Jordan sak tienga kir nawkhai
22
1 Josua chun Reuben hnam, Gad hnam le Manase hnam zatve hai chu a ko a, 2 an kuomah, “LALPA siehlaw Mosien thu a pèk taphot chu in zawm pei a, ka thupêkhai khom in zawm pei a, 3 hun sawt taka inthok khan voisun chen hin in unauhai thlàthlam loin LALPA in Pathienin thaw dinga a ti chêu chu in hlen pei a. 4 Tu hin LALPA in Pathienin a lo tiem tah angin, in unauhai khomin muongna an lo chang ve tah leiin LALPA siehlaw Mosien Jordan rala in chanpuol dinga ram a lo pĕk tah chêua chun in puon in tieng kir nawk ta ro. 5 Amiruokchu, LALPA in Pathien chu hmangai a, a lampui po po hraw a, a thupekhai chu zawm a, ama chu chel tlat a, lungril po po le thlarau po poa a rong in bawl zing theina dingin LALPA siehlaw Mosien dàn thu a pekhai chĕu kha fimkhur takin kengkaw tlat ro” a ta. 6 Josuan anni chu mal a sawm a, a’n fetir a, an in tieng an kir nawk ta a. 7 Manase hnam zatve chanpuol chu Basan ramah Mosien ram a lo pĕk tah a, an chanpuol zatve dang chu Jordan ral thlang tieng an unauhai lai Josuan ram a pêk a. 8 In tieng a’n kirtir tawm chun Josuan, “In puon in tieng ran ruol tam tak leh, tangkaruo le rangkachak, dâr le thîr le silfen tam tak leh hnienghnâr takin kir nawk ta unla, in hmĕlmahai laka in răllăkhai hi in unauhai leh insem tlâng ro” tiin malsawmnain a’n thla a.9 Chuongchun, Reuben thlahai, Gad thlahai le Manase hnam zatve hai chun Israel thlahai chu Kanan rama Silo khuoa inthok chun maksanin Gilead ram, anni ram, Mosie hmanga LALPAN thu a pĕk anga an hluo ram tieng chun an kir nawk ta a.
Jordan kamah maicham an indin
10 Kanan ram Jordan ruom bula Gelilot hmun an hung tlung chun, Reuben thlahai, Gad thlahai le Manase hnam zatve hai chun vadung kamah maichăm ropui tak le langsar tak el an siem a. 11 Kanan ram bul tak, Jordan thlang tieng, Israel thlahai rama um Gelilot hmunah Reuben thlahai, Gad thlahai le Manase hnam zatve haiin maichăm an siem ti thu chu Israel mi danghai kuoma chun an hung hril a. 12 Israel pungkhawmhaiin an lo hriet chun, anni chu do dingin Silo khuoah an hung tlăn khawm a.
13 Thiempu Eleazar naupa Finehas chu Israel thlahai chun Reuben thlahai, Gad thlahai le Manase hnam zatve hai umna Gilead rama chun an tir a. 14 Ama ruol chun Israel hnam tina lû tak nina chel seng mi sawm an tir sa bok a. 15 Reuben thlahai, Gad thlahai le Manase hnam zatve hai kuomah Gilead rama chun an fe a, an kuomah, 16 “LALPA mi pungkhawmhai po poin, ‘Hieng el hin ieng tin am Israel Pathien laka in ringna chu a’n phet ding a na? Iengtin am LALPA chu nghatsana helin, nangni ta dingin maichăm chu in insiem el a na? 17 Peor-a an thil suol thaw hman kha a huntawk ta vei leh! LALPA mihai chungah hripui an leng hiela chu, tu chen khom hin kha taka ei bawsietna kha ei la tleng fai zo naw a ni si a. 18 Tu hin LALPA chu in nghatsan nawk an ta naw maw? Voisun hin LALPA lakah in hel chun, zinga hin Israel sungkuo chungah lungsen a tih. 19 In ram hluo hi a porche a ni chun, LALPA ram sung, LALPA biekbuk umnaah hung um unla, ram chu ei intlâng el ding a nih. Amiruokchu, LALPA kan Pathien maichăm ti lo maichăm dang hrim hrim siem zawngin LALPA lakah hel naw unla, keini lakah hel bok naw ro. 20 Zera naupa Akan-in hluihlawn thila thupêk a bawsiet lei khan Israel mipui po po chungah lungsenna a tla a ni naw maw? A suolna kha ama chauin a thipui naw kha’ an ti a nih” tiin an hril a.
