2 Chuongchun, Davida chun a nuhmeihai pahnih, Jezreel-a mi Ahinoam le Karmel-a Nabal nuhmei thisan Abigail hai chu thruoiin a hang fe a. 3 Davida chun a kuoma um a mihai chu an sungkuo seng leh a thruoi sá bok a, Hebron le a sevel khuoa hai chun umhmun an khuor a. 4 Chun, Judai rama mihai chu Hebron-ah an fe a, Juda sungkuohai chunga lal dingin Davida chu hriek an năl a. Anni chun Saula phûmtuhai chu Jabes-Gilead mihai an ni thu Davida chu an hril bok a.

5 Davida chun Jabes-Gilead mihai kuomah mi a tir a, “In pu, Saula chungah lunginsietna suklanga in lo phŭm leiin LALPA chun malsawm chêu raw se. 6 LALPA chun in chungah ngilneina le ringumna inlangtir sien la, hieng thil in lo thaw lei hin kei khomin in ngilneina man chu rul ka ti chêu. 7 Tu hin hrât tak le huoisen takin um ro, in pu Saula chu a thi ta a, kei hi Juda pahnamhaiin an chunga lal ni dingin hriek an mi năl ta bok a nih” tiin thu a thon a.

8 Chuong lâi zing chun Nera naupa Abner, Saula kawmandar chun Saula naupa Isboset chu Mahanaim-ah a hung thruoi a, 9 Gilead hai, Asur (Aser) hai, Jezreel hai, Efraim hai le Israelhai po po chungah lalin a siem a. 10 Ro a rĕl tran kum chun Saula naupa Isboset chu kum sawmli mi a ni a, kum hni sung ro a rĕl hman a. Juda sungkuohai ruok chun Davida chu an zui lem a. 11 Juda chihai chunga Hebrona inthoka Davidan ro a rĕl sung chu kum sari le thla ruk a nih.

12 Chun, Nera naupa Abner le Saula naupa Isboset mihai chun Mahanaim maksanin Gibeon-ah an fe a. 13 Zeruia naupa Joab le Davida mihai khom an fe suok ve a, Gibeon tuikhura chun an intuok a, pawl khat chu ral khing tieng an um a, pawl dang chu tuikhur ral khing tieng.

14 Chun, Abnerin Joab kuomah, “Ei tlangval threnkhat hung suok hai sien, ei hmaa hin kut lâwngin hang inbeihai sien tie” a ta, Joab chun, “Ni e, inbei raw hai se” a ta. 15 Chuongchun, Benjamin chia mi, Saula naupa Isboset mihai sawmpahni le Davida mihai sawmpahni chu an hung ngìr suok a. 16 Mani bitumhai lû sengah an inman a, an bitum seng nàkah kawlhnâmin an insun a, an tlu ruol ta vong a. Chuleichun hi hmun hminga hin Helkat Hazurim^a an inbŭk a, chu chu Gibeon-a um a nih. 17 Chu ni chun an inbei nasa hle a, Abner rawihai chu Davida rawihai chun an intlawm a.

18 Chu taka chun Zeruia naupa pathum Joab hai, Abisai hai le Asahel hai chu an thrang a. Asahel chu sazukpui ang ela ngal hrât a nih. 19 Asahel chun Abner chu voi tieng le chang tieng khom pêt dĕr loin a hnot thlŭr ngat ngat a. 20 Abner chu a ngha kîr a, “Nang i ni maw Asahel?” a ta, ama chun “Ni chieng e” a ta. 21 Abner chun, “I voi tieng amanih chang tieng amanih pêt la, tlangval pakhat kha man la, a ralthuom kha lakpek rawh” a ta, sienkhom Asahel chun pêt nuom loin a hnot ngar ngar a.

22 Abner chun, “Mi hung hnot ta naw rawh. Ieng leiin am ka sun thluk ding che? Ieng tin am i unaupa Joab hmĕl ka hmu ngam ta ding?” a ta. 23 Asahel chun a hnot chu a’n thla nuom si naw leiin Abner chun a fei mong tiengin Asahel phinga chun a hnung tieng dâwk pŭrin a sun tlang a, chu hmuna chun a tlu a, a thi ta nghal a. Asahel thina hmun hung tlung taphot chu an ngîr chat pei a. 24 Sienkhom, Joab le Abisai ruok chun Abner chu an hnot pei a, Gibeon thlalĕr panna Gia bula Amma muol an tlung chun nisa a tla ta a.

25 Benjamin thlahai chun Abner chu an hung pan khawm a, an intĕl khawm nawk a, tlâng sîpa chun thrang an khaw a. 26 Abner chun Joab kuomah, “Kawlhnâm chun a sâm zing el ding am a ni? Hi hi khâknain a tawp ding a nih ti i hriet naw am a ni? Ieng tik am i mihai hi an unauhai hnot ta lo dingin thu i pêk ding a na?” a ta.

27 Joab chun, “Pathien hring zing hmingin ka hril, ieng khom hril loin um la chu ka mihaiin an unauhai chu zing khawvar chenin an hnot ding a nih” a ta. 28 Joab chun tawtawrawt a mût a, mipuiin Israelhai an hnot lai chu an ngîr thrup a, an bei zui ta nawh.

29 Chu zan chun Abner le a mihai chun Araba pal tlangin zan khawvarin an fe a, Jordan vadung an kăn a, Bithron fe thlengin Mahanaim an tlung a. 30 Joab-in Abner a hnot khom chu a hung kîr a, mipui a hang ko khawm vong chun Davida rawihai sawm le pakuo le Asahel chu an kim ta naw a. 31 Davida rawihai ruok chun Benjamin mihai le Abner mihai chu zathum le sawmruk an that a.

32 Chuongchun, Asahel ruong chu an làk a, Bethlehema a pa thlănah an phŭm a. Chun, Joab le a mihai chu zankhuoa fein zing khawvarah Hebron an tlung a.