LALPA theinghil lo dinga infŭina
8
1 “Dam taka um a, hung pung pei a, in pi le puhai kuoma inkhâm meua LALPAN pĕk a tiem ram chu lûta in hluo theina dingin voisuna thupêk ka pĕk chêu hi fimkhur takin zawm ro. 2 A thupêkhai in vong ding le ding naw hrietna dinga kum sawmli hiel LALPA in Pathienin in lungril fie ding le suktlawm dinga thlalĕra a thruoina po po chêu kha hre zing ro. 3 Mihriem hi bei chauin a hring naw a, LALPA baua inthoka suok thu tinrêng chu ringa hring a nih ti a’n hriettir theina ding chĕuin a suktlăwm chêu a, in trăm a phal a, in hriet ngai lo, in pi le puhai khoma an la hriet ngai lo mana chun a chawm chêu a nih. 4 Chu kum sawmli sung chun in silfenhai a triek naw a, in ke khom a’n vûng bok nawh. 5 Pain nau a thunun angin LALPA in Pathien chun a thunun chêu a nih ti hi lungrilin hre zing ro. 6 “LALPA in Pathien thupêkhai zawmin, a lampui hrawin, ama chu inzà ro. 7 LALPA in Pathien chun ram thra tak, tlânga inthoka hung luong hok hok vadungte hai, dîlte hai, tlâng le phaia luong dem dem tuihnăr tamna; 8 bu hai, barli hai, grêp hai, theichang hai, theibufai hai, hriek nei oliv hai rà nuomna le khuoizu tamna ram; 9 chatlak loa bei in tlănna ding, tlaksam ieng khom in nei nawna ding ram; a lunghai chu thîr le a tlânga inthoka dâr in cho suok theina ding rama chun a thruoi lut ding chêu a ni si a.
10 “In fàk a, in tlai hlè pha, ram thra tak a pĕk lei chêuin LALPA in Pathien chu inpâk ro. 11 Voisuna ka pèk chêu a thupêkhai, thusuokhai le dànhai hi zawm loin LALPA in Pathien chu in theinghil palh nawna dingin, fimkhur ro 12 Chuong naw chun fa a, tlai a, in thra tak bawla in hluo huna dam, 13 in bawng ruol le beram ruolhai, in tangka le rangkachakhai le in thil nei po po a hung pung pha chun, 14 in lungril hung chapoin, bawia in intăngna Aigupta rama inthoka thruoi suoktu chêu LALPA in Pathien chu theinghil palh hlauh rawi in tih. 15 Ama chun thlalĕr ram zâu tak le trium tak, ram trawl le tui um nawna hmun, mi chuk na tak rûl tûr nei le mi sĕ na tak ainuvĕt hai tamna hmun chu a thruoi tlang tah chêu a; lungpui sakhata inthokin tui a sun suokpĕk chêu a, 16 in pi le puhaiin an la hriet ngai lo mana chun chawmin, fiein a suktlawm chêu a nih, tuta hnunga in thrat theina dingin. 17 Nangni chun, “Ka hausakna hi keima theina le kut hrâta ka hlaw suok a nih” in ti lungril khom a ni el thei. 18 Nisienlakhom, sum le pai lam suok theina petu chĕu le voisun chena in pi le puhai kuoma inkhâm meua a thuthlung suknghettu chu LALPA in Pathien a ni lem ti hre zing ro. 19 LALPA in Pathien chu in theinghil a, pathien danghai zui a, an rong bawla in biek vai chun bohmang ngĕi ngêi in tih ti voisun hin ka hril lawk chêu a nih. 20 In hmaa hnam danghai LALPAN a suksiet ang khan, LALPA in Pathien thupêk in zawm naw chun sukbohmangin um ve’ng in tih.