2 SAMUEL
Davidan Saula thi thu a hriet
1
1 Saula thi hnung, Amalekhai hnea Davida hung inlawi tieng chun Ziklag-ah ni hni a châm a. 2 A ni thum ni chun Saula inkulnaa inthokin mi pakhat, silfen inek neng nung le sama pilvut kai luoi hi Davida kuomah a hung a, bokkhupin chibai a bûk a. 3 Davida chun a kuomah, “Khaw laia inthoka hung am i na?”a ta, ama chun, “Israelhai inkulnaa inthoka hung tlan suok ka nih” a ta. 4 Davida chun, “Ieng tin am thil a um mi hang hril rawh khai” a ta. Ama chun, “Indonaa inthokin mihai an tlansie a, tam tak an thi bok a. Saula le a naupa Jonathan khom an thi” a ta.5 Chanchin hung hawntu tlangval kuoma chun Davidan, “Ieng tin am Saula le a naupa Jonathan chu an thi ti i hriet thei a?” a ta. 6 Tlangval chun, “Gilboa tlàngah ka um ve a, Saula chu a fei innghaia um ka hmu a, sakor tawlailir le a chunga chuonghai chun an hung nangchîng trèp ta a. 7 A ngha vel chun a mi hmu a, a mi hung ko a, kei chun “Ieng am ka thawpek thei che?” tiin ka’n don a. 8 Ama chun, “Tu am i na?” a mi ti a “Amalek mi ka nih” ka ta. 9 Ama chun, “Ka kawla hin hung ngir la, mi hung that raw leh; hi, thi hmun suolin ka um a, ka la dam ting bok si a” a ta.
10 “A bula chun ka ngîr a, chuonga inlet dêr tah chu a ni lei le a dam zo chuong ta naw ding ti ka hriet leiin ka that a, a lua lallukhum le a kuta a bânbun chu ka lâk a, i kuomah ka hung chawi a nih, pu” a ta. 11 Davida le a mihai chun an silfen an potthlèr a. 12 Kawlhnâma an that Saula le a naupa Jonathan hai, LALPA mihai le Israel sungkuohai chu an sŭn a, an tra a, zan tieng chen bu an nghei a.
13 Davida chun chanchin hung hawntu tlangval kuomah, “Khaw taka inthoka hung am i na?” a ta, ama chun, “Ram dang mi ka na, ka pa chu Amalek mi a nih” tiin a don a. 14 Davida chun a kuomah, “Ieng dinga Pathien hriek năl sukbohmang dinga a chungah kut i thlâk ngam am a na?” a ta. 15 Chuongchun tlangval pakhat a ko a, “Va hnai la, va that rawh” a ta, a va sât hlum ta a. 16 Davida chun, “I thisen chu nangma lu chung ngeiah um raw se, nangma bâu ngeiin, ‘LALPA hriek năl chu ka that’ i ti si a” a ta.
Davidan Saula le Jonathan a sùn
17 Davida chun Saula le a naupa Jonathan sŭnna hla chu a’n sam a, 18 chu chu ‘thal kap hlà’ ti a na, Juda mi po po inchûktir dingin thu a pêk a, chu thu chu Jasar Lekhabuah ziekin a um:
19 Aw Israel, i thruoitu ropuihai,
I tlâng chungah fam khuo changin,
Mihrânghai sam ang an zăl ie!
20 Gath khuohai chu hril naw ro,
Askelon kotthlĕrah puong naw ro;
Filistin minuhaiin lo lawm palin,
Sertan lo hrailêng lănuhaiin,
Hlim zâi vâwr pal rawi an tih.
21 Aw nangni Gilboa tlanghai,
In chungah daidaw tla naw sien,
Khuongruo sûr bok naw sien la,
Loin thilhlân ding hrim hrim,
Bu le bâl insuo naw raw se;
Chu taka chun mi lien phaw,
Muolpho takin an peihawn a,
Saula phaw chun hriek năl le
Chŭl tlerh hrim a hlaw ta nawh.
22 Thathai thisena tlai lo le,
Mi hrâthai thău fa khop loin,
Jonathan thal a lêt ngai naw a,
Saula kawlhnâm a lêt ngai nawh.
23 Saula le Jonathan nun kha,
A ditumin a va hang mawi ngei!
An thi chenin an inkop zing;
Muvanlai nêkin an truonrang a,
Sakeibaknei nêkin an hrăt lem.
24 Nangni Israel naunuhai,
Saula sûnin tră ta ro khai,
Puon sendâng mawia thuomtu cheu,
In silfenhai rangkachaka
Cheipektu chêu a ni si.
25 Indoa hrât khawkhĕnghai,
An hang tlu el chu a nâ maw!
I tlâng sângah Jonathan chu,
Fam changin a zâl ta ie.
26 Ka unaupa aw Jonathan,
Ka va hang sûn ngei che de aw!
Ka va hang ngaina ngei che de!
I mi hmangai dăn kha a mak,
Nghâknu hmangaina a khûm.
27 Mihrâng an hang tlu el chu,
Ralthuom bo ang ei ni ie!