4 A sungkuo kuoa insem dinga thrum vawr chu Kohat chungah a tla hmasa tak a. Levi hnama mi thiempu Aron thlahai chu Juda hnam le Simeon hnam le Benjamin hnam hai chanpuola mi khaw sawm le khaw thum an pĕk a. 5 Kohat thla a danghai po chun Efraim hnam, Dan hnam le Manase hnam zatve chanpuola inthokin khaw sawm an chang a.

6 Gerson thlahai chun Isakar hnam, Aser hnam, Naftali hnam le Basan-a Manase hnam zatve hai chanpuola mi khaw sawm le khaw thum an chang a.

7 Merari thlaa sungkuohaiin Reuben, Gad le Zebulun hnamhai chanpuola inthokin khaw sawm le khaw hnih an chang.

8 LALPAN thu Mosie a pĕk tah angin, chuong khuohai le a sè vela ran tlatna hmunhai chu Israel thlahaiin an chanpuola inthokin Levi hnamhai ta dingin an lo pĕk a nih.

9 An thrum vawr chu Levi chi, Kohat hnama mi Aron thlahai chunga chun a tla hmasa tak leiin, 10 hieng khuohai hi Juda hnam le Simeon hnam chanpuola inthokin an pĕk a: 11 Judai tlangrama Anak pu Arba hming chawi khuo Kiriat Arba (Hebron an ti bok) le a dâi vel. 12 A khaw sè vela lo hmunhai le khawperhai ruok chu Jefune naupa Kaleb rochan dingin an pĕk a.

13 Aron thla thiempuhai chu tuol that palhai tlănna dinga inhumhimna khuoa an ruot Hebron an pĕk băkah Libna dam, 14 Jatir dam, Estemoa dam, 15 Holon dam, Debir dam, 16 Ain dam, Jita dam le Bet Semes khuohai le ran tlatna ding a dâi vêl, arêngin khaw kuo chu Juda le Simeon thlahai chanpuola inthokin an pĕk a. 17 Benjamin hnam chanpuola inthokin khaw li- Gibeon, Geba, 18 Anathot le Almon- hai chu ran tlatna hmun leh an pêk bok a. 19 Aron thla thiempuhai ta dinga khuo le a dâi vêla ran tlatna hmun an pĕk po po chu khaw sawm le khaw thum a nih. 20 Levi chi, Kohat thla danghai po chu Efraim hnam chanpuola inthokin khuo an pĕk a. 21 Chuonghai chu Efraim tlang rama tuol thathai tlănna dinga inhumhimna khuoa ruot Sekem dam, Gezer dam, 22 Kibzaim dam le Bet Horon khuohai le a dâi vêla ran tlatna hmunhai, arêngin khaw li a nih. 23 Chun, Dan hnama inthokin Elteke, Gibethon, 24 Aijalon le Gat Rimon, khaw li le a dâi vêla ran tlatna hmunhai an pêk bok a. 25 Manase hnam zatvea inthokin Tanak le Gat Rimon, khaw hni le a dâi vêla ran tlatna hmunhai chu an pêk bok a nih. 26 Hieng khaw sawm le a dâi vêla ran tlatna hmunhai chu Kohat thla danghai ta dinga pĕk a nih.

27 Levi chia mi Gerson hnamhai chu hieng ang hin pek an nih: Manase hnam zatvea inthokin tuol thathai tlànna dinga inhumhimna khuoa an ruot Basan rama Golan khuo le Be Estara, khaw hnihai le a dâi vêl ran tlatna hmunhai chu an pek a. 28 Isakar hnama inthokin Kishion, Daberat, 29 Jarmut le En Ganim, khaw li le a dâi vêla ran tlatna hmunhai chu an pĕk a. 30 Aser hnama inthokin Misal, Abdon, 31 Helka le Rehob, khaw li le a dâi vêla ran tlatna hmun chu an pĕk a. 32 Naftali hnama inthokin Galili biela inthoka tuol thathai tlănna ding inhumhimna khuo an ruot Kedes bakah Hamot Dor le Kartan, khaw thum le a dâi vêla ran tlatna hmunhai chu an pêk bok a. 33 Gerson hnam chana khuo le a dâi vêla ran tlatna hmun an pĕk po po chu khaw sawm le khaw thum a nih.

34 Levi chia mi Merari thlahai ta dinga an pek po chu: Zebulun hnama inthokin Jokneam, Karta, 35 Dimna le Nahalal, khaw li le a dai vela ran tlatna hmun hai; 36 Reuben hnama inthokin Bezer, Jahaz, 37 Kedemot le Mefat, khaw li le a dai vela ran tlatna hmun hai; 38 Gad hnama inthokin Gilead biela tuol thathai tlanna dinga inhumhimna khuo an ruot Ramot, Mahanaim, 39 Hesbon le Jazer, khaw li le a dâi vêla ran tlatna hmun hai. 40 Chuonghai chu Merari thlahai, Levi chi la um poin an chang chu a na, arêngin khaw sawm le khaw hni a nih.

41 Israel thlahai ram sunga Levi chihaiin khuo le a dâi vêla ran tlatna hmun an hluo po po chu khaw sawmli le khaw riet a nih. 42 Hieng khaw tina hin, a khaw lai khuoa khom, a dâi vêlah ran tlatna hmun a um vong a nih.

43 Chuongchun, an pi le pua inthoka Israel thlahai kuoma LALPAN inkhâm meua pĕk a tiem ram chu an hluo a, umhmun an khuor ta a. 44 LALPAN an thlatuhai kuoma inkhâm meua a lo tiem tah angin, hmun tinah muongna a pêk a, an hmĕlmahai chu an kutah a pêk leiin anni lo dàl thei tu khom an um nawh. 45 LALPAN Israel sungkuo ta dinga thil thra a lo tiemhai po po chu a thlawn hrim um loin a hung tlung kim vong a nih.