Jeriko hnè thu
6
1 Israelhai leiin Jeriko khuo chu an khâr tlat a, tu khom a lût le suok an um nawh. 2 LALPAN Josua kuomah, “En ta, Jeriko khuo le an lal le an ral do mihai hi i kutah ka pêk tah. 3 A khuo hi râl do mi po po leh voi khat hêl suok phot rawh. Chuong ang chun ni ruk sung i thaw ding a nih. 4 Thuthlung Bawm hmaah beramchal ki tawtawrawt chawi thiempu pasari infetir rawh. A ni sarina chun thiempuhaiin tawtawrawt mût an ta, khawpui chu voi sari in hêl suok ding a nih. 5 Thuok seia tawtawrawt an mùt ruoi ruoi ri in hriet pha leh mipuihai chu inkhêktir dur dur la, khawpui kul chu chim thla rup a ta, mipui chu mani hma zawn sengah an lut ding a nih” a ta.6 Nuna naupa Josua chun thiempuhai chu a ko a, an kuomah “LALPA Thuthlung Bawm kha zawn unla, a hmaah tawtawrawt chawi thiempu pasari fe raw hai se” a ta. 7 Mipuihai kuoma chun, “Hma tieng pan peiin khawpui chu hêl suok ro. Ralthuom chawihai kha LALPA Bawm hmaah a hmatawngah fe raw hai se” tiin thu a pêk a.
8 Mipuihai kuoma Josua-in thu a hril zo chun a ti angin tawtawrawt pasari chawi thiempu pasarihai chun an tawtawrawt an mŭt a, an inthok suok a, LALPA Thuthlung Bawm zawntuhai chun an zui a. 9 Tawtawrawt muttu thiempuhai hmaa chun ralthuom chawi pawlin hma an thruoi a, vengtuhai chun hnung dâlin Bawm chu an som a, chawl loin tawtawrawt an mût zing a. 10 Josua chun mipuihai kuomah, “Khêk naw unla, trong inring naw unla, khêk dinga ka ti chêu hma chun bau phong naw ro” a ta. 11 LALPA Thuthlung Bawm leh chun khawpui chu voi khat an hèl suok a, mipui chu an riebŭk tieng an kìr a, chu taka chun an riek a.
12 Zîng inhma takin Josua chu a tho a, thiempuhan LALPA Thuthlung Bawm chu an zawn a. 13 Tawtawrawt chawi thiempu pasarihai chun chawl loa tawtawrawt mûtin LALPA Bawm hmaah an fe a, a hmatâwngah ralthuom chawi râl do mihai chu an thrang a, a hnungdâltu ralthuom chawihai chun Bawm chu an som a. 14 A ni hnina khom chun khawpui chu voi khat an hĕl suok a, riebûka chun an hung kǐr nawk a; chuong ang ngot chun ni ruk sung an thaw a.
15 A ni sarina chun vartrienah an tho a, a hmaa an thaw ang bokin khawpui chu an hĕl suok a, amiruokchu hi ni hin voi sari zet an hĕl suok a nih. 16 Voi sari an hĕlna dinga thiempuhaiin tawtawrawt an hang mut ruoi ruoi phing leh Josua chun mipuihai kuomah, “Khêk ta ro leh! Hi khawpui hi LALPAN a mi pĕk ta si a. 17 Khawpui le a sûnga thil um po po hi LALPA ta dinga inhlăn fâi thrak ding a nih. Nawchizor Rahab ruok chu enthlatu ei tirhai kha thupa a lo hum leiin ama le a in sunga a kuoma um po po chu hlàa hum ding a nih. 18 Amiruokchu, hluihlawna thila chun inthier fihlim ro, chuong naw chun a ieng khom lo la pal in ta, in chungah sietna intlun rawi in tih. Chuonga in thaw chun Israelhai riebŭk hi sietna phur tlâkah siem in ta, buoina hung intlun in tih. 19 Tangkaruo le rangkachakhai le dâr le thîra siem hmangruo le thil danghai po po chu LALPA chanpuol a ni leiin, LALPA thil siekhawmna ina sie ding a nih” a ta.
20 Tawtawrawt a hung inri chun mipui chu an khĕk dur dur a. Tawtawrawt inri ruoi ruoi a, mipui an khĕk dur dur lai chun Jeriko kul bang chu a hung chim a, mipui chu mani hma zawn sengah an lut a, khawpui chu an lăk ta a. 21 A khawpui chu LALPA ta dingin an inhlăn a, khawpuia chêng hringna nei taphot nuhmei pasal, a chîn a lien, bawngchalhai, beramhai le sabengtunghai chenin, an sukhlum vong a.
22 Josua chun ram enthla dinga mi a tir pahnihai kuoma chun, “Nawchizor ina chun fe unla, a kuoma thu in intiem tah angin, chu nuhmei chu a nei po po leh va thruoi suok ro” a ta. 23 Enthlatu tlangvalhai chu an va lut a, Rahab chu a nu le pa, a trâhai leh, a nei po po le chun an va thruoi suok a, a laichîn unauhai po po khom chu an thruoi suok bok a, Israelhai riebŭk puo tieng an inumtir a. 24 Khawpui chu a sunga thil um po po leh an raw fâi vong a; tangkaruo le rangkachakhai, dâr le thîra siem bûr le bĕlhai chauh chu LALPA thil siekhawmna inah an sie a. 25 Jeriko khuo enthlatu dinga a mi tirhai lo thuptu nawchizor Rahab le a nei po po le a sunghai ruok chu Josua chun a hlâ vong a, Israelhai lai tu chen hin an khawsa ta zing a nih.
26 Chuong lai chun Josua’n,
“Jeriko indin thar taphotin,
LALPA trongsie phur a ta;
A lungphŭm rem nawktu chun,
A nâu lutir chân a ta;
A kul kotkhar siemtu chun,
A nâu mi tlum chân a tih”
tiin vangsietna thu a’n sam a.
27 LALPA chun Josua chu a umpui a, a ram pumah a hming a hung inthang ta a.