Davida nauhai
3
1 Saula sungkuo le Davida sungkuo chu sawt tak an indo a, Davida chu a hung hràt tiel tiel a, Saula sungkuohai ruok chu an hung chau tiel tiel thung a.2 Hebron-a Davida naupa pieng po hai laia a upa tak chu Jezreela mi Ahinoam laka a hring Amnon a nih; 3 a pahnina Kileab chu Karmela Nabal nuhmei thisan Abigaila inthok a nih; a pathumna Absalom chu Gesur lal Talmai naunu Maka laka mi a nih; 4 a palina chu Adonija, Hagit laka mi a nih; a pangana chu Sefatia a na, Abitala laka mi a nih; 5 a parukna chu Ithream a na, Davida nuhmei Egla laka mi a nih. Chuonghai chu Davida naupahai, Hebrona pieng an nih.
Davida tieng Abner a thrang
6 Saula sungkuo le Davida sungkuo an indo sungin Abner chu Saula sungkuohai lakah a tlatlum hman hle a. 7 Saula chun hmei a nei a, ama chu Aia naunu Rizpa a nih. Chun, Isboset chun Abner kuomah, “Ieng dinga ka pä hmei i zàlpui am a na?” tiin a suosal a.
8 Isboset trong chun Abner chu a suklungsen hle a, “Judahai uicho ang mei meia i mi ngai a ni? Voisun chen hin i pa Saula sunghai le a unauhai le a ruolhai chungah ringum takin ka um a, Davida kuta khom ka pêk naw che a ni kha. Chuong sà khom chun tu hin nuhmei chunga suolah i mi’n tum hi. 9,10 Dan-a inthoka Beersheba chen Saula sungkuoa inthoka ram chu lakpek a, LALPAN Davida lalthrungpha indin dinga inkhâm meua a lo tiem tah anga ka thaw naw chun Pathienin Abner hi a law lawin law sien la, chu nêka nasa dai khom chun thaw raw se” a ta. 11 Isboset chun Abner chu a trì leiin a don ngam hrim hrim nawh.
12 Abner chun a âiin Davida kuomah mi a tir a, “Hi ram hi tu ta am a na? Ka kuomah thu thlung la, Israel ram po po i kuta hûi lût vong dingin thrangpui ka ti che” tiin thu a thon a. 13 Davida chun, “A thra, thu thlung ka tih. Amiruokchu, hi thil pakhat hi ka ngiet a, i hung pha leh, Saula naunu Mikal kha i hung thruoi naw chun ka hmêl hmu thei naw ti nih” a ta. 14 Chu zoah Davida chun Isboset kuomah, “Filistin mihai ser vun zakhata ka’n chawk sa ka nuhmei Mikal kha mi hung pe kîr rawh” tiin mi a tir a. 15 Isboset thupèkin Mikal chu a pasal Paltiel, Laish naupa kuoma inthokin an va thruoi a. 16 A pasal chun trap zing pumin Bahurim chen a hung zui a, Abnerin “Kîr ta rawh” a ti leiin a in tieng a kîr nawk ta a.
17 Abner chun Israel upahai chu a biek a, “Kha hmâ khan Davida chu in lalah in dit hlak a. 18 Tu hin in lalah siem ro. LALPA chun Davida kuomah, ‘Ka siehlaw Davida kutin ka mi Israelhai chu Filistin mihai kuta inthok le an hmĕlmahai po po kuta inthokin san suok ka tih’ tiin thu a tiem a nih” a ta.
19 Abner bok chun Benjamin mihai hriet ngeiah chu thu chu a hril nawk a. Chu zoah Israel mihai le Benjamin sungkuo po poin thaw dinga an dithai chu Davida hriet ngeia hril dingin Abner chu Hebron-ah a fe a. 20 Abner le a mi thruoi sawmhni ruolin Davida inhmupui dinga Hebron an hung tlung chun Davidan ruoi a buotsaipek a. 21 Abner chun Davida kuomah, “Kîr nawk nghal ka ta, Israel mihai po poin i kuoma thu an thlung theina ding le i duthusam ang taka an chunga ro i rĕl theina dingin, ka lalpa kuoma hung inkhawm dingin va huoihot tawl ka tih” a ta. Davida chun a’n fetir a, thlamuong takin a kîr nawk ta a.
Abner a tuol thi
22 An fe charin mi rûna fe Davida mihai le Joab chu an hung tlung a, râllâk sum tam tak an hung hawn a. Abner ruok chu Hebronah a lo um ta naw a, Davidan thlamuong takin a lo inkirtir ta a. 23 Joab le a sipai thruoihai an hung tlung chun, “Nera naupa Abner chu lal kuomah a hung a, lal chun thlamuong takin a lo infetir nawk tah” tiin Joab chu an lo hril a.
24 Chuongchun Joab chu lal kuomah a fe a, “I thil lo thaw hi iengtizie am a na? En ta, Abner chu i kuomah a hung a. Ieng leia i lo infetir am a na? Tu hlak hin a fe dai ta bok si a! 25 Nera naupa Abner chu tu am a nih ti i hriet; dawha ding che le i chàng dan iengkim chîk a, i thilthaw taphot hriet suok tuma hung a ni chu” a ta.
26 Davida kuoma inthoka Joab a hung suok chun Abner hnot dingin mi a tir nghal a, Sira tuikula inthokin an hung thruoi kir nawk a, sienkhom chu chu Davidan a hriet ve nawh. 27 Abnerin Hebron a hung tlung chun Joab-in kul kotkhara chun be ru dingin a thruoi hrang a, a unaupa Asahel thisen thungrulna dingin a phìngah a sun a, a thi ta a.
28 Chu thu chu a hnung deuah Davidan a lo hriet chun, “Nera naupa Abner thisen insuona thua hin kei le ka ram chu LALPA hmaah kumkhuoin fihlîm kan tih. 29 A thisen maw chu Joab lu chunga le a pa sunghai po po chungah tla raw se. Joab sunghai lai pânna huoisuol nei dam, vun hri chi hrang hrang invoi dam, funghrol ringsana khawsa dam, kawlhnâma that dam le suongsama um bo naw raw hai se” a ta. 30 [Joab le a unaupa Abisaiin Abner an that nasan chu Gibeon hmuna indonaah an unaupa Asahel a that lei a nih.]
31 Davida chun a hlâng chu zuiin, Joab le a bula um mi po po kuomah, “In puonhai pot thlêr unla, saiip puon sil unla, Abner hi sûn ro” a ta. 32 Abner chu Hebron-a chun an phŭm a. Abner thlăna chun rawlpui insuo meuin lal chu a trap a, mipui khom an trap vong a. 33 Lal chun Abner sŭnna thu a’n sam a:
Mi invêt thi ang elin,
Abner chu a thi ding maw?
34 I kut khuop a ni naw a,
Keah kol i bun bok nawh.
Mi rilohai hmaa mí,
An tlŭk anga tlû i nih
tiin. Chuongchun, mi po po chu an trap nawk a.
35 A lusûn lai chun iemani bĕk fa dingin mi po poin Davida chu an hung ngĕn a. Davida ruok chun, “Nisa tlak hmaa bei amani le thil dang ieng khom ka fak hlek chun Pathienin a law lawin mi law sien la, chu nêka nasa khom chun mi thaw raw se” tiin a’n khăm a. 36 Chu chu mi po poin an hrietin an lawm hle a; lal thilthaw taphot chun mipuihai chu a suklawm a nih. 37 Chu nia inthoka chun Nera naupa Abner an thatna chungchangah lal chu a thrang ve nawh ti mi po poin an hung hriet ta a.