Davida le Ziba
16
1 Davidan tlang sîp a pèl hnung hla rak loa chun Mefiboset siehlaw Ziba chun hmu tumin a lo nghak a. Ama chun bei tlang zahni, grep bawr em trawl phêk zakhat, theichang em trawl phêk zakhat le uoiin peng khat phur sabengtung iemani zat a thruoi a. 2 Lal chun Ziba kuomah, “Hieng hi ieng dinga i hung chawi am?” a ta. Ziba chun, “Sabengtunghai hi lal sungkuohai chuongna ding a na, bei tlang le theihai hi tlangvalhai fak ding a na, uoiin hi thlalera chau taphothai dawn ding a nih” a ta.3 Davida chun, “An leh, i pu tupa kha teh khawla’m iem a chang ta a?” a ta. Ziba chun, “Jerusalemah a um; ‘Voisun hin Israel sungkuoin ka pu ram an mi pekkir nawk ding a nih’ ti a beisei tlat an nawm” a ta. 4 Lal chun Ziba kuomah, “Mefiboset thil nei po po chu tu hin i tâ a ni tah” a ta. Ziba chun, “Inzà takin chibai ka bûk che, aw ka lalpa le ka pu, i mit tlunga um pei ka nuom” a ta.
Davida le Simei
5 Lal Davidan Bahurim a tlung chun Saula sunghai laia mi, Gera naupa a hming Simei chu a hung suok a, trongsie a’n phur bor bor a. 6 A vengtuhai chu voi le changah umhai sienkhom Davida le a thoktuhai chu lungtein a dĕng a. 7 Simei chun trongsie inphurin, “Fe hmang dai rawh! Fe hmang dai rawh, nang thisen insuo hmang le mi rilopa! 8 A lalna i hlu suok Saula sunghai thisen phuba chu LALPAN i chungah a hung bun lĕt che a, LALPA chun ram chu i naupa Absalom kuomah a pêk tah a ni kha. Thisen insuo hmang mi i ni leiin i sietna i kei dok a ni khah” a ta.
9 Zeruia naupa Abisai chun lal kuomah, “Iengti dana hi ui thi sa hin ka lalpa hi trongsie a’n phur ngam am a na? Feng ka ta, a lu va tan bong ka tih” a ta. 10 Sienkhom, lal chun, “Nangni Zeruia nauhai le kei hin inangna iem ei nei a? LALPAN, ‘Davida saw trongsie inphur rawh’ a ti leia a mi’n phur a lo ni lem chun, nang le keiin, ‘Ieng leia hieng thil hi i thaw am a na?’ ei ti thei ding am a ni?” a ta. 11 Davida bokin Abisai le a thoktuhai kuomah, “Ka naupa ngèi ngèi, ka taksa le thisen put ngèi hmanin ka hringna làk a tum chun, hi Benjaminpa lem hin chu nasa nawkzuola mi soisak a tum naw ding am a ni? Tosan ro, LALPAN thaw dinga a hril leia trongsie a mi’n phur a ni chu. 12 Voisuna trongsie a mi’n phur leia ka rinum tuor hi LALPAN hmung a ta, a thra tiengin a mi rul nawk lem el thei bok a nih” a ta. 13 Davida le a mihai chu an fe pei a, ral khing tlâng panga chun Simei khom chu a fe a, fe malamin trongsie a’n phur ngat ngat a, lungtein a dĕng a, lung thrìl damin a thê bok a. 14 Lal le a kuoma umhai po po chun chau hnêpin Jordan an tlung a, chu taka chun an chawl hadam a.
Husai le Ahitofel thurawn
15 Chuong lai chun Absalom le a zuitu Israel mihai chun Jerusalem an lut a, anni lai chun Ahitofel khom a thrang a. 16 Davida ruolpa Ark mi Husai chu Absalom kuomah a fe a, “Lal chu dam sawt raw se, Lal chu dam sawt raw se” tiin chibai a bûk a 17 Absalom chun Husai kuomah, “Hieng ang hi a ni maw i ruolpa i lunginsiet dan chu? Iengti dana i ruolpa kuomah i fe ve naw?” a ta.
18 Husai chun Absalom kuomah, “Fe ve naw ning. LALPA le hieng mipuihai le Israel mihai po poin an thlang thû thŭin um ka ta, a kuomah um lem ka tih. 19 Chu bâkah, tu rong am a na ka bawl ding? A naupa rong chu ka bawl ding a ni naw am a ni? I pa rong ka bawl ang char khan i rong khom bawl ka tih” a ta.
20 Absalom chun Ahitofel kuomah, “Iengtin am ei thaw ta ding a na? Thurawn mi pe raw leh” a ta. 21 Ahitofel chun, “Lal in nghaktu dinga i pain hmei a maksanhai hi zălpui rawh. Israel mihai po poin i pa poi nasa takin i tawk ti hung hrieng an ta, i tienga thranghai kut sukhrât sot i tih” a ta. 22 Absalom ta dingin in chunga chun puon in an kei a, Israelhai po po mithmua chun a pa hmeihai chu a zălpui ta a. 23 Chuong lai chun Ahitofel thurawn pek taphot chu Pathien thu ang hiela an ngai a nih. Chuong ang chun Davida le Absalom khomin Ahitofel thu chu an ngai ve a nih.