Josua-in Jabin a hnè
11
1 Hazor khaw lal Jabin-in chu chu a lo hrietin Madon khaw lal Jobab dam, Simron khaw lal dam, Aksaf khaw lal dam, 2 hmar tieng tlang rama lal, Kinneret sim tienga Araba lal dam, khawthlang tieng tlâng thruta lalhai dam, Kinneret sim tieng Arabaa lal dam, tlâk tienga tlâng thruta umhai le Dor khaw zoa lalhai dam, 3 sak tieng le thlang tienga um Kanan mihai dam, tlâng rama um Amor hai, Hit hai, Periz hai, Jebu hai dam, Mizpa biel Hermon tlâng hnuoia um Hiv hai kuomah mi a tir a. 4 An sipaihai po po, tam tak el, tuifinriet kama trieu zât zet chu sakor le tawlailir tam tak leh an hung inthok ta rup el a. 5 Chuong lalhai po po chu an intuok khawm a, Israelhai chu bei dingin Merom tuihmunaha an inkul a.6 LALPA chun Josua kuomah, “Trì tawl dèr naw rawh. Zingah tuta huna hin that dingin Israel kutah ka pêk suok tawl ding a nih. An sakor zaper thà sàt unla, an tawlailir raw vong bok ro” a ta. 7 Chuongchun, Josua le râl kâp mi po po chun Merom tuihmunah an bei thut a. 8 LALPA chun Israelhai kutah a pêk a, an hne a, Sidon khaw lien lem chen dam, Misrefot Maim chen dam le suo tieng pangah Mizpa Ruom chen an hnot a, pakhat khom hlà nei dêr loin an that vong a. 9 LALPAN thaw dinga Josua a hril angin, an sakor zaper thàhai an sàtpèk a, an tawlailirhai an rawpêk bok a.
10 Josua chu a kîr nawk a, Hazor khuo a lâk a, an lal chu kawlhnâmin a that a. Hazor chu chuong lai vel rama khaw poimaw tak a nih. 11 A sunga chêng po po chu kawlhnâmin a that vong a. A’n thuok thei taphot chu hlà nei loa a rawt chimit zoin Hazor khuo chu a raw a. 12 Josua chun chu biela lal khuohai chu a lâk a, an lalhai a man khawm a, kawlhnâmin a sukhlum vong a. LALPA siehlaw Mosien thu a pĕk angin, a sukchimit tawl vong a nih. 13 Chuong lai zingin, Hazor khuo ti chauh naw chu, muolpawnga khuo an lo indin ta sa hai ruok chu pakhat khom an raw nawh. 14 Chuong khawpuia inthoka an răllăk le ranhai chu Israelhaiin anni puola dingin an lăk a, mihriem ruok chu an sukbohmang vong hmâ khat chu kawlhnâmin an that pei a, a’n thuok thei taphot chu hlà an nei nawh. 15 LALPAN a siehlaw Mosie thu a pĕk angin, Mosie khomin Josua chu thu a pêk a, chu chu Josua-in a hlen a nih; LALPAN Mosie kuoma thu a pĕk po po chu hlen naw hrim a nei nawh.
Josua ram lakhai
16 Josua chun hieng ram po po hi a lâk a: sim tieng ram po po, Gosen ram po po, tlâk tieng panga tlâng thrut po po, Araba le Israelhai tlangram po po, 17 Seir tlang hang zomtu Halak tlanga inthoka Hermon tlang hnuoi, Lebanon phairuoma um Baal Gad chenin a lâk a, an lalhai po po a man a, a vuok thlŭk a, a that a. 18 Chuong lalhai chu Josua’n hun sawt tak a’n dopui tawl a nih. 19 Gibeon khuoa um Hiv mihai ti chauh naw chu Israelhai le inremna siem khuo hrim hrim an um naw a, indoa a lâk vong a nih. 20 LALPAN Mosie thu a lo pèk tah ang khan, anni rawi chu lunginsietna nei dêr loa suksea a sukchimit tawl vongna dingin, LALPA ngei chun an lungril a sukkhau a, Israelhai chu a’n dotir a nih.
21 Chuong lai hun bok chun Josua chu a’n thok suok a, Hebron dam, Debir dam, Anab dam, Judai tlangram dam le Israel tlang rama um Anakhai chu an khawpuihai leh a sukchimit vong a. 22 Gaza, Gath le Asdod khuoa a dam la um sun tlawmte ti naw chu Israelhai ramah Anakhai tu khom an um ta nawh. 23 LALPAN Mosie kuoma a hril ang khan, Josua chun a ram pumpui a lâk a, Israelhai chu an hnam inthrè dan ang peiin an rochan dingin a pêk a, a ram chu a hung ralmuong ta a.