2 Josua chun mi po po kuomah, “Hieng hin LALPA, Israel Pathien chun a hril: ‘Tiena tlanga in thlatuhai, Abraham le Nahor pa Tera chen kha, Vadungpui khêl tieng an um a, pathien dang an biek hlak a. 3 Amiruokchu, in pu Abraham chu a umna Vadungpui khĕla inthokin ka thruoi suok a, Kanan ram sung po po-ah ka thruoi a, chi thla tam tak ka pêk a, Isak khom ka pêk a ni kha. 4 Isaka inthokin Jakob le Esau ka pêk nawk a. Seir tlangram chu Esau chanpuol dingin ka pêk a, Jakob le a nauhai ruok chu Aigupta ramah an fe thla a.

5 “‘Chun, Mosie le Aron ka tir a, Aigupta ram chu thil mak thawa ka hrem zo hnungin ka thruoi suok chêu a. 6 Aigupta rama inthoka ka thruoi suok hnung cheuin tuipui in va tlung a, Aigupta mihai chun in thlatuhai chu tawlailir le sakor chungchuong mihai leh Tuipui Sen chen an hung hnot a. 7 Anni chun thrangpuitu dingin LALPA an ko a, Aigupta mihai le nangni inkara chun thimpui ka’n tlaktir a; chun, anni chu tuipuiin ka’n tuomtir a, a chim pil ta vong a. Aigupta mihai chunga ka thaw po po chu mit ngeiin in hmu vong a ni kha. Chu zoah thlalĕrah hun sawt tak in khawsa a.

8 “‘Jordan vadung sak tienga um Amor mihai ramah ka thruoi tlung chêu a. An lo do chêu a, sienkhom in kutah ka pêk tawl a. In mithmua ngei ka sukbohmang tawl a, an ram ka lakpek a. 9 Moab lal Zipor naupa Balak-in a do ding lai chêu khan trongsie inphurtu ding chêuin Beor naupa Balaam chu a ko a. 10 Amiruokchu, Balaam thu chu ka ngaithlakpèk naw a, nangni mal a sawm ta lem hlauh chêu a, a kuta inthokin ka sansuok chêu a ni kha.

11 “‘Chu zoah Jordan in kăn a, Jeriko in hung tlung a. Jeriko khuohai chun an lo do chêu a, chuong ang bokin Amor mi hai, Periz mi hai, Kanan mi hai, Hit mi hai, Girgas mi hai, Hiv mi hai le Jebu mi hai chun an do chêu a, sienkhom in kutah ka pêk tawl vong a. 12 In hmaah khuoingal hon ka tir a, in hmaah anni chu an hnot hmang a, Amor lal pahnihai ngei khom kha, in kawlhnàm amani le in thalngul lei amania zâm an ni nawh. 13 In thaw sawl thrak lo ram le nangni bawl ni dêr lo khawpuihai ka pêk chèu a, chu taka chun in um a; in chìng sawl khom ni lo grêp huon le oliv huona mi in fak a ni hi’ tiin.

14 Josua chun a hril pei a. “Chuleiin, LALPA chu tri unla, ti tak zet le indik takin a rong bawl unla, in thlatuhaiin Vadungpui răl le Aiguptaa an biek hlak pathienhai kha pei hawn vong unla, LALPA rong chauh bawl ro. 15 LALPA rongbawl hi thra lo awma hrie in um a ni chun, tu rong am in bawl ding, Vadung râla in pi le puhaiin an rong an bawl hlak pathienhai rong am, annawleh tuta in umna Amorhai rama an pathienhai rong lem in bawl ding ti voisun hin thlang ro. Kei le ka sunghai ruok hin chu LALPA rong a nih kan bawl ding” a ta.

16 Mipui chun, “LALPA Pathien maksana pathien danghai rong kan bawl chu thil hnâi lo a nih. 17 LALPA kan Pathien ngei chu annawm keini le kan thlatuhai Aigupta bawia inthoka mi thruoi suok a, kan mithmu ngeia thilmak nasa tak thaw a, kan inzin sung po po le lampuia hnam tam tak kan pal tlanghai laka khom mi huolhimtu chu. 18 LALPA chun kan hmaah hnam po po, chu rama um Amor-hai ngei khom chu, a hnot suok vong a nih. Chuleiin, keini khomin LALPA rong a nih kan bawl ding; ama chu kan Pathien a ni si a” tiin an don a.

19 Josua chun mipui kuomah, “LALPA rong chu in bawl thei ngŭt dim maw! Ama chu Pathien thienghlim a na; ama chu Pathien thîkthu sie a nih. In helna le in suolnahai ngaidam naw nih. 20 LALPA chu nghatsan a, ram dang mi pathienhai rong in bawl vai chun, in chunga a thrat zing lai hin hung ngha lêt thut a ta, in chungah sietna intlunin sukbohmang a ti chêu” a ta.

21 Mipuihai ruok chun Josua kuomah, “Ni lo e, LALPA rong a nih kan bawl ding chu” an ta. 22 Josua chun, “LALPA rongbawl inthlang lem thua hrepuitu chu nangni ngei hi in nih” a ta. Mipui chun, “Ni e, hrepuitu kan nih” tiin an don a. 23 Josua chun, “Chuong a ni leh tu hin ram dang mi pathien umhai po po chu inthiel hmang vong unla, LALPA, Israel Pathien kuoma chun in lungrilhai pe ro” a ta. 24 Mipuihai chun, “LALPA kan Pathien rong bawl kan ta, a thu zawm pei kan tih” an ta.

25 Chu ni chun mipuihai ta dingin Josua chun thuthlung a siem a, Sekema chun an zawm ding thupêk le dànhai chu a pêk a. 26 Hieng thupêkhai hi Josua chun Pathien Danbu-ah a ziek thlak a. Chun, lung lien tak a lâk a, LALPA Hmun Thienghlim bula saisaw kung hnuoia chun a phun a. 27 Mipui kuoma chun, “En ta u, hi lung hi, ei thu mi hrepuitu ni raw se. LALPAN ei kuoma thu a hril po po kha hi lung hin a hriet vong a. LALPA lakah in ringum naw chun hi lung hi nangni kala hrepuitua ngîr ding chu a nih” a ta. 28 Chu zoah Josua chun mipuihai chu anni chanpuol ram sengah a’n kirtir ta a.

29 Chu hnunga chun Nuna naupa Josua, LALPA siehlaw chu kum za le sawm mi niin a thi a. 30 Gash tlang hmar tieng pang, Efraim tlang rama ama chanpuol ramri sung Timnat-sera hmuna chun an phŭm a.

31 Josua dam sung po le ama nêka dam sawt upahai, Israelhai ta dinga iengkim LALPAN a thawpek dan tonhriettuhai an la dam sung po chun Israelhai chun LALPA rong an bawl hlak a.

32 Chun, Israel thlahaiin Aigupta rama inthoka Josefa ru an hung hawn tung chu Sekem khuoa hmun, Sekem pa Hamor nauhaia inthoka Jakob-in tangka zaa ram an chawka chun an phŭm a, chu hmun chu Josefa thlahai rochanin a hung um ta a nih.

33 Aron naupa Eleazar khom chu a thi a, Efraim tlang rama ama puola hmun an pèk, a naupa Finehas rochung tlânga chun an phùm a.