7 Solomon chun Israel ram pumpui chu biel sawmpahniin a thre a, biel tinah enkoltu lârsap a sie seng a, chuonghai chun lal le a sungkuohai fak ding an ngaituo a, kum khata larsap tin mawphurna chu lal le a sungkuohai thla khat tlâk ding ngaituo a nih. 8 Chuonghai hming chu: Efraim tlangramah Ben-Hur; 9 Makaz hai, Salbim hai, Bet Semes hai le Elon Bethanan khuo haiah Ben–Deker; 10 Arubot bielah (Sukot le Heber khom huom sain) Ben-Hesed; 11 Nafot Dor bielah Solomon naunu Tafat pasal Ben-Ahinadab; 12 Tanak khuo, Megido khuo, Jezreel phai monga Zarethan khaw bula um Beth Sean biel po po, Beth Sean-a inthoka Jokmeam rala um Abel Mehola khuo chenin Ahilud naupa Baana; 13 Ramot-Gilead khuoah Ben-Geber (ama chun Manase naupa, Gilead a um Jair lobuk po po hai, Basana Argob biel po po le kula inhuon, kul kotkhara dar tluon hmang khaw ropui tak tak sawmruk chu a chang sa a nih); 14 Mahanaim-ah Iddo naupa Ahinadab; 15 Nafali-ah Solomon naunu Basemat pasal Ahimaz; 16 Aser le Alot bielah Husai naupa Baana; 17 Isakar bielah Parua naupa Jehosafat; 18 Benjamin bielah Ela naupa Simei; 19 Gilead biel (Amorhai lal Sihon le Basanhai lal Og ram po poah) Uria naupa Geber a nih.

Hienghai po po baka hin a ram pum chunga hotu pakhat a um.

20 Judahai le Israelhai chu tuifinriet kama phaiphin anga tam an hung ni ta a, an fakin an dawn a, hlim takin an um a. 21 Eufretis vadunga inthoka Filistinhai ram chen le Aigupta ramri chena ram po po chungah Solomon chun ro a rĕl a, an lalhai chun a kuomah sie an hung chawi hlak a, a dam sung po po chu a khuo le tui an nih.

22 Solomon ni khat khorsaw chu beiphit indip tak kilolitar sangnga le beiphit pangngai litar singkhat; 23 bawngchal, ina chawm thau sawm, bawngchal hlobeta chawm thau sawmhni, beram le kĕl zakhat; chu baka chun sakhi, sangai, sakhi chal le ar thau tak tak hai leh. 24 Solomon chu Eufretis vadung thlang tieng ram po po, Tipsaa inthoka Gaza chena lal a ni a, a sè vèla ramhai po po leh inrem takin an khawsa a. 25 Solomon dam sung po chun Dana inthoka Beersheba chena inzâr Judahai le Israelhai chu mani grep huon le theichang bilah muong takin an khawsa a.

26 Solomon chun tawlailir hnûktu sakor siena in sangli le sakor singkhat le sanghni a nei a. 27 Biel tina lârsâphai chun an thaw hun dinga ruot thla senga chun Solomon ta ding le a dawkana kîltuhai po po fak ding khorsaw an hung pêk a, pèk kim lo an nei ngai nawh. 28 Mi tinin an thaw zàt dinga bituk ang pei chu a siena dinga ruot hmuna chun sakor tawlailir hnûktu sakorhai le sakor danghai fak dingin barli le bupawl an hung sie bok hlak a.

29 Pathienin Solomon chu varna le sungril mit varna inthuk tak le thil hriet thiem theina zâu tak, tuifinriet kama tiem seng lo trieuvut anga tam a pêk a. 30 Solomon varna chun khawsak mihai varna po po le Aigupta mihai varna po po khom a khûm vong a. 31 Mi po po nêkin a var lem a, Ezra mi Ethan le Mahol nauhai Heman hai, Kalkol hai le Darda hai nêk khomin a var lem a, a hming chu an sè vèla hnam po po lai an thang ta hle a. 32 Thuvar sangthum a hril a, hla sangkhat le panga a phuok bok a. 33 Thing le ruo le hna nei chi hrim hrim chanchin dam, Lebanon tlanga sidar thinga inthoka kul banga hung tro suok husop chanchin dam chenin a hriet hnê hle a; sa le vate chanchin dam, bokvâka invâk chihai chanchin dam le nga chanchin dam mi a hril hlak a. 34 Khawvela lalhai, Solomon varzie chanchin hre phak taphot chun a varna thu ngaithla dingin a kuomah mi an hung tir a.