3 Josua chun Israelhai kuomah, “LALPA in pi le puhai Pathienin a pĕk ta chêu ram hi ieng chen am hluo loin in la nghàk ding a na? 4 Hnam tina mi pathum seng thlang suok unla, a ram va fang vel dingin tir suok ka ta, an ram hluo ding seng chanchin hung ziek an ta, chu zoah ka kuomah hung kir nawk an tih. 5 A ram chu hmun sariah thrè phot in ta, Juda thlahai chu sim tienga an chanpuolah um an ta, Josefa sungkuohai chu hmar tienga an chanpuolah um an tih. 6 Ram chu hmun sariah thrè unla, chu chu ziekin mi hung pe unla, hi taka hin LALPA ei Pathien hmaah thrum lo vawrpêk ka ti chêu. 7 Levihai ruok chun nangni lai chan an nei ve naw a, LALPA thiempu nina sin hi an chanpuol a nih. Chun, Gad thlahai, Reuben thlahai le Manase hnam zatve hai ruok chu Jordan ral sak tieng LALPA siehlaw Mosien an chanpuol seng a lo pĕk ta kha” a ta.

8 Ram entu le a um dan ziek thlatu dinghai an suok lai chun Josuan, “Fe unla, ram chu va en chieng unla, a um dan ziek thlain ka kuomah hung kir nawk unla, Silo hmuna hin LALPA hmaah thrum lo vawrpêk ka ti chêu” tiin thu a’n cha a. 9 Mihai chu an fe a, ram chu an va fang a, hmun sariah an thrè a, lekhabuah a khuo po po chu an ziek thlak a, an riebûk Silo-ah chun an hung kir nawk a. 10 Silo-a chun Josuan LALPA hmaah thrum a lo vawrpek a, chu taka chun an hnam inthre dan ang peiin ram chu a sem a.

11 An sungkuo tamzie dungzui peia ram sem dinga thrum an vawr chu Benjamin thlahai chungah a tla hmasa tak a, an ramri chin chu Juda thlahai le Josefa thlahai inkar a nih. 12 Hmar tieng panga an ramri chu Jordan vadungah a’n tran a, ramri chu Jeriko sǐr hmar tieng a fe tung a, chu taka inthok chun thlang tieng panin tlang ramah a fe tung pei a, ramri tawpna chu Bet-aven thlalĕr a nih. 13 Chu taka inthok chun Luz (Bethel) sim tieng pangpĕrah a fe a, Bet Horon tlang chuonhnuoia um Atarot Adar tlângah a fe thlâk pei a. 14 Bet Horon sim tieng tlâng bula inthokin thlang tieng pangah sim tieng panin a fe kuol a, Juda thlahai khawpui Kiriat-Baal (Kiriat-jearim) ah a tawp a, chu chu thlang tienga an ramri chu a nih.

15 Sim tieng ramri chu Kiriat Jearim thlang tieng kotsuoa inthokin a’n tran a, Neftoa tuikhurah a hung suok a. 16 Ramri chu Refaim Ruom hmar tienga um, Ben Hinom ruom epa tlâng thruta chun a liem thla a, Jebuhai khawpui sim tieng pangpĕr zuiin Hinom ruomah a fe thlak a, En Rogel a zu sun a. 17 Chu taka inthok chun hmar tieng a kâwi a, En Semes tieng a fe a, Adumim Kawn epa um Gelilot chen a tlung a, chu taka inthok chun Reuben naupa Bohan Lungphun a zuk sun a. 18 Bet Araba hmar tieng pangpĕr zuiin Araba-ah a fe thlak a. 19 Chu taka inthok chun Bet Hogla hmar tieng pangpĕr a zui thlak a, sim tienga Jordan vadung suo, Tuipui Thi hmar tieng litengsawlah a tawp a. Hi hi sim tieng ramri chu a nih.

20 Sak tieng panga ramri chu Jordan vadung a nih. Chuonghai chu an sungkuo dungzui peia Benjamin thlahai chanpuol kil tina huoltu ramri chu a nih.

21 Benjamin thlahaiin an sungkuo dungzui peia an khawpui hluohai chu Jeriko, Bet-holga, Emek-keziz, 22 Bet-Araba, Zemaraim, Bethel; 23 Avim, Para, Ofra, 24 Kefar-Amoni, Ofni le Geba, khaw sawmpahni le an khawperhai; 25 Gibeon, Rama le Beerot, 26 Mizpa, Kefira le Moza, 27 Rekem, Irpel le Tarala, 28 Zela, Haelep le Jebuhai khawpui (Jerusalem), Gibea le Kiriat, khawpui sawmpali le an khawperhai an nih.