Inhumhimna khuohai
20
1 LALPA chun Josua a biek a, 2 “Mosie ka hril tah ang khan, inhumhimna ding khuo ruot rawh. 3 Tu khom tum lawk lei ni loa tuol that paltu chu thisen phuba la tumtu laka a him theina dingin, chu khuoa chun tuoltlân thei a tih ti Israelhai hril rawh. 4 Chuong khuohai laia a ienga khom chun tlân a ta, khawpui lutna kotkhărah va ngîr a ta, chu taka khaw upahai hrietah a chanchin intlun a ta, anni chun khaw sungah thruoi lut an ta, anni laia a chĕng ve theina dingin a umna ding ruotpĕk an tih. 5 A tuolbawm chu a hmaa theidăna nei loa păngpala a that a ni leiin, thisen phubalatu dingin a hung hnot a ni khomin a kutah an lo pĕk ding a ni nawh. 6 Mipui rorêltuhai hmaah ngîra a chungthu rĕl a ni hmâ le chuong laia chu khuoa thiempu chu a thi hmâ khat chun, chu khuoa chun a um zing ding a nih. Chu zoah a hung tlan suoksan khuoa a in le loah kîr nawk thei a tih ti hril rawh” a ta.7 Chuongchun, Galili biel tlangrama Naftali-hai khuo Kedes dam, tlang rama Efraim-hai khuo Sekem dam, tlang rama Juda-hai khuo Kiriat Arba (Hebron) dam chu an ruot a. 8 Jordan ral sak tieng chun Reuben-hai biela thlaler tlang zawla um Bezer dam, Gilead biela Gad-hai khuo Ramot dam le Basan biela Manase-hai khuo Golan dam chu an ruot bok a. 9 Israel thlahai laia mi amanih anni laia um hnam dang mi amanih tu khom tum rêng lei ni loa tuol that paltu chu, thisen phubalatu laka a him theina dingin, mipui rorĕltuhaiin a chungthu an rĕl hmâ khat chun, chuong khaw ruota hai chun tuol tlân thei a tih.