2 Boaza’n a khaw upa mi sawm a hung thruoihai kuoma chun, “Hi taka hin inthrung ei tiu khai” a ta, a ti ang chun an inthrung a. 3 A laichin hnai, an sungkuo ro intlantu ding kuoma chun, “Naomi kha Moab rama inthokin a hung kìr nawk a, ei unaupa Elimelek ram kha zor a tum a. 4 Chuleiin, hi taka inthrunghai le upahai mithmua ngei hin ram chu inchaw rawh. I’n tlan nuom chun intlan la, i’n tlan nuom naw chun ka hrietah mi hril rawh. Nang naw chu tu khom intlantu ding awm an um naw a, kei hi i dota intlantu ding chu ka nih ti inhriettir che trûlin ka hriet” a ta. Ama chun, “Intlan ka tih” a ta.

5 Boaza chun, “Naomi-a inthoka ram i’n chawk nia inthokin pasal chân tah, Moab mi Ruthi laka mithi hming re loa a ro hluotu ding an um pei theina dingin ama chu i’n tlan sa bok ding a nih” a ta. 6 A laichîn bul chun, “Keima ta ding chun intlan thei naw ning, ka’n tlan chun keima ro hluotu ding tieng sukkhawhlo rawi ka tih. Intlantu ka nina ai chu nangin chang el rawh, kei chun ka’n tlan thei naw a nih” a ta.

7 In le lo le ro intlanna ding le neitu nina hming inthleng felna dinga tiena inthoka Israelhai thaw dan chu, pheikhok an hlìp a, a changtu kutah an pèk a, chu chu an thil inthleng an namnghet dàn a nih. 8 Chuong ang chun a laichîn bul chun Boaza kuomah, “Nangman i ta dingin intlan lem el rawh” a ta, a pheikhok a hlîp a.

9 Boaza chun upahai le mipui po po kuomah, “Voisun hin in rêngin Elimelek thil nei po po le Kilion le Mahlon thil nei po po Naomi kuta inthoka kan chawk hi a mi hrepuituhai in nih. 10 Chu chau chu ni loin, mithi chu a hming rè loa rohluotu siempêk ding le mithi chu a unauhai laia le a umna hmun kul kotkhara a hming a bo nawna dingin, Moab nuhmei Ruthi, Mahlon nuhmei chu ka nuhmei dingin ka’n chawk a, chu chu voisun hin nangni hi mi hrepuitu in nih” a ta.

11 Chun, kul kotkhara mipui po po le upahai chun, “Hrepuitu kan nih. Rachel le Lea, Israel sungkuo indintu pahnihai ang bok khan i ina nuhmei hung lut chu LALPAN siem ve sien la, Efrat-a hin ngirhmun neiin, Bethlehema hin hmingthang takin hung um raw se. 12 LALPAN hi nunghak laka chithla a la’n dinpek ding che lei hin i sungkuo chu Tamar-in Juda laka a hring Perez ang kha hung ni raw se” an ta.

13 Chuongchun, Boaza chun Ruthi chu a thruoi a, a nuhmei a hung ni ta a, LALPAN nau a’n paitir a, naupa a nei a. 14 Nuhmeihai chun Noami kuomah, “Voisun chena laichin hnai sansuoktu tlasam loa inumtirtu che LALPA chu inpâkin um sien la, i tupa chu Israelhai lai hin a hming hung inthang raw se. 15 Ama chu i hringna tungdingtu ding le i tar tienga chawmtu che hung ni’ng a tih. I mo, nangma hmangaitu che, naupa pasari nêka i ta dinga thra lem chun, ama chu a hringpĕk ta si che a” an ta.

16 Naomi chun naute chu a lâk a, a mal chungah a pom a, a enkol a. 17 An tuolbawm nuhmeihai chun, “Naomi’n naupa a nei” an ta, a hmingah Obed an sak a. Ama chu Davida pa Jesai thlâtu a nih. 18 Perez sungkaw inthla sawng dan chu: Perez-in Hezron a hring a; 19 Hezron chun Rama a hring a; Rama chun Aminadab a hring a; 20 Aminadab chun Nason a hring a; Nason chun Salmon a hring a; 21 Salmon chun Boaza a hring a; Boaza chun Obed a hring a, 22 Obed chun Jesai a hring a; Jesai chu Davida pa a nih.