JOSUA
Pathienin Josua thu a pêk
1
1 LALPA siehlaw Mosie thi hnungin, LALPA chun Mosie kaiza vengtu Nuna naupa Josua kuomah, 2 “Ka siehlaw Mosie chu a thi ta a. Tuhin hieng mipuihai hi Jordan vadung kân a, Israel thlahai kuoma ka’n hlăn ding mĕk rama chun lût dingin inpuochà raw hai se. 3 Mosie kuoma ka hril tah ang khan, kea in sirna taphot chu pe vong ka ti chêu. 4 In ram chu Lebanon thlalĕra inthoka vadungpui Eufretis chena Hit mihai ram po po le thlang tieng Tuipui Liena chen ni’ng a tih. 5 I dam sung tu khomin hnĕ thei naw’ng an ti che. Mosie kuoma ka um angin i kuomah um ka ta, thlăthlam ngai naw’ng ka ti che a, zămsan ngai bok naw’ng ka ti che.6 “Hrât tak le huoisen takin um rawh, an pi le puhai kuoma inkhâm meua pĕk ka tiem rama chun hieng mihai hi thruoi lut la, inhluotir rawh. 7 Hrât tak le huoisen takin um rawh. In fĕna taphotah in dingchang theina dingin ka siehlaw Mosie pĕk chêu dan po po kha fimkhur takin zawm unla, chang tieng amanih voi tieng amanih pètsan naw ro. 8 Hi Dan Bu hi i băuin sâm zing hlak la, zieka um iengkim chu fimkhur taka i zawm theina dingin a sŭn a zănin dawnkhawl hlak rawh. Chuongchun, hmûingìlin hung hlawtling i tih. 9 Hrât tak le huoisen taka um dingin ka ti ta chê an naw? Thlabâr naw la, zâm bok naw rawh, i fĕna taphotah LALPA i Pathien chun a umpui zing ding chĕ a nih” a ta.
10 Josua chun mipui hotuhai chu thu a pêk a, 11 “Riebûk fang unla, mipuihai kuomah, ‘In rawsot chawi ding inpei ro, tuta inthoka ni thumnaah hi taka inthok hin Jordan vadung kân ei ta, LALPA in Pathienin in ta dinga a pĕk chêu ram chu lûtin ei va hluo ta ding a nih’ tiin hril ro” a ta.
12 Reuben hnam hai, Gad hnam hai le Manase hnam zatve hai kuoma ruok chu Josua chun, 13 “LALPA Pathienin nangni chêngna dinga Jordan vadung sak tieng ram a pĕk chêu thu LALPA siehlaw Mosien a hril tah chêu kha hre zing ro. 14 Nunâu le ran ruol chu Jordan vadung sak tienga Mosien ram a pĕk chêua hin lo um an ta, nangni laia râl do thei chinhai ruok chu inrâlthuomin, in unauhai hmaah Jordan vadung hi in lo kai hmasa ding a nih. 15 Nangni ang boka anni khom LALPAN chawlna hmun pe a, LALPA in Pathienin a pĕk ram an hluo ve hmâ khat chun in unauhai chu in thrangpui ding a nih. Chu zoa chun LALPA siehlaw Mosie pĕk chêu Jordan vadung râl sak tieng, nisa suokna tieng chun hung kir nawk in ta, in la hluo ding a nih” tiin a hril a.
16 Anni chun Josua kuomah, “Thu i mi pĕk taphot chu thaw pei kan ta, fè dinga i mi tirna taphotah fè pei kan tih. 17 Kong iengkimah Mosie thu kan zawm hlak ang khan, i thu khom zawm pei kan tih. LALPA i Pathien chu Mosie kuoma a um hlak ang khan i kuoma khom um ve pei raw se. 18 Tu khom i thu kal a, i hril ieng khom zawm nuom lo chu sukhlumin um a tih. Hrât tak le huoisen takin um phot el rawh” tiin an hril a.