Ruthiin pasal ding a hmu
3
1 Ni khat chu a tarpi Naomi chun Ruthi kuomah, “Ka naunu, i ta dinga thra khawsakna ding zongpêk che hi ka thaw ding a ni naw am a ni? 2 Kan laibungpa Boaza, a siehlawhai laia sin i va thawna kha a um an naw maw? Ngai ta, zăna hin a hrizawlah barli a zâp fai ding a nih. 3 Insil fai la, rimtui innăl la, i thuom thra tak hak la, hrizawla chun zu fe la, faa a dawn zo hma chun i um a nih ti inhriettir naw rawh. 4 A zâl pha leh a zàlna hmun chu inchik la, a ke tienga puon chu hâwk la, a ke bula chun zâl la, i thaw ding chu lo hril a ti che” a ta. 5 Ruthi chun, “I ti ang tak chun thawng ka tih” a ta. 6 Chuongchun, hrizawla chun a fe a, a tarpi hril ang charin iengkim a thaw a. 7 Faa a dawn zo chun Boaza chu a hlim hle a, bu vùm sira chun a zâl ta a. Ruthi chun damten a va pan a, a ke tienga puon chu a hâwk a, a zâl ve ta a. 8 Zan thrangah Boaza chu thil iengin amanih a chok har a. A hang inher chun a ke bulah nuhmei a lo zâl zing el a. 9 Ama chun “Tu’m i na?” a ta. Nuhmei chun, “I siehlaw Ruthi ka nih. Mi’n tlantu ding laichin bul i ni leiin i siehlaw hi i puon mi’n zâwnpui ve rawh” a ta.
10 Ama chun, “Ka naunu, LALPAN mal sawm che raw se. Mi rethei amanih hausa amanih tlangval i zui naw leia a hmaa i mi suklawmna nêk daiin voizana ngilneina i hung inlangtir hin a mi suklawm a nih. 11 Chuleiin, ka naunu, tri naw rawh, i hni po po chu thawpêk ka ti che. Hi khuoa mi po po hin nu inzaum tak i nih ti an hriet. 12 Amiruokchu, i laichin hnai ni lang khom, keima nêka laichin hnai lem intlantu ding che a um a, zinga hin a’n tlan nuom che leh a thra ni’ng a ta, intlan a ti che a. A’n tlan nuom naw che a ni ruok chun, LALPA hring zing hmingin thu ka tiem che a, intlan ngei ngei ka ti che. 13 Zing tieng chenin hi taka hin zâl ve phot rawh” a ta.
14 Chuongchun, a ke bula chun zing tieng chen a zâl a, sienkhom tu khomin an hriet thei hmain a tho a, “Hrizawla hin nuhmei a hung ti tu khomin hre naw raw hai se” a ta. 15 Boaza chun, “I silpuon kha hlîp la, hung daw rawh” a ta, barli kilogram sawmhni ding lai a sungpek a, a’n phurtir a, khuo tieng chun a kîr ta a. 16 In a tlung chun a tarpiin, “Ka naunu, iem i zu chang a?” a lo ta. Ama chun a chunga thil a lo thaw dan po po chu a hril a. 17 “Hi, kilogram sawmhni ding lai barli a mi pĕk a, ‘I tarpi kuomah kut ruokin i kîr ding a ni nawh’ a mi ti a nih” a ta. 18 A tarpi chun, “Ka naunu, ieng tin am thil a hung um ding i hriet hma chun nghâk ringot el rawh; voisun hin chu thil chu a sukfel hma chun chu pa chu a to mei mei teu awm si nawh” a ta.