Hriet zingna lung an phun
4
1 A hnam pumpuiin Jordan an kăn hnung chun LALPAN Josua kuomah, 2 “Mipuihai laia inthokin mi sawmpahni, hnam tina inthokin mi pakhat pei, thlang suok la, 3 thiempuhai ngǐrna Jordan vadung lailung taka inthokin lung sawmpahni la hai sien, chu chu hung put hai sien, voizâna in riekna ding hmunah i kuomah hung sie raw hai se” tiin thu a pêk a. 4 Josua chun Israel thlahai laia mi sawm le pahni, hnam tina inthoka a thlanghai chu a ko a, 5 an kuomah, “LALPA in Pathien Bawm hmaah fein Jordan vadung lailunga lung, Israel pahnam zăt, lung pakhat seng put suok ro. 6 Tuta hnunga in nauhaiin, ‘Hieng lunghai hi ieng tǐna am a na?’ tia an la hung indon phâ chĕu leh in ta dinga inchikna thra tak la ni’ng a tih. 7 Chu pha chun in nauhai kuomah, ‘LALPA Thuthlung Bawm hmaah Jordan tui a kang chat lei a nih; Jordan vadung an kăn laiin tui chu a hung kang chat annawm. Hieng lunghai hi Israel thlahaiin chu thil chu kumkhuoa an hriet zingna dinga an bŭm khawm a nih’ tiin in la hril ding a nih” a ta. 8 Josua hril ang chun Israel thlahai chun an thaw a, vadung lai taka inthok chun Israel pahnam zat lung sawm le pahni an lăk a, an riebŭk tieng an put a, chu taka chun an sie a. 9 Chun, Thuthlung Bawm zawntu thiempuhai ngirna lai tak, Jordan vadung lailunga chun Josuan lung sawm le pahni a phun a, chuonghai chu tu chen hin an la um zing.
10 Mosien Josua a hril ang le LALPAN thaw dinga thu Josua a pĕk po po anga mipuiin iengkim an thaw zo vong chenin, Bawm zawntu thiempuhai chu Jordan vadung lailunga chun an ngǐr a, mipui chu inhmaw takin an kai zut zut a. 11 An kai vong hnung chun LALPA Bawm le thiempuhai khom mipuihai hmuah an kai ve ta a. 12 Reuben thla hai, Gad thla hai le Manase hnam laia a zatve hai chun ralthuom chawiin, Mosien an kuoma a lo hril tah ang khan, Israel thlahai hmaah an lo kai a. 13 LALPA hmaa indo dinga inralthuom ngot mi singli lai chun Jeriko phai an lŭt a. 14 Chu ni chun Josua chu Israel thlahai po po mithmuah LALPAN a chawimawi a; Mosie an inză ang bok khan a dam sungin an inză tah a nih.
15 LALPAN Josua kuomah, 16 “Thuthlung Bawm zawntu thiempuhai kha Jordan vadunga inthoka hung suok dingin thu pe rawh” a ta. 17 Josua chun, “Jordan vadunga inthok khan hung suok ta ro leh” tiin thiempuhai chu thu a pêk a. 18 LALPA Thuthlung Bawm chu zawnin thiempuhai chu vadunga inthokin an hung suok a, an suok charin Jordan tui chu a luong pangngaiin a kuong liem zur zurin a hung luong nawk ta a.
19 Thla khatna ni sawma chun Jordan vadunga inthokin an suok a, Jeriko sak tieng Gilgal-ah umhmun an khuor a. 20 Jordan vadunga inthoka an hung put lung sawm le pahni chu Gilgala chun Josua-in a phun a. 21 Israel thlahai kuoma chun, “Nakie hunah in thlahaiin an pahai kuomah, ‘Hieng lunghai hi ieng tǐna am a na?’ tia an la hung indon phâ chĕu chun, 22 ‘Israel thlahaiin Jordan vadung hi hnuoi chărah an fe kăi lei a nih’ tiin in la hril ding a nih. 23 LALPA in Pathien chun Tuipui Sen kan kăn hmâ khata kan hmaa tui a lo sukchat ang khan Jordan vadung khom hi in kai hmâ khat chu a sukchat a nih. 24 Hnuoia hnam po poin LALPA kut hratzie an hriet theina ding le LALPA in Pathien chu in trî zing theina dingin hieng hi a thaw a nih” a ta.