawn leiin, i ruong chu i thlatuhai zàlna hmunah phùm ni ve naw nih’ tiin fie takin a hril a nih” a ta.
23 LALPA miin faa a dawn zo chun a hung thruoi kirtu zawlnei chun sabengtung a buotsaipek a. 24 A hang fe chu lam lakah sakeibaknei leh an intuok a, a lo se hlum a, a ruong chu lampuia chun a thalin a zâl a, a ruong sir khing tieng chun sabengtung chu a ngir a, khing tieng panga chun sakeibaknei chu a ngir ve zing bok a. 25 Chun, chu lam hung hraw mi threnkhatin lampuia ruong zâl le a bula sakeibaknei ngir zing an hmu thu chu zawlnei putar umna khuoa chun an va hril a. 26 Lam laka va thruoi kirtu zawlneiin chu thu a lo hriet chun, “Pathien mi, LALPA thu awi nuom nawtu kha a ni chu. LALPA thuin a hril angin, LALPAN sakeibaknei kutah a pêk a, a lo thràm a, a se hlum a ni chu” a ta.
27 A nauhai kuoma chun, “Sabengtung mi buotsaipek ro” a ta, an buotsaipek a. 28 Chuongchun, a fe a, lam laia a thala ruong zâl le a bula sakeibaknei le sabengtung ngir zing chu a va hmu a, sakeibaknei chun ruong chu a la fak naw a, sabengtung khom chu ieng khom a law bok nawh. 29 Chuongchun, zawlnei chun Pathien mi ruong chu a’n hlawm a, sabengtung chunga chun a hlàng kai a, a kirpui a, zawlnei putar khuoa chun sûn ding le vûi dingin a lutpui a. 30 Chun, ruong chu ama thlânah a’n zaltir a, “A va poi ngei de aw, ka unaupa” tiin a tra a.
31 A vui hnung chun a nauhai kuomah, “Ka thi pha chu Pathien mi zalnaa hin mi hung phûm ve un la, a ru bula hin ka ruhai hung inzaltir ve ro. 32 Pathien thua Bethela maicham le Samari ram khawpui hmunsânga in po pohai a’n riem khumna thu kha a hung tlung indik ngei ngei ding a ni si a” a ta.