4 Nuhmei chu lal kuomah a fe a, bawka hnuoi sikin inza takin chibai a bûk a, “Aw lalpa, mi thrangpui rawh” a ta. 5 Lal chun, “Iem a na i harsatna?” a ta. Ama chun, “Hmeithai el ka ni a, ka pasal a thi ta a. 6 I bawinu hin naupa pahni a nei a, an pahni chun an lo fenaah an insuol a, threltu ding tu khom an um si naw a, pakhat chun pakhat lem chu a sukhlum a. 7 Tuhin an pahnam po poin i bawinu hi an do hron a, ‘A unaupa thattu chu a unaupa a that leia kan that ve theina dingin mi hung pe suok rawh, rohluotu ding chu sukbohmang nghal kan tih’ tiin an mi nor a. Ka’n hnemna meiling nei sun an sukchimit nawk pei chun, hi hnuoia hin thla nei lo le hming nei loin ka pasal an siem el ding a nih” a ta.

8 Lal chun nuhmei kuomah, “I in tieng kir nawk ta la, i chungchang thua chun thupêk insuong ka tih” a ta. 9 Nuhmei chun, “Aw lalpa, bawsietna maw chu ka chunga le ka pa sunghai chungah tla sien la, lal le a lalthrungpha chun a maw phur naw raw se” a ta. 10 Lal chun, “Tu khomin ieng khom an hril chun, ama chu ka kuomah hung thruoi la, sukbuoi nawk ta naw ni che” a ta. 11 Ama chun, “Ka naupa hi an sukbohmang nawna dingin, thisen phuba la tumtuhai laka veng him dingin lal chun LALPA Pathien kuomah dawvan mi kaipek raw se” a ta. Lal chun, “LALPA hring zing hmingin ka hril, i naupa chu a samzai pakhat khom hnuoia hin tla naw nih” a ta.

12 Nuhmei chun, “I siehlaw hin ka lalpa, lal kuoma hin thu bau khat chauh hang hril nawk hràm raw se aw” a ta. Lal chun, “Hril ta la” a ta. 13 Nuhmei chun, “An leh ieng leiin am Pathien mihai kal zawnga hieng anga lalin thil poi a thaw? A naupa tlan hmang hung kir ding a phal si naw chun tuta a thu hril chun lal chu ama le ama thiemnaw changin a’n siem a ni naw maw? 14 Hnuoia tui sukbuok ta hnung rût nawk thei lo anga thi vong ding chu ei ni ngei a. Pathien khomin mithi ta hnung chu a hung thruoi kir nawk ta ngai nawh. Amiruokchu, lal chun mi tlan hmang chu a hung thruoi kir nawk thei annawm. 15 Chun, lalpa, ka pu kuoma thu hril dinga ka hung khom hi mihai ka trì lei a nih. Ka lungrilin, ‘Lal kuomah hril phot ka ta, lal chun a bawinu hnina chu a lo inhlawtlingtir khiet el thei a. 16 Ka thu mi ngaithlapekin, LALPA ro mi pèk, kei le ka naupain hluo thei lo dinga mi sukbohmang tumtu lakah a mi san suok el rawi mawh’ ka ti a. 17 I bawinu ta ding hin ka lalpa, ka pu thu chu thlamuongum tak ni sien la, a sie a thra hmu fie thei dingin ka lalpa, ka pu chu Pathien vantirko ang a ni si a. LALPA Pathien chu i kuomah um raw se” a ta.

18 Lal chun nuhmei kuomah, “Thu ka’n don taphot che chu ka lakah ieng khom ip naw raw aw” a ta. Nuhmei chun, “Ka lalpa, ka pu chun hang hril sien tie” a ta. 19 Lal chun, “Hieng thua hin Joab-in thrangna a nei hrim hrim am?” a ta. Nuhmei chun, “Ka lalpa, ka pu, i hringna sâlin ka hril, ka lalpa, ka puin a hril tah chu tu khomin chang tieng amanih voi tieng amanih pumpel thei naw ni hai; a nih, i siehlaw Joab chun a mi tir a, hieng thu po po hi ama mi’n bâ vong a nih. 20 Thil um dan sukdanglam dingin i siehlaw Joab chun hieng thil hi a thaw a nih. Hi rama thil tlung po po hre fie vong thei dingin Pathien vantirko angin ka pu hi i var si a” a ta.

21 Lal chun Joab kuomah, “A thra chu, thawng ka tih. Tlangval Absalom chu va thruoi kir rawh” a ta. 22 Joab chun hmaia hnuoi sika bokkhupin chibai a bûk a, lal chu mal a sawm a, “Aw lalpa, ka pu, lalpa chun a siehlaw hnina chu a’n hlawtlingtir leiin voisun hin i siehlaw hin i mit ka tlung ti ka hriet tah” a ta. 23 Joab chu a tho a, Gesur-a chun a fe a, Absalom chu Jerusalemah a hung thruoi a. 24 Lal chun, “Ama in tieng fe sien la, ka hmêl ruok chu hung hmu naw raw se” a ti leiin Absalom chun a in tieng a pan a, lal hmêl chu a hmu ta naw a.

25 Israel mihai po po lai Absalom anga hmel thrata inpâk hlaw tu khom an um naw a, a ke hmawra inthoka a lu sîp chenin soiselna ding hrim a um nawh. 26 A sam a thra èm leiin a rik a, a’n khattawkin lu a vaw a, a vaw zatin a sam chu a bûk a, lal bûkna hmanga bŭkin kilogram hni a tling hlak. 27 Absalom chun naupa pathum le naunu hmel thra tak el pakhat Tamar a nei a.

28 Absalom chu lal hmêl hmu loin kum hni zet Jerusalemah a um a. 29 Chun, lal kuoma tir dingin Joab a’n cha a, sienkhom a hung nuom naw a. An cha non a, a la hung chuong naw a. 30 Chu phing leh a siehlawhai kuomah, “Joab lo chu ka lo kawla um a na, barli a chîng a, va rawpek vong ro” a ta, Absalom siehlawhai chun lo chu an va raw a. 31 Joab chu a tho a, Absalom inah a fe a, “Ieng leiin am i siehlawhaiin ka lo an raw?” a ta. 32 Absalom chun, “Ngai rawh, ieng leiin am Gesura inthokin ka hung a na? Chu taka chun um zing lang ka ta dingin thra lem ding” tia lal kuoma hril dingin tir che ka nuom a, ka’n chà che a; chuleiin lal hmêl chu mi’n hmutir rawh, bawsiet ka nei chun mi sukhlum el raw se” a ta. 33 Joab chu lal kuomah a fe a, chu thu chu a hril a. Lal chun Absalom chu a ko a, a fe a, a hmaah bawka hnuoi sikin a bokkhup a, lal chun Absalom chu a fawp a.