Moab han Israelhai an zawr thluk
25
1 Sitim ruoma Israelhai an um lai chun chu taka um Moab nuhmeihai chu an pawl a. 2 Chuong nuhmeihai chun an pathien kuoma inthawinaa dam an fiel a, an inthawina sa chu fain an pathien hmaa chun an kŭn ve a. 3 Peor-a an Baal chu Israelhai khoma an biek ve el tah leiin an chungah LALPA lungsen chu a so hle a. 4 LALPA chun Mosie kuomah, “Hieng hotuhai po po hi thruoi tawl la, LALPA lungsenna tribaium tak chu Israelhai chunga inthoka a’n kieng theina dingin sŭn varah LALPA hmaah sukhlum vong rawh” a ta. 5 Mosie chun Israel rorêltuhai kuomah, “Peor-a Baal bea thrang in mihai seng chu in sukhlum ding a nih” a ta.
6 Chuonga Intuokna Puon in bula Mosie le Israel pungkhawmhai po po an trap lai chun an mit hmua ngei Israel mi pakhat hin a insungah Midian nuhmei a hung thruoi lut a. 7 Aron naupa Eleazar naupa Pinehas chun a hmuin inkhawmnaa inthokin a suok a, fei a lak a, 8 Israel pa chu a puon inah a zui lut a, Midian nu le chun an pahniin feiin a sun tlang a, Israelhai chunga hremna chu a re ta a. 9 Chu hremna hripui chun mi 24,000 a that hman a nih.
10 LALPA chun Mosie kuomah, 11 “Thiempu Aron naupa Eleazar naupa Pinehas chun Israelhai laka ka thîkthu a siet anga a thîkthu a suksiet vè leiin Israelhai chunga ka lungsen chu a rè ta a, ka thîkthu lungsen leiin Israelhai chu sukbohmang ta naw ning. 12 Chuleiin, ngai ta, keima le inremna thuthlung chu ama leh thlung ka tih ti hril rawh. 13 Pathien inzaumna hum dinga thîkthu sukse a, Israel thlahai ta dinga inremna a siem leiin, ka thuthlung hi ama le a thlahai kumkhaw thiempu nina thuthlung ni’ng a tih’, ti rawh” tiin.
14 Israel mi, Midian nuhmei le an that hming chu Simeon sungkuoa mi Salu naupa Zimri a nih. 15 Midian nuhmei an that hming chu Zura naunu Kozbi a na, Zura chu Midian pahnam pakhat laia lal a nih.