Ram lâk ding la umhai
13
1 Josua chu a hung upa a, a kum a tam ta hlĕ hnung chun LALPAN a kuomah, “I lo upa ta a, ram lâk ding hlak chu a la tam hle si. 2 Hieng ramhai hi a nih la lak lo chu: Filistin ram po po le Gesur-hai ram po po; 3 Avithai ram po po (Aigupta sak tieng ramria um Sihor vadunga inthoka hmar tieng panga Ekron ramri chen hi Kanan mihai rama ngai a na, Filistin mi lal pangahai chu Gaza, Asdod, Askelon, Gat le Ekron-ah an um a); 4 sim tieng pangah Kanan mihai ram bok, Sidon mihai umna Meara-a inthoka Amorhai ramri Afek chen; le 5 Gebalhai chêngna biel; sak tieng Lebanon ram, Hermon tlang hnuoi Baal Gad-a inthoka Hamat Kawn chen. 6 Lebanona inthoka Misrefot-maim chenin, tlâng rama chêng po po le Sidon mi po pohai chu Israel thlahai hmaa hin hnot suok ka ta, thu ka pêk che ang khan, Israelhai rochanah siempek ngĕi ngêi rawh. 7 Chuong ang chun, hi ram hi hnam kuo hai le Manase hnam zatvehai rochanah sempek rawh” a ta.Jordan sak tieng ram an insem dan
8 Reuben hnam le Gad hnam le Manase hnam zatve chun Jordan sak tieng ram, LALPA siehlaw Mosien a pek chu, an lo chang ta a. 9 Chu ram chu Arnon Ruom sira um Aroer khuoa inthoka ruom lailung taka khawpui le Medeba phai ram po po, Dibon chen; 10 Amorhai lal Hesbon khuoa lal Sihon khawpui po po, Amon thlahai ramri chen; 11 Gilead ram le Gesurhai le Makat-hai ramri chen le Hermon tlang po po, Basan ram po po, Salka khuo chen; 12 Astarot le Edrei khuoa lala inthrung Basan ram lal Og ram po po, Refaim hnam la um sunhai Mosie’n beia a lo hnot suok tawlna ram chenin a nih. 13 Amiruokchu, Gesurhai le Makat-hai chu Israel thlahai chun an hnot suok naw a, Israel thlahai lai tu chen hin an la chĕng ta zing lem a nih. 14 Rochan ding a pek ve naw chu Levi hnamhai chauh an nih; an kuoma a lo hril tah ang khan anni rochan chu LALPA, Israelhai Pathien ta dinga meia thilhlânhai chu a ni lem si a.
Reuben-hai ram chan
15 Reuben thlahai chu an sungkuo dungzui peiin Mosien ram a lo pĕk ta a. 16 An ram chun Arnon Ruom sira um Aroer khuoa inthoka ruom lailunga khawpui le Medeba phaizawl po po, 17 Hesbon le chu phai rama khawpui po po Dibon hai, Bamot Baal hai, Bet Baal Meon hai; 18 Jahaz hai, Kedemot hai, Mefat hai, 19 Kiriathaim hai, Sibma hai, ruom khoa um Zeret Sahar hai; 20 Betpeor hai, Pisga tlang pangpèr hai, Bet-jesimot hai; 21 tlang zawla khawpui po po hai, Amor mi, Hesbona lal Sihon lalram po po khom a huom a nih. Sihon chu Mosien a hne a, chu ruol chun chuong lai rama Sihon lo thrangpuitu Midian lal Evi hai, Rekem hai, Zur hai, Hur hai le Reba hai chu a tukdol vong bok a nih. 22 Chuong lal a thathai baka chun Israelhai chun Beor naupa Balaam, aienthiem chu kawlhnâmin an that sa bok a. 23 Chuongchun, Reuben thlahai ramri chin chu Jordan le a kam po po chu a nih. Hieng khawpuihai le khawtehai hi Reuben thlahai ta dinga an sungkuo tam dan zir peia rochana an ruot chu a nih.
Gad-hai ram chan
24 Gad thlahai chu an sungkuo dungzui peiin Mosien ram a lo pĕk a. 25 An ramri chu Jazer khuo le Gilead rama khawpui po po le Amon thlahai ram zatve, Raba khaw depa um Aroer khuo chen; 26 Hesbona inthoka Ramat-mitzpe le Betonim chen; Mahanaim-a inthoka Debir ramri chen; 27 ruom tieng chu Bet-haram hai, Bet-nimra hai, Sukot hai, Zafon hai, Hesbona lal Sihon ram la sem lo, Jordan sak tienga a ram, Galili dil chen chu a nih. 28 Hienghai hi, a khawpui le a khawtehai po po leh, Gad thlahai ta dinga an sungkuo tam dan zir peia an rochan dinga ruot chu a nih.
Manase-hai ram chan
29 Mosien Manase hnam zatve, Manase thlahai laia a zatve ta dinga an sungkuo dungzui peia ram a lo pĕk chu hieng ang hin a nih. 30 An ramri chu Mahanaim-a inthokin Basan ram po po, Basan ram lal Og ram po po le Basan rama Jair khawpui khaw sawmruk leh; 31 Gilead ram zatve le Basan ram lal Og rama Astarot Edrei khuo hai leh; chuong chu Manase naupa Makira thla, Makira naupahai a zatvehai ta dinga an sungkuo tam dan zir peia an rochana ruot chu a nih.