3 Manase naupa chu Makir, Makir naupa chu Gilead, Gilead naupa chu Hefer a nih. Hefer naupa Zelofehad chun naupa nei loin naunu ngot a nei a, chuonghai chu Mahla, Noa, Hogla, Milka le Tirza an nih. 4 Anni chu thiempu Eleazar le Nuna naupa Josua le hotuhai kuoma chun an fe a, “Kan unauhai lai rochan mi pe ve dingin LALPA chun Mosie thu a pêk a nih” an ta. LALPA thupèk angin Josua chun anni chu an pa unauhai lai chun chanpuol a pêk ve ta a. 5 Jordan rala mi Gilead le Basan ram tiem sa loin, Manase chun biel sawm a chang sa a; 6 chu chu a naunuhaiin a naupahai lai chanpuol an nei ve lei a nih. Gilead ram chu Manase naupa danghai chun an chang a.

7 Manase ramri chu Aser-a inthoka Mikmetha, Sekem sak tieng chen a nih. Chu zoah Entapua chenghai huom sa dingin sim tieng a fe a. 8 Tapua sevela ram chu Manase thlahaiin an chang a, ramria um Tapua khawpui ruok chu Efraim thlahaiin an chang a. 9 Ramri chu Kana Korruomah a fe thlàk a. Vadung sim tienga khuohai chu Manase rama um ni hai sienkhom Efraim thlahaiin an chang a. Manase-hai ramri chu vadungte hmar tieng fein Mediterranean Tuipuiah a suok a. 10 Sim tieng pang chu Efraim-hai ta a na, hmar tieng pang chu Manase-hai ta a na, tuifinriet chu thlang tienga an ramri a nih. Aser hnamhai chu hmar thlangah an um a, Isakar hnamhai chu hmar sak tieng an um bok a. 11 Isakar le Aser ram hluo sunga um Bet Shan le Ibleam le an sevela khuohai le Dor, Endor, Tanak, Megido le an sevela khuohai chu Manase thlahaiin an chang a. 12 Nisienlakhom, Kanan mihai chun um lui an tum tlat leiin Manase thlahai chun chuong khawpuia umhai chu an hnot suok thei naw a. 13 Israel thlahai an hung hràt hnung ruok chun anni rawi chu sinthawa sor dingin an inumtir a, an hnot suok fai vong ta nawh.

14 Chun, Josefa thlahai chun Josua kuomah, “Keini hnam hi LALPAN nasa takin mal a mi sawm a, kan tam tak êm êm vei leh, ieng tiziea rochung ding chanpuol khat le chan khat chauh i mi ruotpèk bìk am a na?” an ta. 15 Josua chun an kuomah, “Chuonga in tam a, Efraim tlang ram hi in ta dinga an chĕp taluo a ni chun Periz-hai le Refaim-hai ram ngaw dam khi umna dingin hang thriek ro chu” a ta. 16 Josefa thlahai chun, “Tlang ram hi kan ta dingin a huntawk nawh; phai rama Kanan mi chêng po po, Beth-sean le a khawpuia umhai le Jezreel ruoma umhai hin thir tawlailir dam an nei seng bik hi” an ta.

17 Josua chun Josefa sungkuo, Manase le Efraim thlahai kuoma chun, “In tam hle a, hràt khom in hrât bok a, chan khat ringot chu nei naw ti niu. 18 Tlâng ram khi in ta ding ning a ta, ram ngaw khom ni sien thriek unla, in thriek phàk chin chin chu in ta ning a tih. Kanan mihai chun thir tawlailir neiin hrât hlè hai sienkhom, in la hnot suok tawl ding annawm” a ta.