5 “Ngai ro, lûta in va hluo ding rama khom in zawm pei dingin LALPA ka Pathienin thu a mi pĕk ang takin a dàn le thupêkhai chu ka zirtir chêu a nih. 6 Fimkhur takin zawm unla, chu chu hieng danhai hi lo hre a, ‘Hi hnam ropui tak hi mi var le thil hre mi tak an ni chieng hle’ titu hnamhai mithmuah in varna le hriet thiem theina tarlangtu ni’ng a tih. 7 Ei ko châng phota mi hnai hlak LALPA ei Pathien anga an ko chănga hnai hlak pathien nei ve hnam ropui dang tu am an um a? 8 Tuta in hmaa ka siepĕk chêu dàn le thupêkhai anga dan fel nei hi hnam ropui dang tu am an um ve a?

9 “Mit ngeia in thil hmuhai kha theinghil lo ding le in dam sunga in lungrila a bo nawna dingin, ngun taka mani invêngin, fimkhur ro. In nauhai le in tuhai zirtir ro. 10 Horeb tlanga LALPA in Pathien hmaa in ngǐr truma LALPAN ka kuomah, “Ka hmaa hin mipuihai chu ko khawm la, a ram leilunga an chĕng sûng poa mi tri dàn an inchuk theina ding le an nauhai an zirtir dingin ka thuhai lo inhriettir ka tih’ a ti ni khom kha hre zing ro. 11 In hung hnai a, tlâng thrutah in ngìr a, sûm dum le thim sa mup kărah tlâng chu van tongin a chok puot puot a. 12 Chu zoah LALPA chun meichoka inthokin a hung biek chêu a. A thu hril chu in hriet a, a hmêl put dăn âwm ruok chu in hmu naw a, rawl chauh in hriet a nih. 13 A thupêk, Dan Sawm, in zawm dinga thu a pĕk, lungphek pahnia a ziek chu, a hung puong a. 14 Chu trum chun Jordan kâna ram in hluo phaa in zawm ding dàn le thupêkhai chu zirtir ding cheuin thu a mi pĕk a ni kha.

15 “Horeb tlànga meichoka inthoka LALPAN a biek chêu khan a ruongâm ieng khom in hmu naw kha. Chuleiin fimkhur hlè ro, 16 chuong naw chun hung porchèin, in ta dingin milim dam siem chopin, thil lim, pasal amanih nuhmei amanih lim dam, 17 an naw leh hnuoia chêng ransa amanih lim dam, boruoka vuong vate amanih lim dam, 18 hnuoia bokvâka invâk chi le tuia chêng nga amanih lim dam siem rawi in tih. 19 Chun, van tieng in hang en a, van mawitu nisa hai, thlahai le arasihai in hmuin, chuonghai chun hîpin, an hmaa kŭn châkna nei naw unla, LALPAN van hnuoia hnam tin ta dinga a ruot thilhai chu chawibiek naw ro. 20 Nangni chu, tuta in ni ang hrim hin a mihai, a rohluotu ni dinga LALPAN rawtuina meia inthoka a lak suok, Aigupta rama inthoka a thruoi suokhai in nih.

21 “Nangni leiin ka chungah LALPA a lungsen a, Jordan kân lo ding le ram thra, LALPA in Pathienin rochung dinga a pĕk chêu ram chu ka lŭt ve a phal tlat nawh. 22 Kei chu hi rama hin thi’ng ka ta, Jordan kân ve naw ning; nangni chun kân in ta, chu ram thra chu hluong in tih. 23 LALPA in Pathienin in kuoma thuthlung a thlunghai kha theinghil lo dingin fimkhur ro. LALPA in Pathienin a khap angin, ieng lim khomin in biek dingin pathien lim siem naw ro. 24 LALPA in Pathien chu mei anga mi kàng hmang thei, Pathien thikthuse tak a ni si a.

