Amor mihai an intlawm
10
1 Josua-in Ai khuo a lâk a, a suksiet vong thu le Jeriko khuo le an lal chunga a thaw ang boka Ai khaw lal chunga khom a thaw thu dam, Gibeon mihaiin Israelhai chu inremna an siempui a, anni lai an chĕng ve tah ti thu dam chu Jerusalem khaw lal Adoni Zedek-in a lo hriet a. 2 Chu thu lei chun ama le a mipuihai chu nasa takin an tri a. Gibeon chu khaw poimaw le lal khawpui a na, Ai khuo nêkin a lien lem a, a sunga chênghai chu raldo thiem vong an ni si a. 3 Jerusalem lal Adoni Zedek chun Hebron khaw lal Hoham hai, Jarmut khaw lal Piram hai, Lakis khaw lal Jafia hai le Eglon khaw lal Debir hai chu inpunin, 4 “Gibeon khuoin Josua le Israel thlahai inremna a siempui leiin hung unla, va bei hron ei tiu” tiin a’n chà khawm a. 5 Amor mihai lal panga- Jerusalem lal, Hebron lal, Jarmut lal, Lakis lal le Eglon lal- hai chu an pung khawm a, an sipaihai po po leh an inthok suok a, Gibeon khaw epah thranghmun an khaw a, an bei ta mup mup el a.6 Gibeon-hai chun Gilgala an riekhmuna um Josua kuomah mi an tir a, “Tlâng rama chêng Amor lal po po inthuruolin mi bei hron dingin an hung pung khawm a nih. I siehlawhai hi hung thlathlam naw la, inrang takin hung la, mi hung san suok rawh, san kan ngai a ni hi” tiin thu an thon a.
7 Josua chun a kuoma um indo mi le pasalthra ruol chu a thruoi a, Gilgala inthok chun an inthok suok a. 8 LALPA chun Josua kuomah, “Tri tawl dĕr naw rawh; anni chu i kutah ka pêk ta che. Anni lai tu khom a ngam ding che an um nawh” a ta.
9 Zan khuoa fein Josua chun a hang bei thut a. 10 Israelhai hmaa chun anni rawi chu LALPAN a sukchi-ai a, an buoi ta nuoi nuoi a, Gibeon-a chun Israelhaiin hnĕna ropui tak an chang a, Bet Horon panna lam tunga chun Azeka le Makeda chen an hnot a, lampui intluonin an săt hlum pei a. 11 Chun, hieng hi a na, Israelhai hmaa tlansehai chu Bet Horon-a inthoka Azek khaw panna tieng an liem thlak laiin an chungah vana inthokin LALPAN riel inhrol tak tak a hung insŭrtir a, riel dêng hlum chu Israelhaiin kawlhnâma an sàt hlum nêkin an tam lem.
Nisa chel ding a ni thu
12 LALPAN Israelhai kuta Amor mihai a pĕk ni chun, Israelhai po po hmaah Josua chun LALPA kuomah,
“Aw, turnipui,
Gibeon chungah ngir zing la,
Aw, sorthlapui,
Aijalon Ruom chungah ngir zing rawh”
tiin thu a’n sam a.
13 Israelhaiin an hmĕlmahai chunga phuba an lăk zo hmâ khat chun nisa chu ni khat pum hlŭm inson loin van laizawlah a ngîr zing a. Chu thu chu Jasar Bu-ah an ziek naw am a ni? 14 Chuong ang ni, LALPAN mihriem rawl a ngaithlak ni ang hrim hrim chu a hma khomin, a hnung khomin, a la um ngai nawh. Israelhai chu LALPAN a dopui takzet si a.
15 Chuongchun, Josua chu Israelhai po po leh an riekhmun Gilgala chun a kìr nawk ta a.
Amor lal panga an man
16 Amor lal pangahai chu an tlàn hmang a, Makeda pŭkah an inbi a. 17 Makeda pŭkah lal pangahai an inbi ti an hriet chun Josua an hung hril a. 18 Ama chun, “Pûk baua chun lung lien tak tak inhlum lut unla, a vêngtu ding mi sie nghal bok ro. 19 Nangni ruok chu um ve naw ro. In hmĕlmahai chu hnot pei unla, an hnung tienga inthokin bei unla, an khuo inluttir hrim hrim naw ro. Anni chu LALPA in Pathienin in kuta a pèk ta sa a nih” a ta.
20 Josua le Israel thlahai chun anni chu an suksiet vong a, an khaw kula tlân lut hman mi tlawmte ti chauh naw chu an that fai vong a nih. 21 Israel sipai po po chu Josua rawia an inkulna Makeda riekhmuna chun him takin an hung kir a, tu khom Israelhai kal zawnga bau phong ngam hrim an um ta nawh.
