Davida hnèna hlaa
22
1 A hmêlmahai po po kuta inthok le Saula kuta inthoka LALPAN a san suok leiin Davida chun LALPA kuomah hi hla hi a sak a:2 LALPA chu ka suonglungpui,
Ka kulpui le sanhimtu,
3 Ka Pathien, ka suonglungpui,
Ka’n bikna hmun le ka phaw,
Mi’n tlantu ki hrêu a nih.
Ama chu ka kulpui nghet,
Ka’n bikna le ka himna,
Pawngnêktuhai laka inthok,
Mi san himtu chu a nih.
4 Inpâk tlàk LALPA ka ko a,
Hmêlma lakah a mi humhim.
5 Thina tuifawnin a mi’n huol,
Sietna tuiin a mi chìm vel;
6 Thlàn hruolhruiin a mi vĕt a,
Ka hmasuon thina châng a nih.
7 Lungzingin LALPA ka ko a,
Ka Pathien thrangpuina ka ngĕn;
A tempula inthokin a hriet,
Ka trap riin a nâ a tlung.
8 Hnuoi chu inhnîngin a’n thin a,
Tlâng thruthai chen an inhnìng a,
A lungsen leia inhnîng a nih.
9 A hnârah meikhu a suok a,
A baua chun kanghmang thei mei,
Chokin a’n hlap puot puot a.
10 Van kei kûrin a hung trum a,
Sûm dum chungah a ngîr a,
11 Cherub chungah a chuong a,
Thli chu thla zara hmangin,
Hrât takin a hung vuong a.
12 Tuomtuah thim a hmang a,
Sum tui pai inthim khup chu.
13 Ama vara inthok chun,
Kawl a hung inphe zuoi zuoi.
14 LALPAN vanriel inrûmtirin,
Chunghnungtak rawl a thangkhawk.
15 A thal chu a hang kăp a,
Hmêlmahai an tlăn dar a,
Trêk a’n tlaktir dum dum a,
Anni chu a hnĕ zo tah.
16 Aw LALPA, hnâr hnît meu a,
I hang hrăwk tawl takzet chun,
Va truonghai inlang râwtin,
An hung kang zo ta vong a,
Hnuoi thruthai khom a’n lang tah.
17 Chunga inthok mi zuk banin,
A kutin a mi hung chel a,
Li-a inthok a mi làk suok;
18 Hmêlma hràt le doral hrânghai,
Ka cho ruol lo kut a’nthokin,
A mi hung san suok tah a nih.
19 Siet tuok lai mi bei sienkhom,
Mi santu chu LALPA a nih.
20 Muongleiah a mi sie a,
Ka chungah a lawm leiin,
A mi san suok tah a nih.
21 Ka’n dikna phuin lawmman,
LALPAN a mi siempek a,
Ka kut a fai ang phuin,
Ama chun a mi rul hlak.
22 LALPA ditzawng ka vong a,
Pathien invâk hmangsanin,
A kal zawng ka thaw ngai nawh.
23 Ka hmaah a dàn ka sie,
A thu ka bawsiet ngai nawh.
24 A hmaah dem kai lo din,
Suol lakah ka’n thier fihlim.
25 Ka’n dikna ang phû peiin,
A mit hmuah poi ieng khom,
Ka tawk ve ngai naw leiin,
LALPAN lawmman a mi pek.
26 Ringum lakah i ringum,
Mi fel lakah i fel fai;
27 Thienghlim lakah i thienghlim,
Mi kawi lakah i khir bok.
28 Inngaitlawmhai i san a,
Meng sânghai i suktlawm hlak.
29 Ka khawnvar i nih, Aw LALPA,
LALPA chun ka nun thim hi,
A mi elvarpèk hlak si.
30 I thrang chun râl nêr ka ta,
Ka Pathien zârin an kul bang,
Lawn kaiin lapêk ka tih.
31 Pathien lampui a thra kim,
LALPA thutiem a’n khêl nawh,
A bêltu ta di’n phaw a nih.
32 LALPA naw Pathien tu am,
Ei Pathien naw tu hrim am,
Lungpui bêl tlak an um a?
33 Hrâtna thaa mi’n thuom a,
Ka lampui suktluongtu chu,
Pathien hi a ni si a.
34 Sazuk zaper anga hrât,
Zaper tha hrât mi pein,
Hmun sang lêrah him takin,
A mi’n tlattir hlak si a.
35 Ka kut râl do a’n thiemtir,
Dâr thalngul ka kuoi kûr thei.
36 Sandamna phawb mi pein,
I kut changa mi chelin,
I’n phà hnuoina lei chauin,
Ropui ka hlaw phà hlak si.
37 Ka lam hraw i mi zaupek,
Ka sir a’n tlêu nawna di’n.
38 Ka hmêlmahai ka hnot khêl,
Ka’n ram hmâ khat ka kîr nawh.
39 Ka vuok thluk tawl, an op song,
Ka bulah an tlu thal phung.
40 Raldo hrât di’n mi’n thuomin,
Ka râlhai ka ke bulah,
I’n bokkhuptir tawl si a.
41 Ka râlhai i mi’n hnottir a,
Ka hmêlmahai ka tukdol tah.
42 Santu koin an khêk chŭl,
Tu khom hlak an um si nawh;
LALPA an ko, a don nawh.
43 Thli fen thei pilvut angin,
Anni chu ka rawt nawi a,
Kotthlêra chirhak angin,
Ka sir sop tawl tah a nih.
44 Hmelma lakah mi humin,
Hnamhai lu-ah i mi siem a,
Ka hriet ngai lo hnam chen khom,
Ka khuo le tui an hung ni tah.
45 Ka thu hrea zawm nghâlin,
Bokkhupin ram dang mihai,
Ka hmaah an hung kŭn a,
46 An lungril a zâm vong a,
Kul a’nthok inthin pumin,
An hung suok dok thrâm thrâm a.
47 LALPA chu a hring zing ie!
Ka Lungpui chu inpâk ro!
Ka Sandamtu Pathien chun,
Chawimawina chu chang raw se.
48 Phuba lapektu Pathien,
Ka hnuoia hnamhai sietu,
49 Hmêlma laka mi humtu,
Ka hmêlmahai chunga chun,
Nangman i mi hlăngkai a,
Mi nunrawnghai laka chun
Nangin i mi san suok tah.
50 Chuleiin, hnam tin lai hin,
LALPA i hming chawimawiin,
I’n pâkna hla sak ka tih.
51 A lal chu hnĕna ropui,
Ama chun a’n changtir a,
A hmangaina chuoi lo chu,
A hriek nâl Davida le
A suon le pârhai chungah,
Kumkhuo’n inlangtir a tih.