3 Mosie chun mipuihai kuomah, “Midianhai doa an chunga LALPA phuba hlen dingin nangni laia mi inralthuom raw hai se. 4 Israel pahnam tina inthokin sipai sangkhat seng indonaa chun in fe ding a nih” a ta. 5 Chuongchun, pahnam senga inthoka mi sangkhat pei fe dingin mi sing le sanghni an thĕ suok a. 6 Mosie chun pahnam tina mi sangkhat pei chu thiempu Eleazar naupa Pinehas inrawina hnuoiah indo ding chun a’n fetir a, Pinehas chun hmun thienghlima bûr le bèlhai le thu pêknaa mŭt ding tawtawrawt chu a chawi bok a.

7 LALPAN Mosie kuoma thu a pek angin Midianhai chu an bei a, pasal po po an that vong a. 8 An thathai lai chun Midian lal panga- Evi, Rekem, Zura, Hura le Reba- hai khom an thrang. Beor naupa Balaam khom kawlhnâmin an sàt hlum a. 9 Midian nuhmeihai chu an nauhai leh salah an man a, an bawng hai, beram hai le thuomhnaw hai chu râllâk sumah an lak a. 10 Midianhai umna khuo po po le an riebŭkhai chu an raw fai vong a. 11 An răllăkhai po po chu, mihriem leh ran leh, an hung inkawi vong a. 12 Jeriko zawn, Jordan vadung kam, Moab phaia an riebuka um Mosie le Eleazar le Israel pungkhawmhai kuoma chun an hung hawn a.

13 Mosie le thiempu Eleazar le khawtlang thruoituhai chun kotsuoah an lo tuok a. 14 Indonaa inthoka hung kir an hotuhai, za chunga hotuhai le sang chunga hotuhai chunga chun Mosie lung chu a sen hle a. 15 “Nuhmei po po damin in hlâ vong a ni maw? 16 Hienghai hi Balaam thu zawma LALPA laka inthoka Israelhai kei hertu le Peor-a thil tlung leia mipuihai chunga LALPA hremna intlungtirtu kha an nih ti in hriet naw maw? 17 Tuhin pasalte po le pasal pawl tah nuhmei po chu that vong unla, 18 pasal la pawl lo nuhmeihai ruok chu in ta dingin hlà ro. 19 Tu khom mi that taphot le mithi ruong tawk taphot chu riebuk puo tieng, khawhnawmah ni sari sung riek ro. A ni thumna le ni sarinaah nangni le in sal manhai chu inthien tawl ro. 20 In silfenhai le savun amanih kèl hmul amani le thinga siem hrim hrim chu in inthien fai ding a nih” a ta.

21 Chun, thiempu Eleazar chun indoa thrang sipaihai kuomah, “Hi hi LALPAN Mosie kuoma thu a pĕk dàn chu a nih: 22 Rangkachak hai, tangkaruo hai, dâr hai, thîr hai, rangva hai le suon hai dam, 23 meia raw kang thei lo thil taphot chu meiah rol thleng in ta, hung thienghlim a tih. Ieng thil khom ni sien, tlĕngfaina tuia sukthienghlim ding a nih. Meia raw thei lo chi taphot chu tuiah in phŭm ding a nih. 24 Chun, a ni sari niin in puonhai sawp in ta, hung thienghlim in ta, chu zoah riebûkah hung lut thei tang in tih” a ta.

25 LALPAN Mosie a biek a, 26 “Nang le thiempu Eleazar le Israel pahnam tina lukhaituhaiin râllâk sum le mihriem le ran an hawn po po chu tiem vong ro. 27 Râllâk sumhai chu indonaa thrang sipaihai le khawtlang mipuihai lai sem ro. 28 Indonaa fe sipaihai chanpuola inthok chun mihriem hai, bawng hai, sabengtung hai, beram hai, kèlhai chu zanga peia pakhat LALPA kuoma pĕk dingin sie hran rawh. 29 LALPA ta dinga ser hran po chu thĕn thilhlânah thiempu Eleazar kuomah pe rawh. 30 A zatve dang, Israel pungkhawmhai chana inthok chun mihriem hai, bawng hai, sabengtung hai, beram hai, kel hai le ran dang a ieng khom sawmnga peiah pakhat sie hran la, chu chu LALPA biekbŭk enkoltu Levihai kuomah pe rawh” a ta. 31 LALPAN thu a pĕk ang takin Mosie le Eleazar chun an thaw a.

32 Sipaihaiin anni puola an thil lak tiem sa lo an hung hawn po chu beram nuoi ruk le singsari le sangnga, 33 bawng singsari le sanghni, 34 sabengtung singruk le sangkhat, 35 le mihriem, pasal la pawl ngai lo nuhmei singthum le sanghni an nih.

36 A zatve, indonaa fehai chan chu beram nuoithum le singthum le sangsari le zanga a nih. 37 LALPA ta dinga pĕk zât chu zaruk le sawmsari panga a nih. 38 Bawng chu singthum le sangruk a na, chu taka inthoka LALPA kuoma pĕk zât chu sawmsari le pahni a nih. 39 Sabengtung singthum le zangaa inthoka LALPA kuoma pĕk zât chu sawmruk le pakhat a na; 40 mihriem sing le sangruka inthoka LALPA kuoma pĕk zât chu sawmthum le pahni a nih. 41 LALPAN Mosie kuoma thu a pĕk angin, LALPA ta dinga ser hran po chu thiempu Eleazar kuomah Mosien a pĕk a.

42 Indonaa fehai chan an sem hnunga Israel mipuihai chan la um zât chu, 43 beram nuoithum le singthum le sangsari le zanga; 44 bawng singthum le sangruk; 45 sabengtung singthum le zanga; le 46 mihriem singkhat le sangruk a nih. 47 Israelhai chana inthoka mihriem le ran sawmngaah pakhat pei a lâk a, LALPA thupĕk angin, LALPA biekbŭk enkoltu Levihai a pêk a.

48 Chun, sipai hotuhai, za chunga hotu le sang chunga hotuhai chu Mosie kuomah an fe a, 49 a kuomah, “I siehlawhaiin i hnuoia sipaihai kan tiem a, pakhat khom inhmang an um nawh. 50 Chuleiin, LALPAN kan nun a mi venghimpek manah chan kan dong senga inthokin rangkachak incheina thil- kebun hai, bânbun hai, suoi namna kutsebi hai, nabê hai, thri hai chu kan hung chawi a nih” an ta. 51 Mosie le thiempu Eleazar chun rangkachaka siem incheina thuom po po chu an lo lăk a. 52 Sang chunga hotu le za chunga hotuhaiin LALPA kuoma thĕn thilhlâna rangkachak an inhlàn po chu kilogram zahni vêl bŭk a nih. 53 Sipaihai chun an ràllàk sum chu mani ta ding senga an làk a nih. 54 Mosie le thiempu Eleazar chun sang chunga hotu le za chunga hotuhai rangkachak hung chawi an lo dong sawng chu LALPAN a mi Israelhai a hriet zingna dingin Intuokna Puon ina chun an sie a.