Basan lal Og an hnè
3
1 “Chu zoah kan inson a, Basan kan pan tung a, Basan lal Og chu a sipai po po leh Edrei hmuna mi lo bei dingin a hung inthok suok a. 2 LALPA chun ka kuomah, ‘Ama chu trì dĕr naw rawh, a sipai po po le a ram leh i kutah ka pêk diem tah a nih. Hesbona Amor lal Sihon chunga i thaw ang bok khan a chunga khom thaw ve rawh’ a ta.3 “Chuong ang chun LALPA ei Pathien chun Basan lal Og le a sipai po po chu kan kutah a mi pĕk a, hlà nei loin kan that vong a. 4 Chu trum chun Basan lal Og ram, Argob biel po po le khaw sawmruk chu lak naw kan nei nawh. 5 Hieng khuo po po hi kul bang insang tak taka inhuon le kotkhar le a kalna nei vong a na, kula inhuon lo khaw tam tak a um bok a. 6 Hesbona Sihon lal chunga kan thaw ang bokin kan sukbohmang vong a, an khuohai le a sunga chêng mihriem po po, nuhmei le naupang chenin, kan inram fai vong a nih. 7 An ran ruolhai le khuoa mi râllâk thilhai ruok chu kan puola dingin kan lăk a.
8 “Chu trum chun hieng Amor lal pahnihai ram, Jordan vadung ral sak tienga mi, Arnon ruoma inthoka Hermon tlang chen hi kan lăk a. 9 (Hermon chu Zidonhai chun Sirion an ta, Amorhai chun Senir an tih). 10 Tlâng zam pheia khuo po po, Gilead chenin, Basan ram po po, Basan lal Og khuo Saleka le Edrei chenin kan lâk vong a nih. 11 (Basan lal Og chu mi lien Refahai laia la um sun a na, a khum chu thîra siem, a dung meter 4 vela sei le a khang meter 1.8a a lien a na, chu chu Amon-hai khuo Raba-ah a la um zing.)
Ram an sem dan
12 “Chu truma kan ram lakhai, Arnon ruom sira Aroer hmar tienga inthoka Gilead tlang zâtve le chu ram sunga khuo um po po le chun Reuben hnam le Gad hnam hai ka pêk a. 13 Gilead tlang zatve dang le Og inlalna ram Basan po po chu Manase hnam zatve kuomah ka pêk a. (Basana Argob biel po po hi Refahai ram tia hriet a ni hlak). 14 Manase thlaa mi Jair chun Argob biel po po, Gesur-hai le Makat-hai ramri chen a chang a, chu ram chu a hming chawia koin, Basan chu tu chen hin Havot-Jair ti a la nih. 15 Gilead chu Makir ka pêk a. 16 Reuben hnam le Gad hnamhai ruok chu Gilead-a inthoka Arnon ruom chen ka pêk a. A ruom lailung chu sim tienga an ramri a na, hmar tieng panga chu Amonhai leh Jabok vadungah an inramri a. 17 Thlang tieng ramri chu Jordan vadung, hmar tieng chu Kineret Dil, sim tieng tawp chu Araba Tuipui (Chi Tuipui)b le sak tieng chu Pisga tlang thrut chen a nih.
18 “Chu trum bok chun in kuomah, ‘LALPA in Pathienin hi ram hi in hluo dinga a pĕk chêu a ni ngĕi el. Amiruokchu, ral do thei chin taphot chun ralthuom inbelin, in unau Israelhai hmaah Jordan vadung hi in kăn ding a nih. 19,20 Nangni ang boka in unauhai khom LALPAN ralmuonga a siem hma po le Jordan thlang tienga LALPA in Pathienin ram a pĕk chêu chu an hluo chenin, in nuhmeihai, in nauhai le in ranruolhai chu khuo ka pêk tah chêua chun lo um raw hai se, ran khom in hau ta hle ti ka hriet si a. Chu zoah, in chanpuola ka pĕk chêu rama hin in hung kir nawk ding a nih’ tiin thu ka pêk chĕu a ni kha.
Kanan rama Mosie lut phal a ni nawh
21 “Chun, chuong lai bok chun Josua kuomah, ‘LALPA i Pathienin lal pahnihai chunga a thaw danhai kha mit ngeiin i hmu a. I fèna dinga lalhai chunga khom khâng ang bok khan LALPAN thaw pei a tih. 22 Anni chu trì naw rawh, LALPA i Pathien ngei chun dopêk a ti che’ tiin thu ka pêk a.
23 “Chu trum bok chun hieng hin LALPA ka ngen a: 24 ‘Aw LALPA Chunghnungtak, i ropuizie le i kut hratzie chu i siehlaw kuoma hin i’n entir tran mèk tah a. Thil ropui tak i thaw anga thaw ve thei hnuoi le vanah pathien dang tu hrim am an um a? 25 Chu ram thra, Jordan răl ram le tlâng ram mawi tak el chu Lebanon chena hmu ve dingin min kaitir ve lul rawh khai’ tiin 26 Nisienlakhom, nangni leiin ka chungah LALPA a lungsen a, a mi ngaithlak nuom nawh. LALPA chun ka kuomah, ‘A hun tah. Hi chungthua hin chu mi be nawk ta ngai hrim hrim naw rawh. 27 Pisga tlàng sǐpah hang kai la, sim le hmar le sak le thlang tieng mit inlĕnin, a ram chu hang thlir vĕl rawh, Jordan ruok chu kân naw ti nih. 28 Amiruokchu, Josua hi thu pe la, infui thra la, sukhrât rawh; hieng mipuihai hi aman thruoi kâi a ta, i hang hmu ding ram chu inhluotir a tih’ a ta. 29 Chuongchun, Beth Peor bul ruoma chun umhmun ei khuor a.