Davida le Mefiboset
9
1 Davida chun, “Jonathan zăra ditsakna ka’n entir thei ding Saula sungkuo laia dam mi an la um am?” a ta. 2 Saula sunghai siehlaw pakhat a um a, a hming chu Ziba a na, ama chu Davida hmaa inlang dingin an ko a. Lal chun, “Nang hi Ziba chu i ni maw?” a ta, ama chun , “Ni e, kei i siehlaw hi” a ta. 3 Lal chun, “Pathien ditsakna ka’n entir theina dingin Saula sungkuo laia mi a dam an la um am?” a ta. Ziba chun lal kuomah, “Pu um e, Jonathan naupa a la um a, sienkhom ke khing hnia inbai a nih” a ta. 4 Lal chun, “Khaw lai am a um?” a ta, Ziba chun, “Lo Debar khuoa Amiel naupa Makir inah a um” a ta.5 Lal Davida chun ama chu Lo Debar-a Amiel naupa Makir ina inthok chun a va’n thruoitir a. 6 Saula naupa Jonathan naupa Mefiboset chu Davida kuomah a hung a, a hmaa chun inza takin a kûn a. Davida chun, “Mefiboset” a ta, ama chun, “I siehlaw ka um” a ta. 7 Davida chun, “Tri naw rawh, i pa zărin ditsakna inentir ngĕi ngêi ka ti che. I pu Saula ram po po inneitir nawk ka ti che a, ka dawkanah thlaithleng i kîl rop ta ding a nih” a ta.
8 Mefiboset chu a kûn a, “I siehlaw hi ieng hrim am a na, ui thi sa ang chauh keima ang i mi hang ngaisak nuom el chu?” a ta.
9 Chuongchun, lal chun Saula siehlaw Ziba chu a’n kotir a, a kuomah, “Saula thil po po le a sungkuohai thil po po chu i pu naupa hi ka pêk vong a nih. 10 I pu naupa chun fák a hmu theina dingin a ta dingin nang le i naupahai le i siehlawhaiin a lo inletpêk ro. I pu tupa Mefiboset chun ka dawkanah thlaithleng ot zing ta’ng a tih” a ta. Ziba chu naupa sawmpanga le siehlaw sawmhni nei a ni tah.
11 Ziba chun lal kuomah, “Ka pu, lalin i siehlaw kuoma thaw dinga i pèk taphot chu i siehlaw hin thaw ngĕi ngêi a tih” a ta. Chuongchun, Mefiboset chun lal naupahai angin lal dawkanah thlaithleng a kîl ve ta a.