Davidan Amonhai a hnĕ
10
1 Chuong thil hnunga chun Amonhai lal a thi a, a naupa Hanun chun a lalna chu a hung hluo a. 2 Davida chun, “A pain a mi lunginsiet ang bokin Nahas naupa Hanun chu lunginsiet veng ka tih” a ta, a pa a sŭnpuina thu hril dingin a aiaw mi a tir a. 3 Amon thlahai ram an va tlung chun Amon milŭnhai chun Hanun kuomah, “Davida hin i pa a’n zà leia sŭnpuina thu hril dinga mi a hung tir ni i ring am a ni? A pei thlak theina ding chea i khuo thlithlai ding le enthla dinga a mihai a hung tir a ni naw maw?” an ta. 4 Chuongchun, Davida mi hung tirhai chu Hanun chun a man a, an khakhmul khing tieng chau a vaw kolpek a, an silfenhai chu an mongtam chena insîngin a tanpek a, a’n fetir ta a.5 Chuonga an lo sukmuolpho thu Davida an hril chun a tuok dingin mi a tir a. Lal chun, “In khakhmul a’n thrang sei hma khat chu Jeriko-ah um zing unla, chu zoah hung chau ro” tiin thu a’n cha a.
6 Davida hnărah thil rimsie an lo inchang tah ti Amon mihaiin an hung hriet chun Bet Rehob le Zobaa inthokin Aram mihai singhni, lal Maaka mihai sangkhat le Toba mihai singkhat le sanghni inchà khawmin an ruoi a. 7 Davidan chu chu a hrietin Joab le a râldo thiem po po chu a tir a. 8 Amon mihai chu an hung suok a, an kul kotkhar bula chun thranghmun an khaw a, Zoba le Rehobaa inthoka hung Aramhai le Maaka mihai ruok chu a hranin phŭlah an um a.
9 Joab chun a hma tieng le a hnung tieng an hung bei ding ti a hriet a, Israel sipaihai laia a huoisen fâl thral mi iemani zat chu Aram mihai bei dingin a thlang suok a. 10 A dang po chu a unaupa Abisai inrawina hnuoiah Amon thlahai bei dingin a sie a. 11 Joab chun, “Aram mihai kan ngam naw chun mi hung san unla, Amon thlahai in ngam naw leh hung san kan ti chêu. 12 Hrât takin um unla, ei mihai le ei Pathien khuohai sanin huoisen takin bei ei tiu. LALPAN thra a ti ang peiin thaw raw se” a ta.
13 Joab le a rawihai chun Aram mihai chu an bei a, an hmaa chun an tlanse dur dur a. 14 Amon thlahaiin Aram mihai an tlansiet thu an hriet chun anni khom Abisai hmaa chun an tlanse a, khuoa chun an lŭt a. Joab chun Amon thlahai chu Jerusalem tieng a kirsan ta a.
15 Aram mihaiin Israelhai an ngam nawh ti an hmu chun an inpung khawm nawk a. 16 Hadadezer chun Eufretis vadungpui khĕla um Aram mihai chu a va’n thruoitir a, chuonghai chu Hadadezer sipai kawmandar Sobak inrawina hnuoiah Helam-ah an fe a. 17 Chu thu Davida an hril chun Israel mihai po po a khawm a, Jordan an kăn a, Helamah an fe a. Aram mihai chun Davida do dingin thrang an lo khaw a, an lo bei a. 18 Sienkhom, Israelhai hmaa chun an tlanse a, Davida chun an tawlailir khaltu mi zasari bâkah kea lawn pawl sipai singthum a that a, an kawmandar Sobak khom a that a, chu taka chun a thi ta a. 19 Hadadezer hnuoia lalhaiin Israelhai an ngam nawh ti an hmu chun Israelhai chu inremna an siempui a, an thu hnuoiah an um ta a. Aramhai chun Amon thlahai chu an thrangpui ngam zing ta nawh.