Absalomin a phierruk
15
1 Chuong thil hnunga chun Absalomin ama hmang dingin tawlailir le a hnûktu sakorhai le a zuitu mi sawmnga a buotsai a. 2 Zing inhma takin a tho a, khawpui lutna kul kotkhar bulah a ngîr a, lal kuoma thubuoi hril dinga hung taphot chu a lo ko a, “Khaw lai khuoa inthoka hung am i na?” a lo ti seng a. “I siehlaw hi Israel hnamhai laia mi ka ni ve” an ti pei a. 3 Chu zoah Absalom chun, “Ngai ta, i thu chu a’n dikin a thra ngei a, sienkhom a ngaituotu ding lalin a ruot si naw a ni hi tie!” a lo ti pei a. 4 Absalom bok chun, “Kei dam hi rorêltuin a mi ruot chu ni sien, thubuoi le thupoi nei taphot chu ka kuomah hung an ta, indik takin ka lo rèlpêk el ding a ni vei leh” a ti zie bok a. 5 Tu khom kûna hung hnai taphot chu a kutin a lo ban a, a kuo a, a lo fawp pei a. 6 Lal kuoma thu intlun dinga hung taphot chuong anga a lo thaw pei leiin Absalom chun Israel mihai lungril a hîp ta hle a.7 Kum lia a’n voi hnungin Absalom chun lal kuomah, “LALPA kuoma ka thu intiemkamna hlen dingin Hebron khuoah mi’n fetir rawh. 8 Suriab ram Gesur-a i siehlaw a um lai khan, ‘LALPAN Jerusalemah a mi thruoi kìr nawk chun Hebron-ah hlănbiek inhlăn ka tih’ tiin a lo intiem ta si a” a ta. 9 Lal chun, “Thlamuong takin fe rawh” a ta, Hebrona chun a fe ta a.
10 Absalom chun, “Tawtawrawt ri in hriet charin, ‘Absalom chu Hebronah lal a nih’ ti ro” tia hril dingin Israel mihai po po lai a rûkin mi a tir a. 11 Jerusalema inthoka mi zahni a fielhai chun Absalom chu an zui a, anni chun thil chinchang ieng khom an hriet ve nawh. 12 Absalomin hlănbiek a’n hlan lai chun Gilon mi Ahitofel, Davida khawnbawl chu a umna Gilo-a inthokin a’n cha a. A thil phierruk chu hung hrât peiin a zuitu chu an hung pung ta tuol tuol a.
Davida a tlân hmang
13 Chun, Davida kuomah mi a hung a, “Israel mihai lungril chu Absalom tieng a thle vong tah” tiin a hung hril a. 14 Davida chun Jerusalema a thoktuhai po po kuomah, “Tho unla, tlân suok ei tiu, Absalomin tu khom mi hlà naw nih. Inrang taka ei suok a ngai. Chuong naw chun mi hung nang hman dingin a suok nghal ring a um a, ei chungah sietna intlunin, kawlhnâmin a khaw phêk hin mi hung sâm rawi a tih” a ta. 15 Lal thoktuhai chun a kuomah, “I siehlawhai hin lalin a ti ang ang chu thaw dingin kan inpei zing a nih” an ta.
16 Lal chu a suok a, a sunghai po poin an zui a, lal in enkoltu dingin a hmeihai sawm a maksan a. 17 Lal a suok chun mipuiin an zui a, iemani chena hlaa chun an chawl hri phot a. 18 A mihai po po le Keret mihai le Pelet mihai chun an fe pĕl a, Git mi zaruk ruol, Gath-a inthoka hung zuituhai chu lal hmaa chun an fe a. 19 Lal chun Git mi Itai kuomah, “Ieng leiin am nang hi i hung ve ding? Kir nawk la, lal Absalom kuomah um rawh, nang chu mikhuol, ram dang mi chambâng i ni hi. 20 Zani ta hung tlung chauh kha i na, voisun hin a suk a tunga mi zui dingin ka phût ve ding che am a ni? Kei ngei khomin ka fena ding chin hrim ka hriet nawh. Kir nawk la, i mihai hi thruoi rawh. Lunginsietna le ringumna chu i chungah um raw se” a ta.
