3 Nisienlakhom, Josuan Jeriko khuo le Ai khuo a thaw dan Gibeon mihaiin an lo hriet chun, 4 dawha hmangin an che thung a. Palai anga insiemin, an ip hlui tak tak hai le savuna siem uoiin peng hlui tak tak, inek phen phun le phăwk ta hai chu sabengtungin an hung inphurtir luoi a; 5 pheikhok hlui tak le inphawk trek truk an bun a, zakaw triek neng nung an hăk a; bei trawl le ngar vun el, a thren chu hmuor ta dam fàk dingin an chawi a. 6 Chuong ang chun Gilgala an inkulnaa chun Josua kuomah an fe a, ama le Israelhai kuoma chun, “Ram hla taka inthoka hung kan ni a, thu mi thlungpui ro” an ta.

7 Israel mihai chun Hiv mihai kuoma chun, “Kan kawl hnaia um khom in lo ni el thei a, nangni leh iengtin am thuthlung siem thei kan ta?” an ta. 8 Anni chun Josua kuomah, “In siehlawhai kan ni hih” an ta. Josua chun, “Tuhai am in na, khaw laia inthoka hung am in na?” tiin a’n don a.

9 Anni chun, “I siehlawhai hi ram hla taka inthoka hung kan nih, LALPA in Pathien hi a hming a’n thang ĕm leiin, a chanchin an hrilhai kan lo hriet ve hlak a: Aigupta rama a thilthawhai po po dam, 10 Jordan suo tienga Amorhai lal pahnih- Hesbon-a lal Sihon le Basan ram lal, Astarot khuoa um Og hai chunga a thilthaw po po hai kha kan lo hriet a. 11 Kan upahai le kan rama chênghai po poin, ‘Lampuia in fak ding chawi unla, anni chu va’n biekpui unla, an kuomah, ‘In siehlaw kan ni hi; kan kuomah thu thlung ro’ ti dingin thurawn an mi pĕk a. 12 Hi bei hi in kuom tieng hung dinga kan suok tŭka lum hlota kan fŭn a na, tu hin chu a khong ta hle a, a ap rak an tah. 13 Hieng uoiin chawina savun penghai dam hi uoiin kan thun chun savun thar a la ni a, tu ruok hin chu a kak tuor el ta hi. Kan inzin sawt leiin kan silfenhai le pheikhokhai khom a triek zo tah a nih” an ta.

14 Israel mihai chun fak ding an chawihai chu an en vela chu ieng khom an chungchang thuah LALPA an rawn nawh. 15 Josua chun inremna thuthlung a siempui a, chu chu pungkhawm hotuhai chun inkhâm meuin an pompui a.

16 Remna thuthlung an siempuia inthoka ni thuma chun Gibeon-hai chu an kawl hnai tea um an nih ti Israelhai chun an hriet suok ta a. 17 Israel thlahai chu an fe pei a, ni thum niin an khawpuihai an tlung a. An khawpuihai chu Gibeon dam, Kefira dam, Berot dam le Kiriat-Jearim dam a nih. 18 LALPA, Israelhai Pathien hminga pungkhawm hotuhaiin an kuoma inkhâm meua thu an lo thlung tah leiin, anni chu Israelhaiin an bei ve nawh. Hi lei hin pungkhawmhai chu an hotuhai chungah nasa takin an chier a. 19 Sienkhom an hotuhai chun an kuomah, “LALPA, Israel Pathien sâlin an kuomah kan lo inkhăm ta si a, chuleiin anni chu ei tawk a thieng nawh. 20 An kuomah ei lo inkhăm ta si leiin ei thu ei bawsiet chun ei chungah lungsenna tlung rawi a tih, hieng ang hin an chungah thawng ei ta, hlà tawl el ei tih. 21 Hlà tawl ei ta, sienkhom pungkhawm po po thing phurtu le tui chawituah hmang ei tiu” an ta, hotuhai thu lo intiemkamna chu an zawmpui ta a.

22 Josua chun Gibeon-hai chu a ko a, an kuomah, “Keini hnaia chêng ve ni zing si a ieng dinga ram hla taka hung anga inhrila in mi hlêm am a na? 23 Chu lei chun trongsephur in hung ni ta a, kan Pathien ina thing ti ding phurtu le tui chawituah thrangin kan bawiah um zing in tih” tiin a hril tawl a. 24 Anni chun Josua kuomah, “LALPA in Pathien chun hi ram hi a pêk chĕu a, a sûnga chênghai po po sukhlum vong dingin a siehlaw Mosie kuomah thu a pêk ti chieng takin i siehlawhai hi an mi hril a. Hma in hung sawn pei dan kan hrietin, in mi that kan inlau a, hieng hin kan hung thaw el a nih. 25 Ngai ta, tu hin i kuta um kan ni a, i ngaia thra le indika i hriet ang chun kan chunga hin thaw pei rawh” an ta. 26 Chuongchun, anni chu a hum a, Israelhan an that a khap a. 27 Chu nia inthok chun Gibeonhai chu pungkhawmhai le LALPAN a la ruot ding hmuna LALPA maichăm ta dinga thing phurtu le tui chawituah a ruot a, voisun chen hin chu sin chu an thaw ta pei a nih.