3 Nisienlakhom, mipuihai chun, “Fe ve lo e khai. Keini hi chu tlân hmang khom ni inlang, mi ûksak rak naw ni hai. A chenve khom lo thi ta inlang, ieng rakah ngai bok naw ni hai. Nang ruok chu keini lêt sînga hlu lem i nih. Khawpuia inthoka i mi lo thrangpui hi a thra lem” an ta. 4 Lal chun, “Thra in ti dan ang tak chu thaw pei ka tih” a ta. Lal chu kul kotkhar bula chun a ngîr a, mipui chu a za têl tèl le sang têl tèlin an suok zut zut a. 5 Lal chun Joab le Abisai le Ittai hai kuomah, “Keima leiin tlangval Absalom chu indoi takin va thaw ro” tiin thu a pêk a. Absalom chungchang thua lalin thu a pèk chu mipui khomin an hriet seng a.

6 Sipaihai chun Israel mihai do dingin indona hmun tieng an pan zut zut a, an indona chu Efraim ram ngawpui a nih. 7 Chu taka chun Davida mihaiin Israel mihai chu an hne a, singhni zet an that a. 8 Chuong lai ram phêka inbei chu an ni leiin kawlhnâma that nêk hmanin ram ngawpuia tlu hlum an tam lem.

9 Absalomin Davida mihai a’n tuokpui thut lai chun a sabengtung chungah a chuong a, sabengtung chun saisaw thing buk hnuoiah a tlan lûtpui a, a lu chu thing kaua chun a’n tàng a, hnuoi tawk lo van tawk loin a’n khai a, a sabengtung hlak chu a tlan pei a. 10 Tuin amanih a hmu a, Joab kuomah, “Ngai ta, saisaw buka Absalom inkhai lai ka hmu” tiin a hril a. 11 Joab chun a hriltu kuomah, “Hmu sia ieng leia sukhlum a, hnuoiah i kei thlak naw? Chuongchun thaw la chu, tangka sawm le ka kawngchun hi ka pêk ding chê a ni bah!” a ta.

12 Mi chun a don a, “Tangka sang bŭk khom mi pe ding ni la, lal naupa chungah kut thlak naw ning. Kan hrieta ngei nang le Abisai le Ittai kuomah, ‘Keima leiin tlangval Absalom kha tu khomin tawk na naw raw se’ tiin thu khom a pêk chĕu a ni kha. 13 Lal lakah ieng khom thup thei a ni si naw leiin, a lakah ringum loa a naupa thatin ka hringna sukderthawng ta lang, ka lakah nang i’n thierfihlim nawk dai awm si a” a ta.

14 Joab chun, “I zai nghakin um zing thei naw ning” a ta, fei pathum a lak a, saisaw buka intâng, dama la um zing Absalom lunga chun a sun a. 15 Joab ralthuom chawitu mi sawmin Absalom chu an hung inhuol a, an sun hlum ta a. 16 Chu phing leh Joab chun tawtawrawt a mût a, Israelhai hnottu mipui chu an hung kir a, an hnot zui pei Joab-in a khap ta si a. 17 Absalom ruong chu an lak a, ramngawa khur lien taka chun an dĕng lŭt a, a chungah lung an dĕng bûm thŭr a. Israelhai khom chu mani in tieng seng panin an tlàn hmang ta vong a.

18 Absalom chun a dam laiin, “Naupa khom ka nei ve si naw leiin ka hming a thi nawna dingin” tiin Lal Ruomah dam lai lung a lo intieng khawm dĕr ta a, a lung dĕng bŭm chu ama hming chawiin voisun chen hin ‘Absalom hriet zingna lung bŭm’ ti a la ni zing.

19 Zadok naupa Ahimaaz chun, “LALPA chun lal chu a hmêlma kut lakah a san suok tah ti hril dingin tlân ka tih” a ta. 20 Joab chun, “Chu thu chu voisun ni khera nanga tlânpui ding a ni nawh. Ni dangah va hril de ti nih. Lal naupa chu a thi tah leiin voisun chu chanchin ieng khom va hril naw rawh” a ta. 21 Joab chun Kus mi^a kuomah, “Fe la, i thil hmu hi lal kuomah va hril raw leh” a ta. Kus mi chun Joab chu kûnin chibai a bûk a, a tlân ta nghal a. 22 Zadok naupa Ahimaaz chun Joab kuomah, “Ieng khom hung tlung ding ni sien, Kus mi kha va hnot zui rêng rèng ka tih” a ta. Joab chun, “Ka naupa, lawmman hmuna chi chanchin hawn ding i nei si naw a, ieng leiin am i tlân ve ding?” a ta. 23 Ama chun, “Ieng khom ni sien, tlàn ve ka nuom a nih” a ta. Chu phing leh Joab chun, “An leh, tlân ve el rawh”a ta. Ahimaaz chu phaizawl tieng lamah a tlân a, Kus mi chu a lekhĕl a.

24 Kul kotkhar puo tieng le sung tieng inkara Davida a’n thrung lai chun ralvêngtu chu kul bang sawng chunga chun a hang kai a. A hei ngha vel chun mi pakhat hung tlan nal nal a hmu a. 25 Ralvêngtu chun lal chu a zuk ko a, a zuk a hril a. Lal chun, “Ama chaua hung a ni chun chanchin lawmum hawn ngei a tih” a ta, ama chun a hung pan hnai tiel tiel a.

26 Chu zo elah ralvêngtu chun mi dang hung tlân a hmu nawk a, kotkhar vêngtu a zuk ko khĕk a, “En ta, ama chaua hung tlàn mi dang ka hmu nawk” a ta. Lal chun, “Ama khomin chanchin lawmum hung hawn ngei a tih” a ta. 27 Ralvêngtu chun, “A hung tlàn hmasa lem saw Zadok naupa Ahimaaz hoi ka ti kher el” a ta. Lal chun, “Ama chu mi thra a na, chanchin lawmum a hung hawn hlak a nih” a ta.

28 Chu zo ela chun Ahimaaz chu a hung khèk a, lal kuoma chun “Iengkim a thra ie!” a ta. Lal hmaah hnuoi sikin a bokkhup a, a kuomah, “LALPA i Pathien chu chawimawiin um raw se. Lal, ka pu beia a chunga kut thlâk tumtuhai chungah LALPAN hnĕna a’n changtir che” a ta.

29 Lal chun, “Tlangval Absalom a dam de maw?” tiin a’n don a. Ahimaaz chun, “I siehlaw Joab-in kei i siehlaw a mi tir lai khan an buoi mur mur ka hmu a, sienkhom ieng chie am a nih ti ka hriet nawh” a ta. 30 Lal chun, “Ka sira hin hung ngir phot rawh” a ta, a sira chun a va ngir a.

31 Kus mi chu a hung tlung ve a, lal kuomah, “Lalpa, ka pu ta dingin chanchin lawmum ka hung intlun ie; i chunga helhai po po phuba chu voisun hin LALPAN a lakpek ta che a nih” a ta. 32 Lal chun, “Tlangval Absalom chu a dam de maw?” a ta. Kus mi chun, “Lalpa, ka pu hmĕlmahai le i sietna zongtuhai po po chu, chu tlangval ang chun um vong raw se” a ta.

33 Lal chu a beidong hle a. Kul kotkhar chunga a pindana chun a kai tung a, a trap a, a fe malam chun, “Aw, ka naupa Absalom! Ka naupa, ka naupa Absalom, i aiin thi lem chu ni lang maw! Aw, Absalom, ka naupa, ka naupa!” a ta.