3 Davidan a lal in a tlung chun in enkol dinga a maksan a hmei sawmhai chu a thruoi a, vengtu hnuoiah ripah a khum a, an fak le dawn a tumpek a, sienkhom a zàlpui ta naw a, hmeithai anga khawsain an thi chenin a khum tawl ta a.

4 Chun, lal chun Amasa kuomah, “Juda mihai ko khawm la, ni thum sungin nang leh hi taka hin hung inlang ro” a ta. 5 Amasa chu Judahai ko khawm dingin a fe a, sienkhom lalin hun a ruotpek nêkin a thang sawt a. 6 Davida chun Abisai kuomah, “Bikri naupa Seba hin Absalom nĕkin ei poi a tawk nasa lem ding a nih. Chuleiin, i pu mihai hi thruoi la, hnot ro khai; chuong naw chun kul nei khuoa dam lut hman a ta, ei kuta inthokin suok hlauh rawi a tih” a ta. 7 Chuongchun Joab rawihai, Keret mihai, Pelet mihai le an mi hrathai po po chu Abisai inrawina hnuoiah Bikri naupa Seba hnot dingin Jerusalema inthokin an inthok suok a.

8 Gibeon lungpui umna an va tlung chun Amasa-in anni chu a lo hmuok a. Chun, Joab chun a ralthuom a hâk a, a chungah kawlhnâm, a pâi chopin a kawngchùnah a pâi a, a hang lawn chun a kawlhnâm chu a pâia inthokin a hung indok a. 9 Joab chun Amasa kuomah, “Unaupa, i dam de maw?” a ta. Joab chun Amasa chu fawp dingin a kut chang tiengin a khakhmulah a chel a. 10 Amasa chun Joab kawlhnàm chawi chu a lo ringhla naw a, Joab chun a phingah a sun a, a rîl chu hnuoiah a dawk thla pŭr a, sun non loin a thi ta nghal a. Chu zoah Joab le a unaupa Abisai chun Bikri naupa Seba chu an hnot ta a.

11 An bula ngir Joab rawihai laia tlangval pakhat chun, “Joab tieng le Davida tienga thrang taphot chun Joab zui pei ro” a ta. 12 Lam lailung takah ama thisena inbuol Amasa hmu taphot chu an chawl chat pei ti tlangval chun a hmu leiin a ruong chu lamliena inthokin phŭlah a hnûk phei a, puon a’n khum a. 13 Lamliena inthoka Amasa ruong a son hnung chun Bikri naupa Seba hnot dingin mi po po chun Joab chu an zui a.

14 Seba chun Abel le Bet Maaka chena Israel hnamhai chu a sir bakah Ber mihai biel khom a sir a, chuongchun mihai chu an pung khawm a, ama chu an zui ta a. 15 Joab sipaihai chu an hung a, Seba chu Bet Maaka-ah an inhuol a. Kul bang hrŭlah a vêl tuokin hnuoi an deng pawng a, kul chu sukchim tumin an sut bur bur a. 16 Khuoa inthok chun nuhmei var pakhat hi a hung khêk a, “Joab kha hung ko unla, a kuomah thu lo hril ka tih” a ta. 17 A kuom chu a va pan hnai a, nuhmei chun, “Joab i ni maw?” a ta, ama chun, “Ni e” a ta. Ama chun, “I bawinu thu hril hi ngaithla rawh” a ta, Joab chun, “Ka ngaithlak annawm” a ta. 18 Nuhmei chun, “Tien lai chun, ‘Abel khuoah i zawna donna chu va la rawh’ an ti hlak a, chuong ang chun thu an suktawp hlak. 19 Keini hi Israel mihai laia inremna dit pawl le ringum pawl kan ni a, nang chun Israelhai khuo, khaw bulpui hi suksiet i tum a ni hi. LALPA ro chu ieng dinga sukram i tum am a na?” a ta.

20 Joab chun, “Chuong ang chu a ni awzawng nawh, sukram amanih suksiet amanih kan tum naw hrim hrim. 21 Chuong ang tieng chu a ni nawh. Efraim tlangrama mi Bikri naupa a hming Seba chun lal dodalin, Davida lakah kut a lek a, ama chu mi pe suok unla, in khuo hi suoksan el kan tih” a ta. Chu nuhmei chun Joab kuomah, “Ngai ta, a lu chu kula hin hung deng thlapèk kan ti che” a ta. 22 Nuhmei chun var takin mipui chu a va’n hmin a, Bikri naupa Seba lu chu an tan a, Joab umna tieng chun an dêng thlâk a. Chuongchun, tawtawrawt a mût a, mani in tieng seng panin khuoa inthok chun an suok dar a. Joab chu lal kuom tieng Jerusalemah a kir nawk ta a.

23 Joab chu Israel sipai po po chunga hotu a na; Jehoiada naupa Benaia chu Kerethai le Pelethai hotu a na; 24 Adoniram chu sinthawa an sor luihai hotu a na; Ahilud naupa Jehosafat chu chanchin inchiktu le ziektu a na; 25 Seva chu ziektu a na; Zadok le Abiathar chu thiempu an na; 26 Jair mi Ira chu Davida thiempu a nih.