Bokimah angel a hung
2
1 LALPA vantirko chu Gilgal khuoa inthokin Bokim khuoah a hang fe a, an kuomah, “Aigupta rama inthokin ka thruoi suok chêu a, in pi le puhai kuoma inkhâm meua pĕk ka tiem rama chun ka thruoi lut chêu a. Ka hril tah ang khan, in kuoma ka thuthlung kha bawse naw top ka tih. 2 Hi rama umhai le hin thuthlung siem lo ding le an maichămhai sukchimpek vong dingin thu ka pêk chêu a, sienkhom ka thupêk in zawm nawh. Ieng leia hieng thil hi in thaw am a na? 3 Chuleiin, tuhin anni chu hnot suokpèk ta nawng ka ti chêu. In nàka suntu hling hung ni’ng an ta, an pathienhai chu in ta dingin châng ni’ng an tih” a ta.4 LALPA vantirkoin Israel thlahai po po kuoma chuong thuhai a hril zo chun Israelhai chu inring takin an trap a. 5 Chu hmun hminga chun ‘Bokim’a an inbùk a. Chu hmuna chun LALPA kuomah hlănbiek an inhlăn a.
Josua thi thu
6 Josua-in mipuihai an trǐntir hnung chun Israel thlahai chu mani chanpuol seng ram chu hluo dingin an fe a. 7 Josua dam sung chun Israelhai chun LALPA rong an bawl hlak a, Josua thi hnung khomin an upahai, Israelhai ta dinga LALPA thilthawpèk hmu phakhai dam sung chu LALPA rong an bawl pei a.
8 Nuna naupa Josua, LALPA siehlaw chu kum za le kum sawm miin a thi a. 9 Gas tlang hmar tieng pang Efraim tlang rama chun ama chanpuol ram sung Timnat-Heres khuoah an phŭm a. 10 Chuong suonhai po po khom chu an thlatuhai kuomah an fe zo ta a; chuonghai hnunga chun LALPA hre lo le Israelhai ta dinga a thilthawhai hre bok lo suon dang an hung um ta a.
Bawsietna le a rà
11 Israel thlahai chun LALPA mithmuah thil suol an thaw a, Baal rong an bawl el ta a. 12 LALPA, an thlatuhai Pathien, Aigupta rama inthoka thruoi suoktu kha an nghatsan a, pathien dang, an kawl le kienga umhai pathien bein chibai an bŭk a. 13 Chuonga LALPA nghatsana, Baal le Astoretb hai rong an bawl lei chun Pathien lungsenna an chok tho a. 14 LALPA chu Israelhai chungah a lungsen a, anni rok hlaktu an kawl le kienga um, an hmĕlmahai kuoma chun a pek suok a, a zor a, an hmĕlmahai chu an ngam thei ta naw a. 15 LALPAN inkhâm meua a lo hril tah angin, râl do dinga an fèna taphotah LALPA kut chu anni chunga chun a se tieng zawngin a tla pei a, namen loin an beidong a.
LALPAN rorêltuhai a ruotpek
16 LALPA chun rorêltuhai a ruotpek a, chuonghai chun roktuhai kuta inthokin an hung san suok hlak a. 17 Chuong sa khom chun rorêltuhai thu chu zawm nuom loin, pathien danghai lakah an uire a, anni chu an biek lem a, an thlatuhaiin LALPA thupĕk an pom le zawm hlak ang khan thaw loin inrang takin an petsan nawk hlak. 18 An ta dinga rorêltu LALPAN a siempek taphot kuoma chun LALPA chu a um a, nêksawrtu le sukrimsituhai hnuoia an inrŭm phâ leh LALPAN a lunginsiet tawl tlat si leiin, rorêltu dam sung po chun an hmĕlmahai kuta inthokin a san suok pei hlak. 19 Amiruokchu, rorêltu a thi pha leh mipui an hnungtol nawk a, an thlatuhai nêka nasa lemin pathien danghai rong bawlin chibai an bŭk a, an thil suol thaw chǐng le lulul insuo chu an ma chuong bok nawh.
20 Chuleiin, LALPA lung chu Israelhai chungah a sen ta hle a, “Hi hnamhai hin an thlatuhai kuoma thu ka pĕk, ka thuthlung chu an bawsiet a, ka thû khom an ngaithlak ta naw leiin, 21 kei khomin tuta inthok chu Josua thi hmaa ka hnot suok tah hnamhai ti bâk kha chu hnot suokpĕk ta naw ning. 22 Hieng Israel thlahai hin an thlatuhaiin LALPA dàn an hraw ang khan an hraw ve ding le ding naw fiena dingin anni chu hmang tawl lem ka tih” a ta. 23 Chuong ang chun LALPAN chuong hnamhai chu Josua kutah pe ta loin, Josua thi hnung khoma inhnot suoktir el loin, a rama chun a’n umtir tah a nih.