5 Joab chu lal inah a fe a, a kuomah, “Voisun hin nang le i naunu le naupahai le i nuhmeihai le i hmeihai hringna sansuoktu, i mihai po po i sukhmaimawk a nih. 6 A theidatu che i hmangai a, a hmangaituhai che i theida a. I kawmandarhai le i mi le sahai hi i ta dingin ieng khom an lo ni nawzie voisun hin i tar lang chieng hlĕ a nih. Mi dang po thi hai sien khom Absalom a dam phot chun i hlim tho dingzie ka hmu tah. 7 Tu hin tho la, va suok la, i mihai va chokphŭr rawh. LALPA sâlin ka hril hi, i va fe suok naw chun voizan hin mi pakhat khom i kuoma um hmu ta naw ti nih. Chu chu i tleirawl laia inthoka tu chena i chunga vangduoina hung tlung po po laia a zuolkai tak ni’ng a tih” a ta.

8 Chuongchun, lal chu a tho a, kul kotkhara chun a’n thrung a, “Ngai ta u, lal chu kul kotkharah a’n thrung” tiin mihai an hril dar a, an rêngin lal hmaa chun an hung a. Israelhai ruok chu an in tieng seng an tlăn kir nawk ta a.

9 Hmun tinah Israel thlahai lai nasa takin an insêl a, “Lal chun ei hmĕlmahai laka inthokin a mi sanhim a, ama chu Filistinhai kuta inthoka mi sansuoktu a nih. Sienkhom tu hin Absalom leiin a tlân hmang ta a. 10 Ei chunga lal dinga hriek ei năl Absalom hlak chu indonaah a thi ta bok si a. Iengti leia lal ko kîr thu hi bau khat khom in hril puok naw ama na?” an ti sup sup a.

11 Lal Davida chun thiempu Zadok le Abiathar hai kuomah thu a thon a, “Juda upahai kuomah hieng hin hril ro: ‘Israel mihaiin lal thruoi kir ding thu an hril chun lal kuom a tlung ta si a, ieng dinga nangni hi a in tienga lal thruoi kir ding thua a vuoicha taka thrang in tum am a na? 12 Nangni hi ka unauhai, ka taksa le thisen inzompui ni bok si a, ieng leiin am lal thruoi kir thuah a awisawt tak ni in tum?’ tiin. 13 Chun, Amasa kuomah, “Ka thisen inzompui i ni naw am a ni? Tuta inthoka Joab aia ka sipai kawmandarah ka siem naw che a ni chun Pathienin a law law mi law sien la, chu nêka nasa khom chun mi thaw raw se’ a tih va ti rawh” tiin mi a tir a.

14 Chu thu chun Judahai lungril a hne a, lungril hmunkhat an hung put ta a. Lal kuoma chun, “I mihai po po le khan hung kir nawk ta ro” ti dingin mi an tir a. 15 Chuongchun, lal chu a hung kîr nawk a, Jordan vadung a hung tlung a. Lo hmuok a, lal chu Jordan vadunga thruoi kai dingin Judahai chu Gilgalah an hung a. 16 Bahurim khaw mi, Benjamin hnama mi Gera naupa Simei khom chu Juda mihai le chun Lal Davida hmuok dingin inhmaw takin a hung thla ve a. 17 Simei chun Benjamin mi sangkhat le Saula sunghai siehlaw Ziba le a naupa sawm le panga le a siehlaw sawmhni a hung thruoi a, Jordan kama lal umna tieng kai chu inhmaw takin an pan a. 18 Lal sungkuohai thruoi kai ding le lalin a ti ang ang thaw dingin ral khing tieng kaia chun an kai a.

19 Gera naupa Simeiin Jordan ral a kai chun lal hmaah a bokkhup a, a kuomah, “Ka lalpa chun thiem naw changah mi sie naw hrâm raw se. Ka lalpa, ka puin Jerusalem a suoksan nia i siehlaw thil thaw suol kha mi hre pêk zing loin, lal chun a lungrilah pai zing naw sien. 20 I siehlaw hin thil suol ka thaw ti ka hriet a, chuleiin voisun hin Josefa sungkuo laia ka lalpa, ka pu hmuok dinga hung thla hmasa tak ka ni nghé nghè a nih” a ta.

21 Zeruia naupa Abisai chun, “LALPA hriek năl, trongsie inphurtu Simei hi sukhlum ding a ni naw am a ni?” a ta. 22 Davida chun, “Nangni Zeruia naupahai, nangni mi lo hrietpek ding ieng am a um a? Voisun hin a mi dotuhai in ni naw am a ni? Voisun hin Israelhai laia mi hrim hrim sukhlum ding an ni am a ni? Voisun hin Israel mihai chunga lal ka ni hi ka hriet naw am a ni?” a ta. 23 Chun, lal chun, “Simei, thi naw top i tih” tiin a kuomah thu a’n khàm a.

