2 Josua chun Jeriko khuoa inthokin Bethel suo tienga Beth-aven depa um Ai khuoa chun mi a tir a, an kuomah, “Hang fe unla, ram hang enthla ro” a ta. Mihai chu an hang fe a, Ai khuo chu an hang thlithlai a. 3 An hung kir nawk chun Josua kuomah, “Ai khuo bei ding chun mi po po fe ngâi naw nih. A la dingin mi sanghni sangthum vêl tir la, mi tlawmte chauh an na, mi po po suksawl ngai naw nih” an ta. 4 Chuongchun, mi sangthum vel chauh chu taka chun an hang fe a, sienkhom Ai khuohai chun an lo intlawm dêr a; 5 an khaw kul kotkhara inthokin an lung lakna khur Sebarim chen an hung hnot a, an tlàn thlăkna trênbarama chun mi sawmthum le paruk an lo that a. Chu chun mipui a sukzàm a, an lungril a suktui a.

6 Josua chun a silfen a pot thlĕr a, LALPA Thuthlung Bawm hmaa chun hnuoi sikin zan tieng chen a bokkhup a, Israel upahai khom chun a thaw anga thaw vein, lu-ah pilvut an inphul a. 7 Josua chun, “E khai, LALPA Chunghnungtak, Amor-hai kuta pĕka sukhlum el dingin ieng leia hi mipuihai hi Jordan vadung i thruoi kai tawl am a na? Jordan vadung ràla khan lungawi takin um trok trok inlang ni ta lem ding kha! 8 Aw LALPA, hmêlmahai hnota Israelhai an tlanse el ta hi, iem hril tang ka ta? 9 Kanan mihai le hieng laia chêng hnamhai hin hung hrieng an ta, mi hung inhuol an ta, hnuoia inthok hin kan hming an nuoi bo vong el ding a ni hi. Chuong chu a ni si chun, i hming ropui tak hi ieng am i law ta ding a na?” a ta.

10 LALPA chun Josua kuomah, “Tho rawh. Ieng dinga khânga i bokkhup zing am a na? 11 Israelhai hin thil suol an thaw a nih. An vong zing dinga thu ka pĕk, ka thuthlung chu an bawsiet a. Suksiet vong dinga ka hril hluihlawn thil laia mi arûkin an lăk a, khêl an hril a, an thil neihai lai an thup rŭk a nih. 12 Chu lei chu annawm Israelhaiin an hmêlmahai an ngam naw chu. Siet tuok tlaka an insiem leiin annawm an tlanse a, an hmĕlmahaiin an hnot thlŭr chu. Suksiet dinga ti tah hluihlawn thil hrim hrim nangni laia inthoka in sukbo phot naw chun nangni lai um ta naw ning. 13 Fe la, mipuihai chu inhlăn thienghlim phot rawh. Hieng ang hin hril tawl rawh: ‘Zinga dingin insukthieng ro khai. LALPA, Israelhai Pathienin, Aw Israelhai, nangni lai hin hluihlawn thil a um a nih. Nangni laia inthoka hluihlawn thil hi in inthiel hmâ khat chu in hmĕlmahai hnè thei naw ti niu. 14 Zinga hin a hnam hnamin in hung inlang ding a nih. LALPA man suok hnam chu a pahnam hnamin hung an ta, LALPA man suok pahnam chu a sungkuo kuoin hung an ta, LALPA man suok sungkuo chu a pasal a pasalin an hung inlang ding a nih. 15 Tu khomin hluihlawn thil a kol hmu suok a ni chun, LALPA thuthlung a bawsiet lei le Israelhai lai thil inzakum tak a thaw leiin, a thil nei po po leh meia raw hmang ding a nih’ a ti a nih’ tiin hril tawl rawh” a ta.

16 A tûk zîngkâr inhma takin Israel hnamhai chu Josua hmaah an hung inlang a, Juda chihai chu man suok an lo ni ta a. 17 Juda thlahai chu a pahnam hnamin an hung inlang a, Zera pahnam chu an man suok a. Zera pahnamhai chu a sungkuo kuoin an hung inlang a, Zimri sungkuo chu man suok an ni a. 18 Zimri sungkuoa mi chu a mal malin an hung inlang a, Juda hnama mi Zera naupa Zimri, chu naupa Karmi, chu naupa Akan chu man suok a lo ni ta a.

19 Josua chun Akan kuomah, “Ka naupa, LALPA, Israelhai Pathien kuoma chun ropuina inkhumtirin ama chu chawimawi rawh. I thilthaw chu mi hril la, ka lakah ieng khom ip naw rawh” a ta. 20 Akan chun, “LALPA, Israelhai Pathien chungah thil suol ka thaw hrim a nih. Ka thaw dan chu hieng ang hin a nih. 21 Ei răllăk lai khan Babulona^a mi korfuol mawi tak le tangkaruo kilogram hni vel le rangkachak tlang kilo chenve vel bŭk ka hmu a, ka’n hnar êm a, ka lâk el a nih. Ka puon in sung hnuoiah ka phŭm a, tangka khom chutaka chun ka sie” a ta.

22 Josua chun mi a tir a, puon in tieng chun an tlăn a, a puon ina chun a lo thup ngei a, a hnuoiah tangkaruo khom a um a. 23 Chuong thilhai chu puon ina inthok chun an hung lăk suok a, Josua le Israel mi po po hmaa chun an hung chawi a, LALPA hmaah an sie a. 24 Josua le Israelhai chun Zera naupa Akan chu tangka hai, korfuol hai, rangkachak tlang hai, a naupa le naunu hai, a bawngchal hai, a sabengtung hai, a beram hai, a puon in le a thil nei po po le chun Akor ruomah an thruoi a. 25 Josua chun, “Ieng ti leia hi buoina hi kan chungah i hung intlun am a na? Voisun hin i chunga khom buoina LALPAN a hung intlun ve ding a nih” a ta. Israel mipui chun Akan le a sunghai chu lungin an deng hlum a, an thil nei po po leh meiin an raw a. 26 Akan chu vŭm hnûrin lungin an indel khum a, LALPA lungsen intûr khom chu a hung rè ta a. Hi hmun hi tu chen hin Akor Ruom ti a la ni zing.