6 Mosie chun Gad thlahai le Reuben thlahai kuoma chun, “Hi hmuna hin nangni thrungin, in unauhaiin râl an tăwn bik ding maw? 7 Ieng dinga LALPAN ram a peka Israelhai lut lo dinga an lungril in sukzàm tum am a na? 8 Kadesh Barnea inthoka ram thlithlai dinga mi ka tir trum khan hieng ang bok hin in puhai khan an thaw a. 9 Eskol phairuom an hang tlung a. a ram an thlir phing leh LALPAN ram a pĕka an lut nawna dingin Israelhai lungril an sukzăm a. 10 Chu ni chun LALPA lungsen a truong a, 11 ‘Lungril taka an mi zui naw leiin, Aigupta rama inthoka ka thruoi suok, mi kum sawmhni chung tieng chun tu khomin Abraham hai, Isak hai le Jakob hai kuoma pek ka tiem ram chu hmu naw ni hai, 12 lungril taka mi zuitu Keniz mi Jefune naupa Kaleb le Nun-a naupa Josua ti chauh naw chun’ tiin an khâm hiel a. 13 LALPA lungsen chu Israel chungah an ling leiin, a mit hmua suol thawtu suon po po chu an bohmang vong hma khat chu thlalĕrah kum sawmli top a’n vàk kuoltir el a nih.

14 “En ta u, nangni mi suol thlahai, tuhin in pahai ang charin in hung um nawk a, Israel chunga LALPA lungsenna sukzuoltu in nih. 15 LALPA in zui nuom ta naw tak tak a ni chun, hieng mipuihai hi thlalĕrah maksan nawk a ta, an sietna intluntu in ni ding a nih” a ta.

16 Anni chun an hung pan hnai a, “Kan ranhai ta dingin ran huong le kan nuhmei le nauhai ta dingin khuo siempek phot kan nuom a. 17 Keini ruok chu Israelhaiin an umna hmun ding an tlung chena ralthuom leh an hma nora tăwn dingin kan inpei a nih. Chuong a ni zing lai chun kan nuhmei le nauhai chu a ram mihai laka an him theina dingin kula inhuon khuoah um hai sien kan ti a nih. 18 Israel thlahaiin an ram rochung ding an hluo vong hmâ khat chun kan in tieng kir nawng kan tih. 19 Kan rochung ding ram chu Jordan suo tieng a ni leiin, Jordan thlang tienga kan chanvo ram chu rochung ve nawng kan tih” an ta.

20 Mosie chun an kuomah, “Chuonga in ti a ni phot chun, LALPA hmaa ngei hin râl tăwn dingin inralthuom ro. 21 In răldo mihai po poin Jordan răl hi kâi an ta, LALPA thruoina hnuoiah hmêlmahai bei a, tukdol a, an ram LALPAN a lakpêk chenin râl in do ding a nih. 22 Chu zoa chun LALPA chunga le in hnampui Israelhai chunga in thaw ding chu in hlen ta leiin hung kǐr nawk thei in tih. Chu pha chun Jordan sak tieng ram hi in ram chanpuolah LALPAN pompêk a ti chêu. 23 Amiruokchu, in thu tiem in hlen naw ruok chun, LALPA chunga suol ning in ta, in suol leiin hrem ngèi ngéi a ti chêu ti hre tlat ro. 24 In nu le nauhai umna ding khuo dam chu siem ro, in ran ruolhai umna dingin ran huong bawl bok unla, amiruokchu in thu tiem chu hlen ngèi ngéi ro” a ta.

25 Gad mihai le Reuben mihai chun Mosie kuomah, “I siehlaw kan ni a, kan pu thupêk ang chun thawng kan tih. 26 Kan nuhmeihai le nauhai, kan bawng ruol le kan beram ruol hai ruok chu Gilead ram khuoa hai hin lo um an ta, 27 i siehlawhai ruok hi chu, indo dinga inralthuom po po chun, kan pu hril ang khan, LALPA hmaah Jordan răl va kâi kan tih” tiin an hril a.

28 Chuongchun, Mosie chun an chungthuah thiempu Eleazar le Nuna naupa Josua le Israel pahnam luhai chu thu a pêk a: 29 “Gad thlahai le Reuben thlahai, indo dinga inralthuom po po hin LALPA hmaah Jordan vadung hi an kaipui chêu a, ram chu in tukdol chun Gilead ram chu an hluo dingin in pĕk ding a nih. 30 Amiruokchu, inralthuomhai hin an kăipui si naw chêu chun, Kanan rama an chanvo ding hmuna chun an um ding a nih” a ta.

31 Gad thlahai le Reuben thlahai chun, “I siehlawhai hin LALPAN a hril ang chun thawng kan tih. 32 Inralthuomin, LALPA hmaah Jordan vadung râl kâiin, Kanan ram lut kan ta, sienkhom kan ram hluo ding chu Jordan vadung sak tieng hi la ni zing a tih” an ta.

33 Chuongchun, Mosie chun Gad thlahai le Reuben thlahai le Josefa naupa Manase thla hnam zatvehai chu Amor lal Sihon ram hai le Basan lal Og ram hai, chuonghai ram sunga khuo po po le an sè vĕla ramhai chenin a pêk a. 34 Gad-a thlahai chun Dibon hai, Atarot hai, Aroer hai, 35 Atrot Stofan hai, Jazer hai, Jogbea hai, 36 Bet Nimra hai le Bet Haran khuohai chu an indin thra a, kulin an inhuon vong a, an ran ruolhai siena dingin ran huong an bawl a. 37 Reuben thlahai chun Hesbon hai, Eleale hai, Kiriathaim hai, 38 a hming an thlăk Nebo le Baal hai, le Sibma khuohai chu an indin thra a, an khaw siemhai chu hming hrang hrang an inbŭk a.

39 Manase naupa Makir thlahai chu Gilead-ah an fe a, an lăk a, chu taka um Amor mihai chu an hnot suok vong a. 40 Chuongchun, Mosien Gilead ram chu Manase thla Makirhai chu a pêk a, chu taka chun an um a. 41 Chun, Manase naupa Jaira chun an khuohai chu a va lâk a, hming thar Havot Jair a’n bŭk a. 42 Noba chun Kenat le a sè vĕla khuohai chu a lâk a, ama hming chawiin Noba a’n bŭk a.