3 Chuongchun a fe a, bu sîktuhai lăk hmai chu an hnunga chun a rût khăwm a. Elimelek thlaa mi Boaza loa ngei chun a va fè fûk hlauh el a. 4 Chu lai tak chun Bethlehema inthokin Boaza chu a hung tlung a, “LALPA chu in kuomah um raw se” tiin bu sîktuhai chu a chibai a. Anni chun, “LALPAN mal sawm che raw se” tiin an bŭk lĕt a.

5 Boaza chun sinthawhai inrawitu kuoma chun, “Hi nu hi khaw lai nunghak am a na?” a ta. 6 Ama chun, “Moab mi Naomi le hung an nih. 7 ‘In bu lak hmai mi’n khâwmtir ro. Buphal an inkhawm zona hmun hmunah hung dap pei ka tih’ a ta, a fe a, deihlimah sawt naw te a châwl met ti lo chu zing tienga inthok khan tu chen hin ngûk takin a thaw ngar ngar a nih” a ta.

8 Boaza chun Ruthi kuomah, “Ka naunu, ngai ta, mi dang loa chu bu làk hmai zongin fe naw la, hi loa inthok hin inson naw la, ka siehlaw nunghakhai hnung hi zui zing rawh. 9 An bu sìk hi en zing la, nunghakhai hnunga hin zui pei la, tlangvalhai hin ieng khom law lo ding chein thu ka pêk hieu an tah. I dang a châr phât leh tui bela tlangvalhai tui chawi sa hi i dawn hlak ding a nih” a ta.

10 Ama chu a kûn a, hnuoi sikin a bokkhup a, a kuomah, “Kei hi hnam dang mi ni bok si, nangin mi ngaiven nuom a, i mit tlunga i mi sie el hi ieng tizie am a na?” a ta. 11 Boaza chun, “I pasal thia inthoka i pi chunga i thilthaw po pohai le i nu le pa le i piengna ram maksana kha hmaa i mi hriet ngai lohai kuoma chêng dinga i hung dàn thu po po miin an mi hril a. 12 LALPAN i thilthaw po po chu rul sien la che, a thla hnuoi i hung bĕl, LALPA, Israelhai Pathien chun i thrat man chu pe treu raw se che” a ta.

13 Ruthi chun, “Pu, i ditsak hlaw zinga um ka nuom. I siehlaw laia pakhat tluk khom hi ka ni naw lai zingin, i siehlaw hi ngilnei taka bein i sukthlamuong si a” a ta.

14 Sunbu fak huna chun Baoza’n a kuomah, “Hung la, bei hung fa la, uoiin thûra hin inchie ve rawh” a ta. Bu sîktuhai le an ot tlàng lai chun beipĕr a pêk a, a khop tawk a fâk hnung khom chun fàk sĕng lo a la um a. 15 Bu sîk hmai zong dinga a tho hnung chun Boaza chun a mihai kuomah, “Buphal inkhawmtuhai laia a’n khawm ve khomin hal naw ro 16 Chun, buphal têla mihai khom pot suokin maksanpek unla, inkhawm pei sien, hal naw ro” tiin thu a pêk a.

17 Chuongchun, loa bu lak hmai chu zan tieng chenin a zong a, a lak khawmhai chu a vuok a, kilogram sawm lai a tling a. 18 Bu chu in tieng a phur a, a tarpi chun a bu zong khawm chu a lo hmu a, chun sŭna a bei fàk băng chu a phor a, a pêk a. 19 A tarpi chun, “Voisun khan tuhai lo am bu lak hmai i zong a? A lo ngaisaktu che chu malsawmin um raw se” a ta. Ama chun a lo fèna chu a hril a, “Voisuna ka fèna lo neitupa hming chu Boaza a nih” a ta. 20 Naomi chun a mo kuomah, “LALPA, la dam lai le thi ta hai chunga a lunginsietna chuoi loa inlangtirtu chun ama chu mal sawm raw se” a ta. Naomi bok chun, “Chu mipa chu kan sungkuo inhnaipui, kan laibung bul a nih” a ta.

21 Moab mi Ruthi chun, “A lo ni ngei chu tie! ‘Ka buhai an sìk zo hmâ khat ka sinthawtuhai lai hin thrang ve zing rawh’ a mi ti nghé nghè a nih” a ta. 22 Naomi chun a mo Ruthi kuomah, “Ka naunu, lo danga chu an lo tawk pal el thei che leiin, a siehlaw nunghakhai lai chun um la, i ta dingin thra’ng a tih” a ta. 23 Chuongchun, a tarpi leh khawsain, barli le huit an sìk zo chenin Boaza siehlaw nunghakhai lai chauh chun bu lâk hmai zongin a fe hlak a.