Josua inthlăna thucha
23
1 LALPAN Israelhai chu an kawl le kienga hmêlmahai laka inthoka muongna a pĕkna chu hun sawt rei a lo ni ta a, Josua khom hung upain a tar ta hle a. 2 Josua chun Israel upahai, thruoituhai, rorêltuhai le hotuhai chu a ko khawm a, an kuomah, “Ka upa tain ka kum khom a lo tam ta a. 3 LALPA in Pathienin hieng hnamhai po po chunga nangni leia a thaw danhai kha in hmu a, LALPA in Pathien chun ama ngeiin a dopek chêu a ni kha. 4 Jordan vadung le thlang tieng Tuipui Lien chena hieng hnam la umhai le ka sukbohmangpek ta po po chêu ramhai chu nangni hnam rochanah ka ruot fel vong tah kha hre zing ro. 5 Anni chu in hmaa inthokin LALPA in Pathien ngei chun hnot suok vong a ta, in mithmu ngeiah nam dok tawl a ta, LALPA in Pathienin a tiem chêu ang khan an ram chu hluo’ng in tih.6 “Chuleiin, hrât takin um unla, Mosie dan lekhabua chuong po po hi voi tieng amanih chang tieng amanih in pĕtsan nawna dingin fimkhur takin zawm ro. 7 Nangni laia hnam la umhai le hin inpolsop naw ro; an pathien hminghai lam naw unla, an hmingin inkhâm naw unla, an rong bawl naw unla, an hmaah bokkhup bok naw ro. 8 Tuta chena in um ang hin, LALPA chu chel nghet tlat ro. 9 LALPA chun in hmaa hnam ropui le hrât tak tak hai a hnotsuokpek chêu a, nangni dal theitu cheu voisun chen hin tu khom an um nawh. 10 A tiem tah angin LALPA chun a dopui chêu leiin nangni laia mi pakhat khomin a sang tèl in hnot zâm el a ni khah. 11 Chuleiin, LALPA in Pathien hi hmangai dingin fimkhur ro.
12 “Amiruokchu, LALPA chu in nghatsan a, hieng hnam tam tak, nangni laia la umhai leh hin inkeizap a, nuhmei pasala innei tuo a, in inkoppui vai chun, 13 LALPA in Pathienin hieng in hmaa hnamhai hi hnotsuokpek ta naw ni chêu ti hre chieng ro. LALPA in Pathienin a pĕk chêu ram thra taka inthoka a sukchimit vong hmâ khat chu anni chu in ta dinga bil le châng, in ruongzăng ta dinga vuokna hmol, le in mit ta dinga hling hung ni lem an tih ti chieng takin hre ro.
14 “Tu hin leilung dan angin kei chu ka liem ve ding a ni tah. LALPA in Pathienin in chungchang thua thil thra a tiemhai po po a tlung kim naw pakhat khom a um nawh ti lungril le ngaituona po poin in hriet. A tiem taphot chu a hung tlung kim vong a, pakhat khom inkhêl a um nawh. 15 LALPA in Pathienin thil thra a tiemhai po po a hung tlung kim tah ang bok hin, LALPA in Pathienin hi ram thra tak a pek cheua inthoka a sukbohmang vong cheu hma khat chun thil thra lo in chunga hung tlung thei a hrilhai po po khom kha la hung intlungtir a tih. 16 LALPA in Pathienin a thuthlung zawm dinga thu a pĕk chêu chu bawse a, ama chu fesan a, pathien danghai rong bawl a, an hmaah in kûn vai chun, LALPA lungsenna chu in chungah inling a ta, ram thra tak a pĕk chêua inthok hin sukbohmang nghal a ti chêu” a ta.