21 Reuben thlahai, Gad thlahai le Manase hnam zatve hai chun Israel hnam tin luhai kuoma chun, 22 “LALPA ropui chu LALPA Pathien a nih. LALPA ropui, LALPA Pathien chun a hriet. Israelhai khomin hre raw hai se. Hi kan thilthaw hi LALPA laka helna le bawsietna a ni chun, voisun hin mi hlà dêr naw ro. 23 LALPA nghatsan tuma keini ta dinga pumraw thilhlân amanih, bu le bâl thilhlân amanih le inremna thilhlân inhlànna dinga maichăm kan insiem a ni chun LALPA ngeiin kan chungthu ngaituo raw se.
24 “A nih, mi hlà teu naw raw se! Nakie hin in thlahaiin kan thlahai kuomah, ‘Nangni hin LALPA, Israelhai Pathien hi in hmang phak vena ding iem a um a? 25 Nangni Reuben thlahai le Gad thlahai, LALPAN nangni le keini ramri dingin Jordan vadung hi a siem a na, LALPAA hin chanpuol in nei ve hrim hrim nawh’ la hung ti hlauh rawi an ta, kan thlahai chu LALPA tri nachang hre loin siem pal an tih ti inlauna leia fimkhur thu hlaah hi thil hi kan thaw a nih. 26 Hi maichăm kan siem hi pumraw thilhlân inhlànna ding amanih le hlànbiekna ding amania kan siem a ni nawh. 27 Chuong nêk hmanin, nangni le keini chun LALPA chu a Hmun Thienghlima ngei chawibiekin, pumraw thilhlân le hlanbiekna thilhlân dang danghai chu ei inhlàn lem hlak a nizie eini le ei thlahai inkara inchikna dinga kan thaw a nih. Chuongchun, nakie hunah in thlahaiin kan thlahai kuomah, ‘LALPA-ah chan ieng khom in nei ve nawh’ an la hung ti nawna ding a nih.
28 “Hi thil hi a hung tlung pal hlauh a ni khomin, kan thlahai chun, ‘En ta u, ei thlatuhai khan LALPA maichăm ang ang an siem hi. Hi maichăm hi pumraw thil inhlànna ding le hlànbiekna dang thawna dinga an siem a ni nawh; nangni le keini inkara hrepuitu dinga an siem a nih’ an la hung ti thei ding thil ngaituoa kan thaw a ni lem. 29 LALPA chungah helin, LALPA chu voisun hin nghatsan nawng kan ta, a biekbuk hmaa LALPA ei Pathien maichăm ti ngot naw chu pumraw thlihlân le thilhlân dang dang hai inhlànna dingin maichăm dang siem naw top kan tih” an ta.
30 Thiempu Finehas le ama le hung mipui hotu, Israel hnam tin luhaiin Reuben thlahai, Gad thlahai le Manase thlahai thukhawchang an hriet chun an lawm hle a. 31 Thiempu Eleazar naupa Finehas chun Reuben thlahai, Gad thlahai le Manase thlahai kuoma chun, “LALPA chungah in bawsiet naw leiin LALPA chu voisun hin ei kuomah a um ti ei hriet ta a, Israel thlahai chu LALPA hremna kut lakah in sansuok tah a ni hi” a ta.
32 An inbiek zo chun thiempu Eleazar naupa Finehas le hotuhai chu Reuben thlahai le Gad thlahai umna Gilead-a inthok chun Kanan ram tieng an kir nawk a, Israelhai kuomah an thu hawn chu an hril a. 33 An thu hriet chun a suklawm hle a, Pathien an inpâk a, Reuben thlahai le Gad thlahai umna hang rùn a, sukchimit vong ding ti thu hrim an hril ri ta nawh.
34 Reuben thlahai le Gad thlahai chun maicham hmingah Ed an inbuk a, chu chu ‘LALPA chu Pathien a nizie eini inkara hrepuitu a nih’ tìna a nih.