Thupêk ropui
6
1,2 “Jordan vadung kâna in va hluo ding rama in kai phaa nangni le in nauhai le in tuhaiin LALPA in Pathien chu tri a, in damsung poa a danhai le thupekhai chu zawm a, chu hmuna chun in dam sawt theina dinga LALPA in Pathienin nangni zirtir dinga a mi pĕk, a thupêk hai, thusuok hai le dànhai chu ka hril chêu a ni hih. 3 Chuleiin, aw Israel, i thratpui ding le LALPA, i pi le puhai Pathienin thu a tiem anga nenetui le khuoizu luongna rama nasa taka i hung pung theina dingin, ngaithla la, fimkhur takin zawm rawh.4 “Aw Israel mihai, ngaithla ro. LALPA ei Pathien chauh hi LALPA chu a nih. 5 LALPA in Pathien chu in lungril po poin, in thlarau po poin, in hrătna po poin in hmangai ding a nih. 6 Voisuna thupêk ka hrilhai chêu hi lungrilah in vong zing ding a nih. 7 In nauhai taima takin zirtir unla, ina in um chăng amanih, lama in lăwn lai amanih, in zăl le tho pha amani khomin hril zing hlak ro. 8 Inchikna dingin bânah zem unla, in chalah hrên bok ro. 9 Chun, in in kotkhar bienga hai le in tuolkotah hai ziek bok ro.
10 “LALPA in Pathienin in pu Abraham hai, Isak hai le Jakob hai kuoma inkhâm meua pĕk a tiem chêu ram, in indin khom ni dêr lo khawpui hnienghnâr tak tak hai, 11 in sĕng thrang dêr loa thil thra tinrênga sung sip in hai, in chǐng ni dĕr lo grep huon le oliv huon hai, in cho ni dêr lo tuikul hai umnaah a thruoi lŭt chêu hunah, fa le dawna in tlai pha chun, 12 bawia in intăngna ram Aiguptaa inthoka thruoi suoktu chêu LALPA chu theinghil lo dingin fimkhur ro. 13 LALPA in Pathien chu tri unla, a rong chauh bawl unla, a hming sâlin thu tiem hlak ro. 14 Pathien dang, in kawl le kienga pathienhai chu in biek ding a ni nawh. 15 Nangni laia um LALPA in Pathien hi Pathien thîkthusie a na, in chungah a lungsen chok a ta, hnuoi chunga inthokin sukbohmang hlauh rawi a ti chêu. 16 Masa tui hmuna in fie ang khan LALPA in Pathien chu fie naw ro. 17 LALPA in Pathien thupêkhai le a thil bituk le thusuokhai chu fimkhur takin vong tlat ro. 18 LALPA mithmua fel le thra chu thaw unla, in ta dingin thra’ng a ta, in puhai kuoma inkhâm meua LALPA tiem ram thraa chun lûtin hluo thei in ta, 19 LALPAN a hril angin, in mithmu ngĕiah in hmĕlmahai chu hnot suok a tih.
20 “Chun, in nauhaiin, ‘LALPA ei Pathien thupêk, a thil bitukhai, thusuokhai le dànhai chu a umzie iem a na?” ti-a nakie an la hung indon pha chĕu, 21 nangnin in nauhai kuomah, ‘Aigupta rama chu Faraw bawi kan ni a, sienkhom LALPA kut hrâtin a mi thruoi suok a. 22 Kan mithmua ngĕi inchikna le thil mak nasa tak le rapthlâk tak tak, Aigupta ram chunga le Faraw le a sungkuohai po po chungah LALPAN a’n entir a. 23 Keini ruok chu kan pi le puhai kuoma inkhâm meua pĕk a tiem rama chun mi thruoi lut dingin Aigupta rama inthokin a mi thruoi suok a. 24 Chuongchun, voisuna ei um anga hring le dama uma ei hnienghnâr pei theina dingin, LALPA chun hieng thupêkhai hi zawm a, LALPA ei Pathien chu trì dingin thu a mi pĕk a nih. 25 Thu a mi pĕk anga a dànhai po po fimkhur taka ei zawm chun, chu chu ei dingchangna ding a nih’ tiin in hril ding a nih.