RUTHI
Moab ramah Elimelek a’n pèm
1
1 Rorêltuhaiin ro an rĕl laiin a ramah trăm a tla a. Judai ram Bethlehema inthokin mi pakhat chu a nuhmei le a naupa pahnihai thruoiin Moab ramah iemani chen um dingin a fe a. 2 Chu mipa hming chu Elimelek, a nuhmei hming chu Naomi, a naupa pahnihai hming chu Mahlon le Kilion, Judai ram Bethlehema Efrat mi an nih. Moab rama chun an fe a, chu taka chun an um ta zing a.3 Naomi pasal Elimelek chu a thi a, ama le a naupa pahnihai chauh chu an ni ta a. 4 A naupahai chun Moab mi nuhmeiin an nei a, pakhat hming chu Orpa a na, pakhat dang hming chu Ruthi a nih. Chu taka chun kum sawm vel an um a. 5 Chun, Mahlon le Kilion khom chu an thi ve ve a, Naomi chu pasal bo le nau bo a hung ni ta a.
Bethlehemah Naomi le Ruthi an kìr
6 LALPAN a mihai hung kanin fàk ding a pêk nawk tah ti Moab rama inthoka Naomi-in a lo hriet chun, a mohai leh Bethlehem tieng kir nawk dingin a’n siem a. 7 A umnaa inthok chun a mo pahnihai leh Judai ram panin an suok a. 8 Naomi chun a mohai kuomah, “In nu in, in in tieng vé vè panin kir nawk ta ro. Mithi chunga le ka chunga in thaw ang bok khan LALPAN in chungah ngilnei takin thaw ve raw se. 9 LALPA chun in pahniin hadam taka in khawsakna ding pasal dang pe chêu raw se” a ta. Chuongchun, inthrèna dingin a fawp tawl a, inring takin an trap a. 10 A mohai chun, “Fe nawng kan tih, i kǐrna ding i chipuihai kuoma chun hung ve lem kan tih” an ta.
11 Naomi ruok chun, “Ka naunuhai, kîr el lem ro. Ieng leiin am in mi zui ding? In pasal ding nau dang ka la pai thei ding am a ni? 12 Ka naunuhai, kîr el lem ro, pasal dang nei dingin ka upa talaw tah. Ka ta dinga beiseium khom lo ni ta hrim sien, voizàn hin pasal neiin nau nei khom ni ta hrim lang, 13 an puitling chenin pasal nei loin in nghak el ding maw? Ni lo e, ka naunuhai, chu chu ni thei naw nih. LALPA kut ka chungah a tla leiin, nangni chan nĕkin ka chan hi a kha lem a nih” a ta.
14 Chuongchun an trap nawk rak a. Orpa chun a tarpi chu a fâwp a, Ruthi ruok chun a kuo tlat a. 15 Naomi chun, “Ngai ta, i mo chanpui chu a chihai kuom tieng le a pathienhai kuom tieng a kir nawk ding a na, nang khom ama ruolin kir nawk el rawh” a ta.
16 Ruthi ruok chun, “Nangma thrè ding che le nang zui loa kîr ding chun mi ti ta lul naw raw khai. I fĕna taphotah hung ka ta, i riekna taphotah riek ka ta, i chihai chu ka chihai ni’ng an ta, i Pathien chu ka Pathien ni’ng a tih. 17 I thinaa chun thi’ng ka ta, chu taka chun an mi phùm ve el ding a nih. Nang le kei hi thina chauh naw chun thil dangin a mi thrè ding chun, ieng anga nasa khomin LALPAN a láw làw mi law el raw se” a ta. 18 Ruthi chun zui a tum tlat ti Naomi’n a hriet chun a ti zui ta naw a.
19 Chuongchun, an pahni chun Bethlehem an tlung chenin an fe pei a. Bethlehem an tlung chun anni leiin a khawnawtin an phul a, nuhmeihai chun, “Hi hi Naomi kha a ni naw maw?” an ti sup sup a.
20 Ama chun, “Naomia mi ti ta naw ro, Mara mi ti ta lem ro, LALPA chun ka hringnun hi kha takin a siem ta si a. 21 Sung kimin ka fe suok a, kut ruokin LALPAN a mi hung thruoi kìr a. LALPA chun a mi sukrinum a, Iengkimthawthei chun ka chungah vangduoina a’n tlaktir a, ieng leiin am Naomi in mi la ti zing ding?” a ta.
22 Chuong ang chun Naomi chu Moab rama inthokin a mo Ruthi, Moab mi le chun barli an sìk tran laiin Bethlehemah a hung tlung tah a nih.