Simeon thlahai chan
19
1 An thrum vawr voi hnina chu Simeon thlahai le sungkuohai chungah a tla a. An chanpuol chu Judahai ram sungah a thrang a. 2 Chuonghai chu Beersheba (Seba), Molada, 3 Hazar Shual, Bala, Ezem, 4 Eltolad, Bethul, Horma, 5 Ziklak, Bet Markabot, Hazar Susan, 6 Bet Lebaot le Saruhen, khaw sawmpathum le an khawperhai dam;7 Ain, Rimon, Ether le Asan, khaw li le an khawperhai le hieng khuohai sè vela khawpui po po, sim tieng rama Balat-Beer chenin.
8 Chuonghai chu an sungkuo dungzui peia Simeon thlahai chanpuol chu a nih. 9 Simeon thlahai chanpuol chu Juda thlahai chana mi a nih, an mamaw baka lien an rochung leiin. Chuongchun, Simeon thlahai chun Judahai chan sunga mi chanpuol chu an dong a nih.
Zebulun thlahai chan
10 Thrum vawr voi thumna chu Zebulun hnam le sungkuohai chungah a tla a. An chanpuol ramri chu Sarid chen a nih. 11 Thlang tieng panin Maralah a pan a, Dabeshet a sir a, Jokneam kawla varuom chen a tlung a. 12 Sarid-a inthokin sak tieng, nisa suokna tieng a’n her a, Kislot Tabor ram a tlung a, Daberat le Jafia chen a fe a. 13 Chu taka inthoka sak tieng pan peiin Gat Hefer le Et Kazin-ah a fe a, Rimon-ah a hung suok a, Nea tieng a pan a. 14 Chu taka inthok chun ramri chu Hanathon hmar tieng panin an her kuol a, Ifta El ruomah a tawp a. 15 Hi bâka hin Katat, Nahalal, Simron, Idala le Bethlehem khuohai khom an thrang sa. A rêngin khaw sawmpahni le an khawperhai an nih. 16 Chuonghai chu Zebulun hnam le sungkuohai chanpuol khuohai le an khawperhai chu a nih.
Isakar thlahai chan
17 Thrum vawr voi lina chu Isakar hnam le sungkuohai chungah a tla a. 18 An ramri chin chu Jezreel, Kesulot, Sunem; 19 Hafaraim, Sion, Anaharat, 20 Rabit, Kision, Ebez; 21 Remet, Enganim, Enhada le Bet Pazez a nih. 22 A ramri chun Tabor, Sahazuma le Bet Semes a tawk a, Jordan vadungah a tawp a, arêngin khaw sawmparuk le an khawperhai an nih. 23 Chuong khawpuihai le an khawperhai chu Isakar hnam le sungkuohai chanpuol chu a nih.
Aser thlahai chan
24 Thrum vawr voi ngàna chu Aser hnam le sungkuohai chungah a tla a. 25 An ram huop chin chu Helkat, Hali, Beten, Aksaf, 26 Alamelek, Amad le Misal an nih. Thlang tieng ramri chun Karmel le Sihor Libnat a zu tlung a. 27 Chu taka inthok chun sak tieng Bet Dagon tieng inherin Zebulun le Ifta El ruom fe thlengin hmar tieng Bet Emek le Neiel tieng a fe a, voi tieng pangah Kabul a fe thleng a. 28 Fe peiin Abdon, Rehob, Hamon le Kana sirin Sidon Lien chen a fe a. 29 Chu taka inthok chun ramri chu Rama tieng a’n her kìr a, kula inhuon Tura khuo a sir a, Hosa tieng a’n her a, Akzib bielah Mediterranean Tuipui a sun a, 30 Uma, Afek le Rehob a sir bok a. Arêngin khaw sawmhni le pahni le an khawperhai an nih. 31 Chuonghai chu Aser hnam le sungkuohai chanpuol khuohai le an khawperhai chu a nih.
Naftali thlahai chan
32 Thrum vawr voi rukna chu Naftali hnam le sungkuohai chungah a tla a. 33 An ramri chu Helep-a inthokin Zananmim-a saisaw thingkung lienah, Adaminekeb le Jamnia fe thlenga Nakum chen va tlungin, Jordan vadungah a tawp a. 34 Chu taka inthok chun ramri chu thlang tieng inherin Aznot Tabor-ah a fe a, chu taka inthok chun Hukok chen a fe a, sim tieng Zebulun leh an inri a, thlang tieng Aser leh an inri a, ni suokna tieng Jordanah an inri bok. 35 Kula inhuon khuohai chu Zidim, Zer, Hamat, Rakat, Kineret, 36 Adama, Rama, Hazor, 37 Kedes, Edrei, En Hazor, 38 Iron, Migdal El, Horem, Bet Anat le Bet Semes an na, khaw sawmpakuo le an khawperhai a nih. 39 Chuonghai chu Naftali hnam le sungkuohai chanpuol khuohai le an khawperhai chu a nih.
Dan thlahai chan
40 Thrum vawr voi sarina chu Dan hnam le sungkuohai chungah a tla a. 41 An chanpuol ram huop sung chu Zora, Estaol, Ir Semes, 42 Salabin, Aijalon, Ithla, 43 Elon, Timna, Ekron, 44 Elteke, Gibethon, Balat, 45 Jehud, Bene Berak, Gath Rimon, 46 Mejarkon le Rakon bakah Jopa khuo sevela ram po po a nih. 47 Dan thlahai hi hmelmahan an ram an lakpek chu an nei nawk el thei naw leiin Lesem khuo an hang rŭn a, an lăk a, kawlhnâma an sukbohmang hnung chun an hluo a, an pu Dan hming chawiin Lesem chu Dan an inbuk a. 48 Chuonghai chu Dan hnam le sungkuohai chanpuol khuohai le an khawperhai chu a nih.
Josua chan
49 Chuongchun, an chanpuol seng ding chu insema an ramri ding an thrè fel hnung chun Israel thlahai chun Nuna naupa Josua chu anni lai chanpuol an pĕk ve a. 50 LALPA thupek angin, Efraimhai tlang rama a khaw dit Timnat Sera chu an pĕk a, chu taka chun khawpui a siem a, a um ta a.
51 Chuonghai po chu a nih Silo hmuna LALPA hmaa Intuokna Puon in kotah thrum vawr a, thiempu Eleazar hai, Nuna naupa Josua hai le Israel thlahai laia hotuhaiin ram an lo sem dan chu. Chuong ang chun ram insem chu an zo tah a nih.