Tempul bawl dingin an buotsai
5
1 Tura lal Hiram chun Solomon chu a pa Davida thlaktua lala hriek nàl a ni tah ti a lo hriet chun, Davida le inngaina taka lo khawsa hlak a ni leiin Solomon kuomah palai a tir a. 2 Solomon chun hieng thu hi Hiram kuomah a thon a: 3 “Ka pa Davida kha a sè vèl kil tina mihai leh indoa a buoi leiin le a ke hnuoia a hmêlmahai LALPAN a sie vong hmâ khat chun LALPA a Pathien hming chawitu ding Tempul a bawl thei nawh ti i hriet a. 4 Tu ruok hin chu LALPA ka Pathienin sîr tinah muongna a mi pĕk a, hmêlma amanih le siet tuok amanih khom a um ta nawh. 5 LALPAN ka pa Davida kuoma, “I aia lala ka sie ding i naupa chun ka hminga ding Tempul chu hung bawl a tih’ tia a lo hril tah angin, LALPA ka Pathien ta ding Tempul bawl ka tum a. 6 Chuleiin, Lebanon tlanga mi sidar thinghai kha mi phûrpek dingin thu pe la, ka mihai chu i mihai lai thrang ve’ng an ta, i mihai hlaw chu i ti zât zàt peng ka tih. Sidon mihai tluka thing phŭr thiem ka mihai lai tu khom an um nawh ti i hriet si a” tiin.7 Hiramin Solomon thu inchà a lo hriet chun a lawm hle a, “Hi hnam ropui tak chunga rorêltu ding nau var Davida kuoma petu LALPA chu voisun hin inpâkin um raw se” a ta. 8 Chuongchun, Hiram chun Solomon kuomah, “I thu mi hung inchà kha ka lo hriet a, sidar thing le fâr thing chu i mamaw ang ang hung pe’ng ka ti che. 9 Ka mihaiin Lebanon tlanga inthokin tuipuiah hung tol thla’ng an ta, thakna ding hmun i tiná nàah pŭmin hung intol thlaktir ka ta, chu taka chun sût an ta, i lo lâk pei ding a nih. Nang khomin ka sungkuohai hi fak ding pein ka insung mamaw i lo phuhrŭk ve ding ni naw nim” tiin thu a thon a.
10 Chuong ang chun sidar thing le fâr thing chu Solomon mamaw ang peiin Hiram chun a pêk a. 11 Solomon khomin Hiram le a sungkuohai fak dingin huit beiphit metric ton sanghni le oliv hriek thra chi litar nuoi li a thon a, chu chu kum tina Solomonin Hiram a pĕk hlak dàn chu a nih. 12 LALPAN a tiem angin Solomon chu varna a pêk a. Hiram le Solomon chun inlaichinna thra tak neiin an inkărah inremna thu an thlung a.
13 Lal Solomon chun Israel ram sungah sinthawa sor lui mi singthum a nei a. 14 Chuonghai chu thla khat peia inthlâk dingin trum khatah mi singkhat pei Lebanon-ah a tir a, thla khat zoah an hung kìr a, thla hni sung anni in tieng an um a. Chuonga sinthawa sor luihai inrawituhai hotu chu Adoniram a nih. 15 Tlangrama chun Solomonin thil phurtu mi singsari le lung sertu mi singriet a sor a. 16 Chuonghai baka chun sinthawhai inrawia an sinthaw keihruoitu mi sangthum le zathum a nei bok a. 17 Lal thupêkin lung làknaa inthokin lung thra le lien tak tak, a chunga lung an serhai remna ding le tempul thruta hmang dingin an hung lak a. 18 Solomon le Hiram mistirihai le Gebal mihai chun lunghai chu serin, thinghai chu an ăt a, Tempul bawlna dingin an buotsai a.