Gilgalah ser an tan
5
1 Israel thlahaiin Jordan vadung an kăn zo hmâ poa LALPAN Jordan tui a dangchat ti thu Jordan vadung thlang tienga um Amor lalhai po po le tuifinriet kama um Kanan lalhai po poin an hriet chun an lungril a tui zop a, Israelhai hang do ngamna lungril put hrim hrim an um ta nawh.2 Chuong lai chun LALPAN Josua kuomah, “Lungthǐrin chemte siem la, Israel thlahai chu a trum hninaa dingin an ser vun tanpek nawk rawh” a ta. 3 Chuongchun, Josua chun lungin chemte a siem a, Gibeat Haralot-aha Israel thlahai ser chu a tanpek a.
4 Ser a tanpekna san chu hi hi a nih: Aiguptaa inthoka hung suok, râl do thei chin po po chu Aigupta an suoksan hnung khan thlalĕr lamlakah an thi zo deu vong tah a. 5 Aigupta rama inthoka hung suok po po kha chu sertan sa vong an na; amiruokchu, Aigupta an suoksan hnunga thlalĕr lamlaka pieng po po ruok chu sertan lo vong an nih. 6 LALPA rawl an ngaithlak nuom naw leia Aiguptaa inthoka suok râl do thei chin sukbohmanga an um vong chen khan, Israel thlahai chu thlalĕrah kum sawmli top an invâk an invâk a. Inkhâm meua an thlatuhai kuoma a lo tiem tah nenetui le khuoizu luongna ram chu an hmù ve LALPAN a phal si nawh. 7 An thlahai, anni aiaw dinga a’n dinhai chu lamlaka chun ser tan lo an la ni zing leiin chuonghai ser chu Josua chun a tanpĕk a nih. 8 Mipui po po ser an tan hnung chun, an dam hmâ khat an riebŭk pangngaia chun an châm zing a. 9 LALPA chun Josua kuomah, “Voisun hin Aiguptahai hmusitna chĕu hi nangnia inthokin ka’n hlum hmang tah a nih” a ta, chuleiin, chu hmun chu voisun chen hin Gilgal ti a la ni zing.
10 Chu thla ni sawm le palina zan tieng chun Jeriko phai Gilgala an umna hmuna chun Israel thlahaiin Fekân Kŭt an hmang a. 11 Fekân Kŭt trumtriek tŭk là lá chun a ram tharsuok ngei bu, chol thrang lo bei le beipèr an făk tran a. 12 A ram suok bu an fak tŭka inthok chun mana a tla ta naw a, Israel thlahai chun mana an dong ta ngai bok nawh. Chu kum chun Kanan ram bu le bâl chu an ring ta lem a nih.
Josua le sipaihai hotu
13 Josua chu Jeriko khaw bula a um laiin a hang ngha a, ngai ta, a hmaa chun mi pakhat, kawlhnâm phawi saa ngîr a hmu a. A va pan hnai a, a kuomah, “Keini tienga thrang i ni, kan hmĕlmahai tienga thrang lem?” tiin a’n don a. 14 Ama chun, “Ka ni naw ve ve. LALPA sipaihai hotua hung ka nih” a ta. Josua chun bokkhupin chibai a bûk a, a kuomah, “Ka lalpan a siehlaw kuoma hin ieng am hril ding a nei a na?” a ta. 15 LALPA sipaihai hotu chun, “I pheikhok kha hlîp rawh; i ngirna kha hmun thienghlim a nih” a ta. Chuongchun, Josua chun a hlîp a.