Jordan kăn thu
3
1 Zingkâr inhma takin Josua le Israel thlahai po po chu Sitim-a inthokin an inthok suok a, Jordan vadung an tlung a, an kăn hmain chu taka chun an riek a. 2 Ni thum hnunga chun hotuhaiin riebuk chu an fang vel a, 3 “Thiempu Levi thlahaiin LALPA in Pathien Thuthlung Bawm zâwna an suok in hmu pha leh in umnaa inthoka insonin anni chu in zui ding a nih. 4 Hi lampui hi a hmaa in la hraw ngai lo a ni leiin anni chun lampui kawkhmung an ti chêu. Amiruokchu, nangni le Thuthlung Bawm inkarah kilometer khat vel a um ding a nih; in va hnai talaw ding a ni nawh” tiin an hril a. 5 Josua chun mipui kuomah, “Insukthieng ro, zinga hin eini lai thil mak tak el LALPAN a thaw ding a nih” a ta. 6 Thiempuhai kuoma chun, “Thuthlung Bawm hi zawn unla, mipui hmaah fe ro” a ti bok a. Chuongchun, Bawm chu an zawn a, hma an thruoi a. 7 LALPA chun Josua kuomah, “Mosie kuoma ka um hlak ang khan i kuoma khom ka um ding a nih ti an hriet theina dingin voisun hin Israel mi po po mithmua ngei ka chawimawi tran ding chĕ a nih. 8 Thuthlung Bawm zawntu thiempuhai kuomah, ‘Jordan vadung in tlung phâ leh tui chu palin, vakamah ngir zing ro’ tiin thu pe rawh” a ta.
9 Josua chun Israelhai kuomah, “Hi taka hin hung unla, LALPA in Pathien thuhai chu hung ngaithla ro. 10 Nangni lai Pathien hring chu a um zing a, in hmaa Kanan mihai, Hit mihai, Hiv mihai, Periz mihai, Girgas hai, Amor hai le Jebu hai chu mathei loin a hnot suok ding a nih ti hi thila inthok hin hre thei in tih. 11 Ngai ta u, khawvel po po LALPA Thuthlung Bawm chun Jordan vadung hi in hmaah a kân ding a nih. 12 Tuhin, Israel hnam tina mi sawm le pahni thlang suok ro. 13 LALPA, khawvel po po LALPA Thuthlung Bawm zawntu thiempuhaiin Jordan vadung tui an pal charin a hnâr tienga tui hung luong thla chu inchat buk a ta, vùm hnûra ngîrin intieng a tih” a ta.
14 Jordan vadung kân dinga puon ina inthoka mipui an suok chun Thuthlung Bawm zawntu thiempuhai chu mipui hmaah an fe a. 15 Hi hun hi busîk hun, Jordan vadung kuong a liem zur zur hun lai a nih. Bawm zawntuhai chun Jordan vadung chu an tlung a, Bawm zawntu thiempuhai kein vakama tui a tâwk charin, 16 a hnâr tienga inthoka tui hung luong thla chu a chât a, hla fea Zarethan sevela um khaw pakhat Adam an ti hmuna chun tui chu an tieng hnŭr a, Tuipui Thi tienga luong thla ding chu a kangchat a, mipui chu Jeriko khaw zawn taka chun an kai ta a. 17 Hnuoi chăra Israel mipuiin vadung an kân vong chenin, LALPA Thuthlung Bawm zawntu thiempuhai chu Jordan vadung lailunga chun an ngǐr a.