21 Sienkhom, Itai chun lal kuomah, “LALPA hring zing le ka lal hringna sâlin ka hril, lal, ka pu hi i umna taphotah thi le thi, dam le dam, i siehlawin um zing a tih” a ta. 22 Davida chun Itai kuomah, “An leh, hma thruoi unla, fe pei ei tiu” a ta. Git mi Itai le a mihai le sungkuo an thruoihai chun hma tieng an pan pei a. 23 An liem lai chun a ram phêkin inring takin an tra a. Lal khomin Kidron vadung chu a kân a, thlaler lam tieng panin mipui chun an zui a.
24 Thiempu Zadok khom anni lai a thrang a, a kuoma fe ve Levihai po po chun Pathien Bawm an zawn a. Chun, Pathien Bawm chu an innghat a, thiempu Abiathar chun mipuiin khawpui an suoksan zo vong chenin hlănbiek a’n hlăn a. 25 Lal chun Zadok kuomah, “Pathien Bawm hi khawpui sungah zawn kir nawk ro, Pathien mit ka tlung chun mi thruoi kîr nawk a ta, Pathien Bawm le a umna chu mi’n hmutir nawk a tih. 26 Amiruokchu, ‘Nangmaah lawmna hrim ka nei nawh’ a ti ruok chun ka chungah a nuom ang anga thaw dingin ka’n pei zing a nih” a ta.
27 Lal chun thiempu Zadok kuomah, “Nang chu zawlnei i nih an naw maw? I naupa Ahimaz le Abiathar naupa Jonathan hi thruoi la, thlamuong takin khawpui tieng kir nawk ta ro. Nang le Abiatharin i naupa pahnihai hi thruoi ro. 28 Kei chu chanchin in mi hung inhriettir nawk hmâ po chu thlalĕra vadung kâia hin lo um ka tih” a ta. 29 Zadok le Abiathar chun Pathien Bawm chu Jerusalemah an kirpui nawk a, chu taka chun a um a.
30 Davida chun trap pumin Oliv tlang chu a pan tung a, a lu a’n khum a, ke ruokin a fe a. Ama le fe mipui po po khom chun lu an inkhum a, an trap malam pei a. 31 Chun, “Absalom thu phierrukpuitu chu Ahitofel a nih” tiin Davida chu an hung hril a. Chuongchun, Davida chu a trongtrai a, “Aw LALPA, Ahitofel thu phierpui chu invĕtthlăkah inchangtir dingin ka ngĕn che” a ta.
32 Davidan tlâng sîp, Pathien an biekna hmun a hang lawn kai chun Ark mi a hming Husai, zakaw potthlêr hâk a, a luah pilvut kai nung el chun a lo tuok a. 33 Davida chun a kuomah, “Ka kuomah i hung chun ka ta dingin phurrik ni’ng i tih. 34 Jerusalemah i kîr nawk ruok chun Absalom kuomah, ‘Aw lalpa, i siehlaw ni’ng ka tih. Kha hma khan i pa siehlaw ka ni hlak a, tu hin chu i siehlaw ni lem tang ka tih’ ti la, Ahitofel thu phierpui po po sukhrûttu ni’ng i tih. 35 Chu taka chun i kuomah thiempu Zadok le Abiathar khom an um ve ding a na, lal ina thu suok i hriet po po chu anni kuomah i hril hlak ding annawm. 36 Ngai ta, an naupahai pahni, Zadok naupa Ahimaza le Abiathar naupa Jonathan hai khom an kuomah an um kha. I thil hriet taphot chu mi’n hriettir dingin anni chu i hung tir hlak ding a nih” a ta. 37 Chuongchun, Davida ruol thra Husai chu Absalomin Jerusalem a lut lai chun khawpuiah a hung lut ve ta a.