25 “Tu le tehai nei a, chu rama sawt tak in chĕng hnung damin hung porchè a, milim siem a, LALPA in Pathien mithmuah suol thaw a, a lungsenna in cho phăwk dàm a ni chun, 26 Jordan kâna in va hluo ding rama inthok chun bohmang vak in tih ti in chungchang thua mi hrepuitu dingin tu hin hnuoi le van ka fiel a nih; chêng sawt naw ti niu a, mathei loin sukbohmang ni’ng in tih. 27 LALPA chun hnam tin lai sukdar a ti chêu a, LALPAN a hnot darna chĕu hnamhai lai chun mi tlawmte chauh dam khawsuok in tih. 28 Chu taka chun thing le lunga mihriem siem pathien lim, hmu thei lo, hre thei lo, fa thei lo le rim khom hre thei lo hai chu bie’ng in tih. 29 Amiruokchu, chu taka inthok khom chun LALPA in Pathien chu zong a, in lungril po po le in thlarau po poa in dap chun hmu nawk in tih. 30 Buoina in tuok a, chuong thilhai in chunga a tlung pha chun, a tawpah LALPA in Pathien tieng hung kir nawkin a thu zawm ta’ng in tih. 31 LALPA in Pathien chu zangai thei tak Pathien a ni a, thlàthlam naw ni chêu a, sukbohmang bok naw ni chêu; inkhâm meua in pi le puhai kuoma thu a thlung chu theinghil ngai bok naw nih.

32 “Tiena tlânga in um hma daih, Pathienin hnuoia mihriem a siem lai kha ngaituoin, kawlkawdong chen khom dap unla, hieng ang thil ropui hi a tlung ta hlak hrim hrim am? Hieng ang thil hi miin an hriet ta hlak am? 33 Pathienin meichoka inthoka a biek mi, la dam si, nangni ang hi mi an um ta hlak am? 34 Fiena dam, inchikna le thil mak dam, indona dam hmang a, kut hrât tak phar a, in mithmu ngeia LALPA in Pathienin Aiguptaa thil ropui le râpum tak a thawpĕk chêu anga hnam dang kuta inthoka mani ngeia a hnamhai la suok ngam pathien dang an um hlak am?

35 “LALPA chu Pathien a nizie in hriet theina dingin hieng thilhai hi in kuoma suklangin a um a nih; ama naw Pathien dang hrim an um si nawh. 36 A thunun theina ding cheuin vana inthokin a rawl a’n hriettir chêu a. Hnuoi chungah a meipui a’n hmutir chêu a, meia inthokin a rawl in ngaithlak a. 37 In thlatuhai a hmangai a, anni hnunga an thlahai chu a thlang leiin, Aigupta rama inthokin aman umpuiin, a thilthawtheina ropui tak chun a thruoi suok chêu a, 38 nangni nêka hnam ropui lem le hrât lemhai ramah thruoiin, in rochung dinga a pĕk theina ding chêuin, anni chu a hnot suokpĕk chêu a, tuta ang hi in hung ni tah a nih.

39 “Chuleiin, tu hin in lungrilah vongin, hnuoi le vànah LALPA chu Pathien a nizie pom ro. Pathien dang hrim an um nawh. 40 Nangni le in thlahai ta dinga thrâ a ni lei le LALPA in Pathienin kumkhawtluonga dinga ram a pĕk chêua hin in chĕng sawt theina dingin, tuta a dàn le a thupêk ka pĕkhai chĕu hi in zawm ding a nih.”

41 Jordan ral, ni suokna tieng chun Mosien khuo pathum a ruot a, 42 chu chu theidàna le tum lăwk rĕng lei ni loa tu khom mani tuolbawm that paltu tuol tlanna ding a nih. Hieng khuo a ienga khom hin a tlân lŭt thei a, a lût hman chun him a tih. 43 Chuong khuohai chu Reuben hnam puol delh, thlalĕra tlâng zawla um Bezer khuo dam, Gad hnam puol delh Gilead tlànga Ramot khuo dam le Manase hnam puol delh Basan biela Golan khuo dam a nih.

44 Hi hi Israelhai kuoma Mosie dan pĕk chu a nih. 45 Hienghai hi thil bituk dam, thupêk dam le dàn dam, Aiguptaa inthoka an hung suok hnunga Mosien a pek a nih. 46 Chuong lai chun Jordan sak tieng Bet Peor ep ruoma an um laia Mosien a pĕk a nih. Hi lai ram hi Amor mi, Hesbon khuoa um lal Sihon ram, Mosie le Israel thlahaiin Aigupta an suoksan hnungin an hung hne le a ram chu an hluopĕk a nih. 47 Chuong ang bokin Jordan sak tienga um Basan lal Og ram khom an hluopêk bok a. 48 An ram lăkin a huop chin chu Arnon ruom sìra khuo Aroer-a inthoka hmar tienga Sirion tlàng, Hermon tlàng an ti bok chen a nih. 49 Chun, Jordan ràl sak tieng chu Araba ram po po a na, sim tieng chu Pisga pangpĕr hnuoia Tuipui Thi chen a nih.