24 Saula tupa Mefiboset khom chu lal hmuok dingin a hung thla ve a. Ama chun lal a fe suok nia inthoka him taka a hung kir nawk ni chenin a kehai a tuoi nam naw a, a hner hmul a vaw naw a, a silfen khom a sawp bok nawh. 25 Jerusalema inthoka lal hmuok dinga a hung thla chun lalin, “Mefiboset, ka kuomah ieng dinga i hung ve naw?” a ta. 26 Ama chun, “Aw lalpa, ka pu, i siehlaw hi kebai ka ni leiin ka sabengtung chungah chuongin lal chu zui dinga inngai ka ni a, sienkhom ka siehlaw Ziba-in a mi hlĕm a. 27 Ka lalpa, ka pu kuomah i siehlaw hi a hêk bok a, sienkhom ka pu hi Pathien vantirko ang a ni leiin thra i ti ang angin thaw rawh. 28 Ka pu Saula thlahai po po chu ka lalpa, ka pu hmaa hin sukhlum vong ding an ni lai zingin i siehlaw hi thlaithleng i otpuihai lai i mi’n thrangtir a. Chuleiin, lal kuoma hin thil dang phût ngam ziezang ding awm ka la ni rop am a ni?” a ta.

29 Lal chun a kuomah “Hril tam iem a ngai a? Nang le Ziba-in ram chu insem dingin thu ka pêk cheu” a ta. 30 Mefiboset chun lal kuomah, “Amain nei vong raw se; lalpa, ka pu chu him takin a hung tlung ta si a” a ta.

31 Gilead mi Barzilai khom lal chu Jordan thruoi kâia a panna ding tienga inthla liem dingin Rogelama inthokin a hung thla a. 32 Barzilai chu upa tak, kum sawmriet mi zet a ni ta a. Mahanaim-a lal a um sungin a fak dinghai a lo tum a, mi neinung tak a nih. 33 Lal chun Barzilai kuomah, “Ka kuomah Jerusalem tieng hung kai ve la, ka chawm ding che annawm” a ta.

34 Barzilai chun lal kuomah, “Ieng chen am dam ding ka la ni a, Jerusalema lal kuoma ka hang fe vena ding chu? 35 Tu hin kum sawmriet ka ni ta a, a sie a thra thlier dukdak thei khom ka ni ta’m a ni? I siehlaw hin a fak a dawn inhnik le inhnik naw khom ka hriet hrang ta’m a ni? Pasal le nuhmei hla sak khom hre thei am ka la ni? Ieng leiin am i siehlaw hi ka lalpa phurrik belsatuah ka thrang ding a na? 36 I siehlaw hin lal kuomah Jordan kai ve ka tum chauh a nih. Ieng dingin am lal chun chuong ang lawmin thrat man a mi rul kher ding? 37 Lunginsiet takin i siehlaw hi mi’n kirtir nawk la, ka nu le pa thlan umna keini khuo ngeiah thi veng ka tih. Amiruokchu, en ta i siehlaw Kimham hi, lalpa, ka pu kuomah fe ve sien, a chungah thra i ti ang peiin thaw raw khai” a ta.

38 Lal chun, “Kimham chu ka kuomah kai ve’ng a ta, thra i ti ang peiin a chungah thaw’ng ka ta, thil ieng khom a mi hni taphot chu thawpêk pei ka tih” a ta. 39 Chuongchun, mipui po po chun Jordan ral an kai a, chu zoah lal khom chu a kai ve a, Barzilai chu a fawp a, mal a sawm a, ama hmun tieng a kir nawk ta a. 40 Lal chu Gilgalah a kai a, Kimham chu a kuomah a kai ve a. Juda sipaihai po po le Israel sipai a zatve chun lal chu an thruoi a.

41 Sawt nawte hnunga chun Israel mi po po chu lal kuomah an fe a, a kuomah, “Iem a ta kan unau Judahai hin an pumbil bik che a, lal le a sunghai le Davida mihai po po khom Jordan ralah an thruoi kai sa vong am a na?” an ta. 42 Juda mihai chun Israel mihai kuomah, “Lal chu kan inhnaipui a ni lei a nih. Ieng leia hi thila hin in lung a sen am a na? Lal thil nei hi ringa khawsa am kan ni? Keini ta dingin lal thil nei ieng am lak kan nei ta hlak a?” an ta.

43 Israel mihai chun Juda mihai kuomah, “Lal laka kan chan hi chan sawm a na, chu bakah Davida hi nangni nêka hauh thei lem dai kan nih. Ieng leia hmusit taka in mi thaw am a na? Lal thruoi kir nawk thu hi a rot hmasa lemtu kan ni naw am a ni kha?” an ta. Juda mihai hlak chu Israel mihai nêka trong inrum lemah an thrang a.