3 Chuongchun, Josua le a sipaihai po po chu Ai khuo bei ding chun an inthok suok a. A mi huoisen laia mi sing thum a thlang suok a, zana chun a tir suok a. 4 An kuoma chun, “Fimkhur takin ngaithla ro. Khuo ei bei ding chu a hnung tieng a rûkin in inchàn ding a nih. Khawa inthokin um hla talaw naw ro. Inrêngin inring zingin um ro. 5 Kei le ka kuoma um po poin khuo chu hung hnai kan ta, a hma ang boka mi bei dinga an hung suok charin an hmaah tlansieng kan ta. 6 ‘A hmaa ang bok khan ei hmaah an tlanse nawk ta rèk ie’ tiin mi hung hnot an ta, kan zăwr suok thei chen chen zăwr suok kan ta. 7 Kan tlanse pha leh in inchăn rŭknaa inthokin hung suok in ta, khuo chu in lăk ding a nih. 8 Khuo in lâk charin raw nghal ro. LALPAN thu a pèk ang cheu khan thaw ro. Chuong ang tak chun thaw ro, thu ka pêk ta chêu hi” a ta. 9 Josua chun a’n fetir a, an inchăn rŭkna ding Ai khaw thlang tieng, Bethel le Ai khuo inkara chun an fe a; chu zân chun Josua ruok chu mipuihai lai puon inah a riek a.

10 Zîng inhma takin Josua chun a mihai chu a khâwm a, ama le Israel hotuhai chun hma thruoiin Ai khuo panin an suok a. 11 A kuoma um râl do thei chin chu an inthok suok vong a, Ai khaw bul, hmar tieng panga chun thranghmun an khaw a. Ai khuo le an inkara chun ruom a um a. 12 Ai khaw thlang tieng pang, Bethel le Ai khuo inkara inchăntu ding arûkin mi sangnga a sie a. 13 Hmar tienga inthoka bei pawl ding sipaihai thranghmun le thlang tieng panga inthoka aruka inchăntu dinghai thranghmun a rêl fel vong hnungin, chu zan chun Josua chu ruoma chun a fe a. 14 Ai khaw lalin a hmu chun ama le khaw mihai chu zingkar inhma takin an tho a, a hmun ruot Araba zawna chun Israelhai chu bei dingin an inthok suok a; an hnung tieng hung bei dinga inchăn rûk an um ti a hriet si nawh. 15 Josua le Israel mihai chu a tlawm lem ni awm takin thlalĕr tieng an tlăn ta hum hum el a. 16 Ai khuohai chu anni hnot dingin an inpung khawm a, Josua chu an hnot a, khuoa inthok chun an zăwr suok ta vong a. 17 Ai khaw mihai le Bethel khaw mihai chu Israelhai hnota an inthok suok vong leiin an khawpui chu khàr loin an maksan el ta a.

18 Chu phing leh LALPAN Josua kuomah, “I kuta i fei chawi khan Ai khuo tieng nghain tin rawh; i kutah hi khuo hi ka pêk ding chê a nih” a ta. Josua chun a feiin Ai khuo tieng chu a hei tin a. 19 Arûka inchàntuhai kha an hung suok nghal a, a kut a phar charin khaw sungah an tlàn lŭt a, an lăk a, an raw ta nghal a.

20 Ai khaw mihai an hei ngha kìr chun khawpui kăng khu van tienga fe tung ngut ngut el chu an hmu a, khaw tieng tieng khom hang tlăn theina an nei ta nawh- thlalĕr tienga an hnothai khan a hnottuhai chu an hung hnot let ve thung ta bok si. 21 Arûka inchăntuhaiin khuo chu an lâk tah ti Josua le a mihaiin an hmu chun Ai khaw mihai bei ding chun an inlet kir thut a. 22 Khaw latu pawl chu khuoa inthokin bei dingin an hung suok bok a, Israelhai chun an kărche a, khing tieng khing tieng an dang chĕp leiin pakhat khom hlà le insuo an nei nawh. 23 Ai khaw lal chu a hringin an man a, Josua kuomah an thruoi a.

24 Ai khaw mi, lo lai le thlalĕr tienga anni hung hnottuhai po po chu kawlhnâma an that fai vong hnungin, Israelhai chu Ai khuoa la um hai that dingin an lŭt a. 25 Chu nia Ai khaw mi an that po po chu, a nuhmei a pasalin, sing khat le sang hni an nih. 26 A fei inletna kutin Ai khaw mihai a râwt ram dĕr hmâ khat chu Josua chun kut a’n thlà nuom nawh. 27 LALPAN thu Josua a pĕk angin, chu khawpuia ranhai le rallâkhai ruok chu anni puola dingin Israelhai chun an làk a. 28 Josua chun Ai khuo chu a raw a, kumkhuoa hmunhnok bûm khawmna hmun le voisun chena hmun rausan a hung ni tah. 29 Ai khaw lal chu zan tieng chenin thinglĕrah a khăi a, nisa tlak tawmin thinglĕra inthok chun an làk thlàk a, khaw kul kotkhar bula chun a ruong chu an pei a, a chunga chun lung an intieng vûm thûr a, chu chu tu chen hin a la um.

30 LALPA siehlaw Mosiein ziek ngeia a Dan Bua Israel thlahai kuoma thu a pèk angin, Josua chun lung ser lo le thîr ha bè la tuor ngâi dĕr lo ngot hmangin Ebal tlanga chun LALPA, Israelhai Pathien ta dingin maichăm a siem a. 31 Chu maichăma chun LALPA ta dingin pumraw thilhlân dam le inremna thilhlânhai a’n hlàn a. 32 Chu taka chun Israel thlahai hmâ ngeiah, Josua chun Mosien dan a ziekhai chu lunga chun a ziek sawng a. 33 Malsawmpek anni ding phaa an thaw dan ding LALPA siehlaw Mosien a lo hril tah angin, Israel thlahai po po chu an upa hai, hotu hai le an rorêltu hai le anni laia hnam dang mihai le chun thiempu Levihai zawn LALPA Thuthlung Bawm tieng chu nghain, khing tieng khing tieng chun an ngìr a, a zatve chun Gerizim tlang an hmason a, a zatve dang chun Ebal tlang an hmason bok a 34 An ngir fel hnung chun Dan bua thu po po, malsawmna thu le trongse dong ding thuhai chu Josua chun a tiem suok a. 35 Mosie thupĕk po po chu Israel mi pungkhawm po po le nuhmei le naupang chikté tè le anni laia hnam dang chênghai chen hrietah Josua chun tiem hmai hrim hrim a nei nawh.