4 Nuhmei chun mi pahnihai chu a thruoi a, a thup a. Lal mi tirhai kuoma chun, “A ni ngei, an hung annawm, ana chu khaw laia inthoka hung am an nih ti ka hriet nawh. 5 Thimbut, khaw kul kotkhar an khăr hun lai vel khan mihai chu an suok nawk a, khaw tieng am an pan ti ka hriet naw a, hnot vat inla chu in la hnot phâk el thei” a ta. 6 Amiruokchu, anni chu in chungah a thruoi a, jìza kuong a buk khawmna hnuoia chun a thup a. 7 Jordan vadung kâi chena hnot dinga a khaw mihai an suok charin kul kotkhar chu an khăr a.

8 Enthlatuhai chu an zăl hmain in chunga chun an kuomah a hang fe a. 9 Chuong mihai kuoma chun, “Hi ram hi LALPAN a pêk ta chêu ti ka hriet a, nangni trînain a mi man tawl a, hi rama chênghai hi nangni triin kan intui zop el a nih. 10 Aigupta rama inthoka in hung suoka in ta dinga LALPAN Tuipui Sen a suktanpek dàn chêu le Jordan suo tienga Amorhai lal pahnih, Sihon le Og hai in sukbohmang dàn chanchin kan lo hriet vong a. 11 In chanchin kan lo hrietin kan lungril a tui zop a, nangni leia zâm naw hrim hrim an um nawh: LALPA in Pathien chu hnuoi le vana Pathien a ni si a. 12 Chuleiin, in chunga lunginsietna ka’n entir chêu ang bok hin nangni khomin ka sungkuohai chungah lunginsietna inentir ve unla, 13 ka nu le pahai, ka trâhai le zuorpuihai le an thil nei taphothai chu hlà a, kan hringna mi humpêk dingin LALPA hming sâlin lunginsiet takin ka kuomah inkhâm unla, inchikna chieng tak mi maksanpĕk ro” a ta.

14 Mihai chun a kuomah, “Kan thilthaw hi i hril suok naw phot chun in thi aiin thîng kan ta, LALPAN ram hi a mi pĕk pha khom lunginsiet kan ti che a, i chungah ringum takin thawng kan tih” an ta. 15 A in chu khawpui inhuonna kul chunga um a ni leiin, anni chu tukvera inthokin hruihruolin a thlâk thla a. 16 An kuoma chun, “A hnottuhai chêu khan an hmu pal hlauh nawna ding chêuin tlâng tieng pan unla, chu taka chun ni thum vêl, an hung kir nawk hmâ po chu, va’n bi unla, chu hnung chun in kìr nawk ding a nih” tiin thu a’n chà a.

17 Mihai chun a kuomah, “Inkhâma thu i mi’n tiemtir ringot hin chu mi khuop el thei naw nih. 18 Hi rama kan hung lut pha leh, i mi khai thlăkna tukvera hin hi hruol senlâr hi lo khit khai la, i nu le pahai, i trâhai le zuorpuihai le i sungkuohai po po khom hi ina hin i lo thruoi lût vong ngâi a tih. 19 Tu khom, hi ina inthoka tuola suok thisen maw chu kan chungah tla thei naw nih. Nang le hi ina i kuoma umhai laka ruok chu tu khomin kut an thlăk chun a thisen maw chu keinin phur kan tih. 20 Chun, kan thilthaw hi i hril suok vai chun inkhâma thu kan intiemnaa hin maw kan phur thei bok nawh” an ta. 21 Ama chun, “In thu ang peiin ni raw se” a ta. Chuongchun, anni chu a’n fetir a, an suok a, tukvera chun hruol senlâr chu a khit khai a.

22 Anni chu an fe a, tlâng chu an va tlung a, chu taka chun ni thum sung, anni hnottuhai an hung kǐr nawk hmâ po chu, an um a; anni hnottuhai chun lampui intluonin an zong an zong a, sienkhom an hmu zo si nawh. 23 Chu zoah mi pahnihai chu tlânga inthok chun an kǐr thla a, Jordan vadung an kăn a, Nuna naupa Josua kuom an tlung a, an chunga thil tlung po po chu an hril vong a. 24 Josua kuoma chun, “LALPAN ram chu ei kutah a lo pĕk takzet el; eini leiin a ram mipuihai chu thlabârin an intui zop el a nih” an ta.