22 Josua chun, “Pûk bau kha hong unla, lal pangahai kha ka kuomah hung thruoi ro” a ta. 23 Pûka inthokin lal panga- Jerusalem lal, Hebron lal, Jarmut lal, Lakis lal le Eglon lal- hai chu an hung thruoi suok a. 24 Josua kuomah an hung thruoi chun Israel thlahai po po chu a ko khawm a, ama le hung sipai kawmandarhai kuoma chun, “Hung unla, hieng lalhai rìng hi hung sir dè ro” a ta. Chuongchun an hung hnai a, an rìnga chun an sir de a. 25 Josua chun, “Tri naw unla, zâm bok naw ro. Hrat tak le huoisen takin um ro. Hieng ang bok hin hmêlma in la do dinghai chunga khom LALPAN a thaw pei ding a nih” a ta. 26 Chu zoah Josua chun lalhai chu a sât hlum vong a, thing kŭng panga lêrah an ruong chu zan tieng chen a’n khaitira. 27 Josua thupèk angin, an ruong chu ni tlâk tawmin an lăk thlăk a, an inbikrukna pûka chun an pei lut a, pûk bău chu lung lien tak takin an sìn khum a, chu chu tu chen khom hin a la um.
28 Chu ni chun Josua’n Makeda khuo chu a lâk a, an lal chopin kawlhnâmin a sat hlum a, iengkim a suksiet vong a, pakhat khom a hringa hlà a nei nawh. Jeriko lal chunga a thaw ang bokin Makeda lal chunga khom a thaw a nih.
Sim tieng khawpuihai an lak
29 Josua chun Israelhai po po leh Makeda khuoa inthokin Libna khuo a va bei a, 30 chu khuo chu LALPAN an lal leh Israelhai kuta chun a pêk nawk a. Josua chun chu khuo le a sunga um po po chu kawlhnâmin a that vong a, a sunga um tu khom hlà hrim hrim an nei nawh. Jeriko lal chunga a thaw ang bokin chu khaw lal chunga khom chun a thaw a nih.
31 Josua le a kuoma um Israelhai chun Libnaa inthokin Lakis khuo tieng an pan a, thranghmun an khaw a, an bei a. 32 Lakis khuo khom chu LALPAN Israelhai kutah a pêk a, a ni hninain an lăk a, chu khuo le a sunga um po po chu kawlhnâmin an sukhlum vong a, Libna khaw chunga an thaw ang bok khan an thaw ve a nih.
33 Chun, Gezer khaw lal Horam chu Lakis khuo thrangpui dingin a hang fe a, ama le a rawihai chu pakhat khom hlà nei dêr loin Josua chun a lo that vong a.
34 Josua le a kuoma um Israelhai chun Lakis khuoa inthokin Eglon khuo tieng an pan a, thranghmun an khaw a, an bei a. 35 Chu ni chun chu khuo chu an lăk a, chu ni vêk chun khuo chu an săm a, a sunga um po po chu an sukhlum vong a, Lakis khaw chunga an thaw ang bok khan an thaw ve a nih.
36 Josua le a kuoma um Israelhai chu Eglon-a inthokin Hebron an kai tung a, an bei a. 37 A khawpui chu an lăk a, a sunga um po po le an khawper po po chu kawlhnâmin an bei a, an lal leh an sukhlum vong a. Eglon an thaw ang bokin a khuo le a sunga umhai chu an inram fai thrak a nih.
38 Chu zoah Josua le a kuoma um Israel thlahai chu kir letin Debir khuo an bei a. 39 A khuo chu an làk a, an khawperhai khom, a sunga um po po leh, kawlhnâmin an bei a, an lal leh an that vong a, pakhat khom hlà an nei nawh. Hebron khaw chunga an thaw ang khan Debir khuo le an lal chungah khom an thaw a nih, Libna khuo le an lalhai chunga an thaw ang bok khan.
40 Josua chun chuong lai biel po po chu, tlang ram hai, sim tieng ram hai, tlâk tieng tlâng thruta um phai ram hai le tlang pangpĕra um khuohai le an lalhai po po thrang sain, a tukdol vong a, tu khom dama hlà a nei nawh. LALPA, Israelhai Pathienin thu a pĕk angin, a’n thuok thei taphot chu a that fai vong a nih. 41 Kades-barnea inthoka Gaza chenin, Gosen ram po po le Gibeon chenin a tukdol vong a. 42 Trum khata hieng lalhai po po hi Josua’n hnea an ramhai a lak vong theina san chu LALPA, Israelhai Pathienin Israelhai chu a dopui lei a nih.
43 Chuongchun, Josua le a kuoma um Israelhai po po chu an riekhmun Gilgal tieng chun an kir nawk ta vong a.